2 राजा 9

येहूए रा अभिषेक ओर राज्य

1 तेबे एलीशा नबीए भविष्यबक्तेया रे चेलेया बीचा ते एक चेला आपू गे बुलाया। तेबे तिने तेसखे बोलेया, "त्यार ऊई जा, ओर आथो दे ये तेलो री कुप्पी लई की गिलाद इलाके रे रामोत शईरो खे जा। 2 ओर तेती पऊँची की येहूए खे जो यहोशापातो रा पाऊ ओर निमशीए रा पोता ए, टोल़ी लणा ओर पीतरे जाई की से खड़ा करी की तेसरे पाईया ते लग पीतरले एक कमरे दे लई जाणा। 3 तेबे तेलो री ये कुप्पी लई की तेसरे सिरो पाँदे ये बोली की लटणी, ‘यहोवा ईंयाँ बोलोआ कि आऊँ इस्राएलो रा राजा ऊणे खे तेरा अभिषेक करूँआ।’ तेबे द्वार खोली की नठी जाणा, देरी नि करनी।"

4 तेबे से जवान भविष्यबक्ता, गिलाद इलाके रे रामोत शईरो खे गया। 5 तेती पऊँची की तिने क्या देखेया कि सेनापति बैठी रे; तेबे तिने बोलेया, "ओ सेनापति, मां तांगे कुछ बोलणा।" येहूए पूछेया, "आसा सबी बीचे केसगे?" तिने बोलेया, "ओ सेनापति, तांगे ई।" 6 तेबे से उठी की कअरे गया ओर तिने ये बोली की तेसरे सिरो पाँदे तेल लटेया, "इस्राएलो रा यहोवा परमेशर ईंयाँ बोलोआ कि आऊँ आपणी प्रजा इस्राएलो पाँदे राजा ऊणे खे तेरा अभिषेक करूँआ।" 7 तेबे तैं आपणे स्वामी अहाबो रा कराना काई देणा, ताकि माखे आपणे दास भविष्यबक्तेया रे, बल्कि आपणे सारे दासा रे खूनो रा बदला लणा, जिना रा खून ईजेबेले बाह्यी राखेया। 8 कऊँकि अहाबो रा सारा कराना नाश ऊई जाणा ओर मां अहाबो रे कुलो रे सारे पाऊ ओर इस्राएलो रे क्या गुलाम, क्या आजाद, हर एक नाश करी देणे। 9 ओर मां अहाबो रा कराना नबातो रे पाऊ यारोबामो रा जा ओर अहिय्याह रे पाऊ बाशा जेड़ा करी देणा। 10 यिज्रेल जगा दे ईजेबेल कुत्तेया खाणी ओर से केसी नि माट्टिया दे दबाणी। तेबे से नबी द्वार खोली की तेथा ते नठी गा।

11 तेबे येहू आपणे स्वामिए रे कर्मचारिया गे निकल़ी की आया ओर एकी तेसते पूछेया, "क्या ठीक ए, से पागल तांगे कऊँ आया था?" तिने तिना खे बोलेया, "तुसा खे पता ऊणा कि से कुण ए ओर तेस साथे क्या बात‍चीत ऊई।" 12 तिने बोलेया, "चूठ ए, आसा गे बताई दे।" तिने बोलेया, "तिने मांगे बऊत कुछ बोलेया, पर मतलब ये ए कि यहोवा ईंयाँ बोलोआ कि आऊँ इस्राएलो रा राजा ऊणे खे तेरा अभिषेक करी देऊँआ।" 13 तेबे तिने सबी फटाफट आपणे टाल्ले खोली की तेसते थाले पैड़िया पाँदे ई बछाई ते ओर रड़सिंगे बजाई की बोलणे लगे, "येहू राजा ए।"

येहूए रा योराम ओर अहज्याह खे काणा

14 ईंयाँ येहू जो निमशीए रा पोता ओर यहोशापातो रा पाऊ था, तिने राजा योरामो साथे राजद्रोह री साजिश कित्ती। योराम तो सारे इस्राएलो समेत अरामो रे राजा हजाएलो रिया बजा ते गिलाद इलाके रे रामोत शईरो री रक्षा करने लगी रा था;

15 पर राजा योराम आपू आपणे जख्मा रा जो अरामो रे राजा हजाएलो साथे युद्ध करने रे बखते तेसखे अरामिया ते लगे थे, तिना रा लाज कराणे खे यिज्रेल जगा खे वापस ऊईगा था। तेबे येहूए बोलेया, "जे तुसा रा एड़ा मन ओ, तो एते शईरो ते कोई निकल़ी की यिज्रेलो खे सुनाणे नि जाओ।" 16 तेबे येहू रथो पाँदे चढ़ी की यिज्रेलो खे गया जेती योराम काईल ऊई की पड़ी रा था ओर यहूदा रा राजा अहज्याह योरामो खे देखणे तेती आई रा था। 17 यिज्रेलो रे गुम्मटो पाँदे, जो पईरेदार खड़ा था, तिने येहूए साथे आऊँदे ऊए दलो खे देखी की बोलेया, "माखे एक दल दिशणे लगी रा;" योरामे बोलेया, "एक सवारो खे बुलाई की तिना लोका साथे मिलणे खे पेज ओर से तिना खे पूछो कि क्या तेती सब ठीक ए?" 18 तेबे एक कोड़ेया रा सवार तेसखे मिलणे खे गया ओर तेसते बोलेया, "राजा पूछोआ कि क्या तेती सब ठीक ए?" येहूए बोलेया, "ठीक ऊणे ते तेरा क्या काम? अटी की मां पीछे चल।" तेबे पईरेदारे बोलेया, "से दूत तिना गे पऊँचेया तो था, पर वापस नि आया।" 19 तेबे तिने दूजा कोड़ेया रा सवार पेजेया ओर तिने तिना गे पऊँची की बोलेया, "राजा पूछणे लगी रा कि क्या सब ठीक ए?" येहूए बोलेया "ठीक ऊणे ते तेरा क्या काम? अटी की मां पीछे चल।" 20 तेबे पईरेदारे बोलेया, "से बी तिना गे पऊँचेया तो था, पर वापस नि आया। दौड़ना तो निमशीए रे पोते येहूए जेड़ा ए; से तो पागला जेड़ा दौड़ोआ।" 21 योरामे बोलेया, "मेरा रथ त्यार करवा।" जेबे तेसरा रथ त्यार ऊईगा, तेबे इस्राएलो रा राजा योराम ओर यहूदा रा राजा अहज्याह, दोनो आपणे-आपणे रथो पाँदे चढ़ी की चली गे ओर सेयो बारे जाई की यिज्रेल नाबोतो री जमीना दे येहूए साथे मिले। 22 येहूए खे देखदे ई योरामे पूछेया, "ओ येहू क्या सब ठीक ए" येहूए ज्वाब दित्तेया, "जदुओ तक तेरी माये ईजेबेल ओर तेरे माणूं तेरिया माया जेड़े बुरे काम ओर जादू-टौणा करदे रओ, तदुओ तक ठीक किंयाँ ऊई सकोआ?" 23 तेबे योरामे आपणा रथ फेरी की ओर अहज्याह खे ये बोली की नठेया, "ओ अहज्याह आसा साथे छल ऊई रा, नठी जा।" 24 तेबे येहूए धनुष कानो तक खींजी की योरामो री पीठी बीचे एड़ा तीर बाया कि से तेसरा काल़जा फाड़ी की निकल़ी गा ओर से आपणे रथो ते रूड़ी गा। 25 तेबे येहूए बिदकर नाओं रे आपणे एक सरदारो खे बोलेया, "एसखे चकी की यिज्रेली नाबोतो री जमीना दे सेटी दे; याद तो कर कि जेबे आऊँ ओर तूँ एकी साथे सवार ऊई की अहाबो पीछे-पीछे चलणे लगी रे थे तेबे यहोवे तेसते ये पारी वचन बुलवाया था, 26 ‘यहोवे री ये बाणी ए कि नाबोत ओर तेसरे पाऊआ रा जो खून ऊआ, से मैं देखी राखेया ओर यहोवे री ये बाणी ए कि मां तेसा ई जमीना दे ताखे बदला देणा।’ तो एबे यहोवे रे तेस वचनो रे मुताबिक एसखे चकी की तेसा ई जमीना दे सेटी दे।"

27 ये देखी की यहूदा रा राजा अहज्याह बगीचे रे मईलो री बाटा रिये नठी गा। ओर येहूए तेसरा पीछा करी की बोलेया, "एसखे बी रथो ई पाँदे काओ; तेबे से बी यिबलामो रे नेड़े गूरो री चढ़ाईया पाँदे काया ओर मगिद्दो तक नठदा ऊआ मरी गा।" 28 तेबे तेसरे कर्मचारिये से रथो पाँदे यरूशलेम शईरो दे पऊँचाई की से दाऊदो रे शईरो दे तेसरे बुजुर्गा साथे दबाईता। 29 अहज्याह तो अहाबो रे पाऊ योरामो रे राजो रे ग्यारुए सालो दे यहूदा पाँदे राज करने लगी गा था।

30 येहू यिज्रेलो खे आया, तेबे ईजेबेल ये सुणी की आखी दे काजल़ लगाई की आपणा सिर पारी की, द्वारिया बीचा ते चाँकणे लगी। 31 जेबे येहू बड़े द्वारो रिये आऊणे लगी रा था तेबे तिने बोलेया, "ओ आपणे स्वामिए खे काणे वाल़े जिम्री, क्या सब ठीक ए?" 32 तेबे तिने द्वारिया रिया तरफा खे ऊबे देखेया ओर पूछेया, "मेरी तरफा खे कुण ए? कुण? ये सुणी की दो-तीन खुसरेया तेसरी तरफा खे चाँकेया।" 33 तेबे तिने बोलेया, "एसा खे थाले सेटी देयो।" तेबे तिने से थाले सेटिती ओर तेसारे खूनो रे कुछ छीटे कांदा पाँदे ओर कुछ कोड़ेया पाँदे पड़े ओर तिने से लाते बाई की कनारे कित्ती। 34 तेबे से पीतरे जाई की खाणे-पीणे लगेया ओर बोलेया, "जाओ तेसा स्रापित जवाणसा खे देखी लो ओर तेसा खे माट्टिया दे दबाई देयो, से तो राजे री बेटी ए।" 35 जेबे सेयो तेसा खे दबाणे खे गये, तेबे तेसा री खोपड़ी, पैर ओर आथो खे छाडी की तेसा रा कुछ नि मिलेया। 36 तेबे तिने वापस ऊई की येहूए खे बोली ता; तेबे तिने बोलेया, "ये यहोवे रा से वचन ए, जो तिने आपणे दास तिशबी एलिय्याह ते बुलवाया था कि ईजेबेला रा मास यिज्रेली जमीना दे कुत्तेया खाणा 37 ओर ईजेबेला री लोथ यिज्रेलो री जमीना दे खादा जेड़ी पड़ी दी रणी, एथो तक कि केसी नि बोलणा कि ये ईजेबेल ए।"