2 राजा 24

यहूदा पाँदे दुश्मणा रा अमला

1 तेसरे दिना दे बाबेलो रे राजा नबूकदनेस्सरे यहूदा पाँदे अमला कित्तेया ओर राजा यहोयाकीम तीऊँ साला तक तेसरे वशो दे रया; तेबे तिने तेस साथे बगावत कित्ती। 2 तेबे यहोवे तेसरे खलाफ ओर यहूदा खे नाश करने खे कसदी, अरामी, मोआबी ओर अम्मोनिया रे दल पेजे, ये यहोवे रे तेस वचनो रे मुताबिक ऊआ, जो तिने आपणे दास भविष्यबक्तेया रे जरीये बोलेया था। 3 बिना कोई शक ये यहूदा रे लोका पाँदे यहोवे री आज्ञा ते ऊआ, ताकि से तिना खे आपू ते दूर करो। ये तिना रे राजा मनश्शे रे सबी पापो रिया बजा ते ऊआ। 4 ओर बेकसूरो रे तेस खूनो रिया बजा ते जो तिने कित्तेया था; कऊँकि तिने यरूशलेम निर्दोषा रे खूनो साथे परी ता था, जो यहोवे माफ करना नि चाया। 5 यहोयाकीमो रे ओर सारे काम जो तिने कित्ते, सेयो यहूदा रे राजेया रे इतिआसो री कताबा दे लिखी राखे। 6 अंतो दे राजा यहोयाकीम मरीगा, ओर तेसरा पाऊ यहोयाकीन तेसरी जगा पाँदे यहूदा प्रदेशो पाँदे नवां राजा बणेया। 7 ओर मिस्रो रा राजा आपणे देशो ते बारे फेर कदी नि आया, कऊँकि बाबेलो रे राजे मिस्रो रे नाल़े ते लई की फरात नदिया तक जितणा देश मिस्रो रे राजे रा था, सारा आपणे कब्जे दे करी ता था।

यहूदा दे यहोयाकीनो रा राज्य

8 जेबे राजा यहोयाकीन यहूदा दे राज करने लगेया, तेबे से ठारा साला रा था ओर तीन मीन्ने तक यरूशलेम शईरो दे राज करदा रया; तेसरी माया रा नाओं नहुश्ता था, जो यरूशलेम शईरो रे एलनातानो री बेटी थी। 9 तिने ठीक आपणे बाओ जेड़ा से कित्तेया, जो यहोवे री नजरा दे बुरा था।

10 जेबे यहोयाकीम राजा था तेसरे दिना दे बाबेलो रे राजा नबूकदनेस्सरो रे कर्मचारिये यरूशलेम शईरो गे आई की शईर केरी ला। 11 जेबे बाबेलो रे राजा नबूकदनेस्सरो रे कर्मचारी यरूशलेम शईर दे आए ओर तिने से केरी ला, तेबे से राजा आपू तेती आई गा। 12 तेबे यहूदा रा राजा यहोयाकीन आपणी माया, कर्मचारिया, परदाना ओर खुसरेया खे साथे लई की बाबेलो रे राजे गे गया ओर बाबेलो रे राजे आपणे राजो रे आठुए साले तिना खे पकड़ी की लईगा। 13 तेबे तिने यहोवे रे मन्दरो दे ओर राजमईलो दे राखेया दा पूरा तअन तेथा ते निकयाल़ी ला ओर सूईने रे जो पांडे इस्राएलो रे राजा सुलैमाने बणाई की यहोवे रे मन्दरो दे राखे थे, सेयो सारे तिने टुकड़े-टुकड़े करीते, जेड़ा की यहोवे बोलेया था। 14 तेबे से पूरे यरूशलेम शईरो रे लोका खे, मतलब सब परदान, ओर सारे अमीर जो मिली की 10,000 लोक थे ओर सब कारीगर ओर ल्वारा खे बन्दी बणाई की लईगा, एथो तक की आम माणूंआ बीचा ते कंगाल़ा खे छाडी की ओर कोई नि रया। 15 से राजा यहोयाकीनो खे बाबेलो दे लईगा ओर तेसरी माया ओर जवाणसा ओर खुसरेया खे ओर देशो रे बड़े लोका खे बन्दी बणाई की यरूशलेम शईरो ते बाबेलो खे लईगा। 16 कैदिया दे 7,000 तागतबर सिपाई थे ओर 1,000 कारीगर ओर ल्वार थे। सेयो सब वीर ओर युद्ध करने जोगे थे। तिना खे बाबेलो रा राजा बन्दी बणाई की बाबेलो खे लईगा। 17 बाबेलो रे राजे नबूकदनेस्सरे यहूदा रे राजा यहोयाकीनो रे बदले तेसरी जगा पाँदे तेसरा चाचा मत्तन्याह यहूदा रा राजा नियुक्त कित्तेया ओर तेसरा नाओं बदली की सिदकिय्याह राखेया।

यहूदा दे सिदकिय्याह रा राज्य

18 जेबे राजा सिदकिय्याह राज करने लगेया, तेबे से इक्कीया साला रा था ओर यरूशलेम शईरो दे ग्यारा साला तक राज करदा रया; तेसरी माया रा नाओं हमूतल था, जो लिब्ना शईरो दे रणे वाल़े यिर्मयाह री बेटी थी 19 तिने ठीक यहोयाकीमो री चाला पाँदे चली की सेई कित्तेया, जो यहोवे री नजरा रे बुरा था। 20 कऊँकि यहोवे आपणे रोषो रिया बजा ते यरूशलेम शईर ओर सारे यहूदा रे राजेया रे खलाफ ऊई की तिना री एड़ी दशा करिती। अंतो दे तिने सेयो आपू सामणे ते दूर करीते।