2 राजा 17

होशे रा इस्राएलो दे राज्य करना

1 यहूदा रे राजा आहाजो रे राजो रे बारूए साले एला रा पाऊ होशे सामरिया शईरो दे, इस्राएलो पाँदे राज करने लगेया ओर नौ साल तक राज करदा रया। 2 तिने से ई कित्तेया जो यहोवे री नजरा दे बुरा था, पर इस्राएलो रे तिना राजेया रे बराबर नि, जो तेसते पईले थे। 3 होशे पाँदे अश्शूरो रे राजा शल्मनेसेरे सेना लई की अमला कित्तेया ओर होशे खे अराई की से आपणे कब्जे दे करिता, तेबे होशे तेसखे पेंट देणे लगेया।

4 एक बार राजा होशे मिस्र देशो रे राजा सो गे पेंट लई की दूत पेजे। इजी ते अलावा, जो कर से हर साल अश्शूर देशो रे राजे गे पेजो था, से तिने बन्द करिता। अश्शूरो रे राजे खे होशे रे बारे दे पता लगी गा। इजी बजा ते अश्शूरो रे राजे होशे बन्दी बणाई ला ओर बेड़िया पाई की जेला दे पाईता। 5 तेबे अश्शूरो रे राजे पूरे देशो पाँदे अमला कित्तेया ओर सामरिया शईरो दे जाई की से तीन साल तक केरेया दा राखेया। 6 होशे राजे रे नऊए साले अश्शूरो रे राजे सामरिया शईर लई ला ओर इस्राएली लोका खे अश्शूरो दे लई जाई की, हलह जगा दे ओर गोजानो री नदी हाबोरो रे नेड़े ओर मादिया रे शईरो दे बसाया।

7 इजी री ये बजा ए कि, तेबे बी इस्राएलो रा यहोवा परमेशर तिना खे मिस्रो रे राजा फिरौनो रे आथो ते छुड़ाई की मिस्र देशो ते निकयाल़ी की ल्याया था, तेबे बी तिने तेसरे खलाफ पाप कित्तेया ओर पराये देवतेया रा डर मानेया, 8 ओर जो जातिया यहोवे इस्राएली लोका रे सामणे ते देशो ते निकयाल़िया थिया, तिना री रवाजा पाँदे ओर आपणे राजे री चलाई री रवाजा पाँदे चलो थे। 9 इस्राएलो रे लोके कपट करी की आपणे परमेशर यहोवे रे खलाफ बुरे काम कित्ते, मतलब पईरेदारा रे गुम्मटो ते लई की, गढ़वाल़े शईरो तक आपणी सारी बस्तिया दे ऊच्ची जगा बणाई तिया; 10 तिने सबी ऊच्ची पाह्ड़िया पाँदे ओर सारे आरे डाल़ा निठे पात्थरो रे खम्बे ओर अशेरा देविया री मूर्ति खड़ी करिती। 11 एड़ी ऊच्ची जगा रे तिना जातिया बराबर जो यहोवे तिना सामणे ते निकयाल़ी तिया थिया, तूप बाल़ेया ओर यहोवे खे रोष दलाणे वाल़े बुरे काम कित्ते,

12 ओर मूर्तिया री आराधना कित्ती, जेतेरे बारे दे यहोवे तिना खे बोलेया था, "तुसे ये काम नि करना।" 13 तेबे बी यहोवे सारे भविष्यबक्ते ओर सारे दर्शिया रे जरीये इस्राएल ओर यहूदा रे लोका खे ये बोलेया था, "आपणी बुरी चाल छाडी की तेसा सारी व्यवस्था रे मुताबिक जो मैं तुसा रे बुजुर्गा खे दित्ती थी ओर आपणे दास भविष्यबक्तेया रे आथो दे तुसा गे पऊँचाई राखी, मेरी आज्ञा ओर बिदिया खे मानेया करो।" 14 पर सेयो नि माने, बल्कि आपणे तिना बुजुर्गा जेड़े, जिने आपणे परमेशर यहोवे रा परोसा नि कित्तेया था, सेयो बी टीठ बणी गे। 15 सेयो तेसरी बिदिया खे ओर आपणे बुजुर्गा साथे तेसरी वाचा ओर जो आज्ञा तिने तिना खे दित्तिया थिया, तिना खे तुच्छ जाणी की, नकम्मी गल्ला पीछे चली पड़े; जेते कि सेयो आपू नकम्मे ऊईगे ओर आपणी चऊँ कनारली तिना जातिया पीछे बी ऊईगे जिना रे बारे यहोवे तिना खे आज्ञा दित्ती थी कि तिना जेड़े काम नि करने। 16 बल्कि तिने आपणे परमेशर यहोवे रिया सारिया आज्ञा छाडी तिया ओर दो बाच्छूए री मूर्तिया कअड़ी की बणाईया ओर अशेरा देवी बी बणाई ओर सर्गो रे सारे गणा गे माथा टेकेया ओर बाल देवते री आराधना कित्ती। 17 तिने आपणे माठे-बेटिया आगी दे बलि करी की चढ़ाए ओर भविष्यबाणी करने वाल़ेया ते पूछणे ओर जादू-टौणा करने लगे ओर जो यहोवे री नजरा रे बुरा था जेते कि से रोषे बी ओआ, तिने से कित्तेया ओर आपणी इच्छा ते बिकी गे।

18 इजी बजा ते यहोवा इस्राएलो ते बऊत रोषे ऊआ ओर सेयो आपू सामणे ते दूर करीते; यहूदा रे गोत्रो खे छाडी की ओर कोई बचेया दा नि रया। 19 यहूदा रे लोके बी आपणे परमेशर यहोवे री आज्ञा नि मानी, बल्कि जो बिदिया इस्राएली लोके चलाईया थिया, तिना पाँदे चलणे लगे। 20 तेबे यहोवे इस्राएलो री सारी ल्वादा खे छाडी की, तिना खे दु:ख दित्तेया ओर लुटणे वाल़ेया रे आथो दे करीते ओर अन्तो रे सेयो आपणे सामणे ते निकयाल़ी ते। 21 तिने इस्राएल तो दाऊदो रे कराने ते छुड़ाई ला ओर तिने नबातो रा पाऊ यारोबाम आपणा राजा बणाई ला ओर यारोबामे इस्राएल यहोवे पीछे चलणे ते दूर खींजी की तिना ते बड़ा पारी पाप करवाया। 22 तो जेड़े पाप यारोबामे कित्ते थे, तेड़े ई पाप इस्राएली बी करदे रये ओर तिना ते लग नि ऊए। 23 अन्तो दे यहोवे इस्राएली लोक आपणे सामणे ते दूर करी ता, जेड़ा कि तिने आपणे सब दास भविष्यबक्तेया रे जरीये बोलेया था। इजी बजा ते अश्शूरो री सेने इस्राएली लोका पाँदे अमला करी की सेयो बन्दी बणाई ले ओर आपणे देशो खे लईगे। जेती सेयो आजके दिनो तक रओए।

इस्राएलो रे देशो दे ओरी जातिया रा बसणा

24 अश्शूर देशो रे राजे बाबेल, कूता, अब्वा हमात ओर सपवैंम शईरा ते लोक ल्याई की, इस्राएली लोका री जगा पाँदे सामरिया रे शईरो दे बसाईते; तेबे सेयो सामरिया शईरो दे अधिकारी ऊई की तिना रे शईरो दे रणे लगे। 25 जेबे सेयो तेती पईले-पईले रणे लगे, तेबे यहोवे रा डर नि मानो थे, इजी बजा ते यहोवे तिना बीचे शेर पेजे, जो तिना खे काणे लगे। 26 इजी बजा ते तिने अश्शूरो रे राजे गे सन्देसा पेजेया कि जो जातिया तैं तिना रे देशो ते निकयाल़ी की सामरिया शईरो दे बसाई तिया, सेयो तेस देशो रे देवतेया री रवाज नि जाणदिया, जेते कि तिने आसा बीचे शेर पेजे जो आसा खे इजी री खातर काई देओए कि आसे तेस देशो रे देवतेया री रवाज नि जाणदे। 27 तेबे अश्शूरो रे राजे आज्ञा दित्ती, "जिना पुरोईता खे तुसे तेस देशो ते एती ली आई रे, तिना बीचा ते एकी खे तेती पऊँचाई देयो ओर से तेती जाई की रओ ओर से तिना खे तेथो रे देवते री रवाज सखाओ।" 28 तेबे जो पुरोईत सामरिया ते निकयाल़े थे, तिना बीचा ते एक जाई की बेतेल शईरो दे रणे लगेया ओर तिना खे सखयाणे लगेया कि यहोवे रा डर किंयाँ मानणा चाईयो। 29 तेबे बी एकी-एकी जातिये आपणे देवते बणाई की, आपणे-आपणे बसाए रे शईरा दे तिना ऊच्ची जगा दे राखे जो सामरिया दे रणे वाल़ेया बणाए थे। 30 बाबेलो ते आए दे माणूंए तो सुक्कोतबनोत देवते री मूर्ति बणाई, कूतो ते आए रे माणूंए नेर्गेल देवते री मूर्ति बणाई, हमातो ते आए दे माणूंए अशीमा देवते री मूर्ति बणाई, 31 ओर अब्विये ते आए दे लोके निभज ओर तर्त्ताक देवते री मूर्ति बणाई ओर सत्यारैमी लोके आपणे पाऊआ खे अद्रम्मेलेक ओर अनम्मेलेक नाओं रे सपवैंमो रे देवतेया खे बलि करी की चढ़ाणे लगे। 32 ईंयाँ सेयो यहोवे रा डर मानो तो थे, पर सबी लोका बीचा ते ऊच्ची जगा दे पुरोईत बी ठराई देयो थे, जो ऊच्ची जगा दे तिना रिया तँईं बलि करेया करो थे। 33 सेयो लोक यहोवे रा डर मानो तो थे, पर तिना जातिया री रवाजा पाँदे, जिना बीचा ते सेयो निकयाल़े थे, आपणे-आपणे देवतेया री सेवा बी करो थे। 34 आजके दिनो तक सेयो आपणी पईलकी रवाजा पाँदे चलोए, सेयो यहोवे रा डर नि मानदे। सेओ ना तो आपणी बिधि ओर नियमा पाँदे ओर ना तेसा बिधान ओर आज्ञा पाँदे चलोए, जो यहोवे याकूबो री ल्वादा खे दित्ती थी, जेसरा नाओं तिने इस्राएल राखेया था। 35 तिना साथे वाचा बानी की यहोवे तिना खे ये आज्ञा दित्ती थी, "तुसे पराये देवतेया रा डर नि मानणा ओर ना तिना गे माथा टेकणा, ना तिना री सेवा करनी ओर ना तिना गे बलि चढ़ाणा। 36 पर यहोवा जो तुसा खे बड़ी तागत ओर चमत्कारो रे कामा रे जरीये मिस्र देशो ते निकयाल़ी की ल्याया, तुसे तेसरा ई डर मानणा, तेसगे ई माथा टेकणा ओर तेसगे ई बलि चढ़ाणा। 37 ओर मूसे जो-जो बिदिया, ओर नियम, बिधान ओर आज्ञा तुसा रिया तँईं लिखी राखिया, तिना खे तुसे सदा चौकसिया साथे मानदे रओ; ओर पराये देवतेया रा डर नि मानणा। 38 जो वादा मैं तुसा साथे करी राखेया, से नि पूलणा ओर पराये देवतेया रा डर नि मानणा। 39 बस आपणे परमेशर यहोवे रा डर मानणा, तेस ई तुसे तुसा रे सबी दुश्मणा रे आथो ते बचाणे।" 40 तेबे बी तिने नि मानेया, पर सेयो आपणी पईलकी रीतिया रे मुताबिक करदे रये। 41 तेबे सेयो जातिया यहोवे रा डर मानो तो थिया, पर आपणी कअड़ी री मूर्तिया री सेवा बी करो थिया ओर जेड़ा सेयो करो थे तेड़ा ई तिना रे माठे, पोते बी आजो तक करोए।