2 राजा 2

एलिय्याह रा स्वर्गो खे चकणा

1 जेबे यहोवा नबी एलिय्याह खे बवण्डरो रे जरीये स्वर्गो खे चकणे वाल़ा था, तेबे एलिय्याह ओर एलीशा दोनो साथे-साथे गिलगालो ते चले।

2 तेबे एलिय्याहे एलीशा खे बोलेया, "यहोवा सिर्फ माखे बेतेल शईरो तक पेजोआ, इजी री खातर तूँ एथी रूकेया दा रओ।" एलीशे बोलेया, "यहोवे री ओर तेरी जिन्दगिया री कसम आऊँ ताखे नि छाडी सकदा;" इजी री खातर सेयो दोनो बेतेल शईरो खे चली गे। 3 तेबे बेतेलो दे रणे वाल़े नबीया रे चेले एलीशा गे आई की बोलणे लगे, "क्या ताखे पता ए कि आज यहोवा तेरे स्वामिए खे तांगा गे ते स्वर्गो खे चकणे वाल़ा ए?" तिने बोलेया, "आ, माखे बी ये पता ए, तुसे चुप रओ।"

4 एलिय्याहे तेसखे फेर बोलेया, "ओ एलीशा, यहोवा माखे यरीहो खे पेजणे लगी रा; इजी री खातर तूँ एथी रूकी जा।" तिने फेर बोलेया, "यहोवा ओर तेरी जिन्दगिया री कसम आऊँ ताखे नि छाडी सकदा।" तेबे सेयो दोनो यरीहो खे आए। 5 ओर यरीहो दे रणे वाल़े भविष्यबक्तेया रे चेले एलीशा गे आई की बोलणे लगे, "क्या ताखे पता ए कि आज यहोवा तेरे स्वामिए खे तांगा गे ते स्वर्गो खे चकणे वाल़ा ए?" तिने जबाब दित्तेया, "आ माखे बी पता ए, तुसे चुप रओ।"

6 तेबे एलिय्याहे तेसखे फेर बोलेया, "यहोवा माखे यरदन नदिया तक पेजणे लगी रा, इजी री खातर तूँ एथी रूकी जा।" तिने बोलेया, "यहोवे रे ओर तेरी जिन्दगिया री कसम आऊँ ताखे नि छाडी सकदा।" तेबे सेयो दोनो आगे चली पड़े। 7 ओर भविष्यबक्तेया रे चेलेया बीचा ते पंजा जणे जाई की तिना सामणे दूर जे खड़े ऊईगे ओर सेयो दोनो यरदन नदिया रे कनारे पाँदे खड़े ऊए। 8 तेबे एलिय्याहे आपणी चाद्दर पकड़ी की कट्ठी करी ली ओर पाणिए पाँदे बाई, तेबे पाणी ओरे-पोरे दो इस्सा ऊईगा ओर सेयो दोनो खाली जमीना रिये पार उतरी गे।

9 जेबे सेयो पार पऊँचे तेबे एलिय्याहे एलीशा खे बोलेया, "इजी ते पईले कि परमेशर माखे तांगा गे ते चकी देयो जो कुछ तूँ चाए कि आऊँ तेरिया तँईं करुँ से माँग।" एलीशे बोलेया, "जो आत्मा तांदे ए, तिजी रा दुगणा इस्सा माखे मिली जाओ।" 10 एलिय्याहे बोलेया, "तैं कठण गल्ल मांगी राखी, तेबे बी जे तूँ माखे मेरे चकणे ते बाद देखेगा तो ताखे एड़ा ई ऊणा; नई तो नि ऊणा।" 11 सेयो चलदे-चलदे गल्ला करने लगी रे थे कि अचाणक एक आगी वाल़े रथे ओर आगी वाल़े कोड़ेया सेयो लग-लग करीते ओर एलिय्याह बवण्डरो दे ऊई की स्वर्गो खे चढ़ीगा। 12 ओर तेसखे एलीशा देखदा रया ओर आका पाँदा रया, "हाय, मेरा बाओ! हाय मेरा बाओ! हाय इस्राएलो रे रथ ओर सवारो!" जेबे से तेसखे फेर नि दिशेया, तेबे तिने आपणे टाल्ले फाड़े ओर फाड़ी की दो इस्से करीते। 13 तेबे तिने एलिय्याह री चाद्दर चकी जो तेस पाँदा ते छूटी थी ओर से वापस ऊईगा ओर यरदन नदिया रे कनारे पाँदे खड़ा ऊईगा। 14 तेबे तिने से चाद्दर जो एलिय्याह पाँदा रे छूटी थी, पकड़ी की पाणिए पाँदे बाई ओर बोलेया, "एलिय्याह रा यहोवा परमेशर केई ए?" जेबे तिने से पाणिए पाँदे बाई तो पाणी ओरे-पोरे दो इस्सा ऊईगा ओर एलीशा नदिया ते पार ऊईगा। 15 तेसखे देखी की भविष्यबक्तेया रे चेले जो यरीहो दे तेस सामणे थे, एकी दूजे खे बोलणे लगे, "जो आत्मा एलिय्याह रे थी, सेई एलीशा दे आईगी दी ए।" तेबे सेयो तेस साथे मिलणे खे आए ओर तेस सामणे जमीना दे चूकी की माथा टेकेया। 16 तेबे तिने तेसखे बोलेया, "सुण, तेरे दासा गे पंजा तागतबर मर्द ए, सेयो जाई की तेरे स्वामिए खे टोल़ोगे, क्या पता यहोवे री आत्मे से चकी की केत्ते पाह्ड़ो पाँदे या तराईया दे राखी ता ओ।" तिने बोलेया, "तिना खे नि पेजो।" 17 जेबे तिने एलीशा एथो तक मजबूर करी ता कि से शर्मिंदा ऊईगा, तेबे तिने बोलेया, "पेजी देयो।" तो तिने पंजा मर्द पेजी ते ओर सेयो एलिय्याह तीऊँ दिना तक टोल़दे रये पर से मिलेया नि। 18 से तेस बखतो तक यरीहो दे रूकेया दा रया, जदुए तक सेयो तेसगे वापस नि आए, जेबे सेयो वापस आए तेबे तिने तिना खे बोलेया, "मैं तुसा खे बोलेया था कि नि जाओ।"

एलीशा रे दो नऊखे काम

19 यरीहो शईरो दे रणे वाल़ेया एलीशा खे बोलेया, "देख, ये शईर मनो खे अच्छी लगणे वाल़ी जगा पाँदे बसी रा, जेड़ा मेरा प्रभु देखोआ, पर पाणी बुरा ए ओर जमीना दे बी खरी उपज नि ऊँदी।" 20 तिने बोलेया, "एक नवें ग्लासो रे लूण पाई की मांगे ली आओ।" सेयो तिजी खे तेसगे ली आए। 21 तेबे से पाणिए री सूबल़ा गे गया ओर तिदे लूण पाई की बोलेया, "यहोवा ईंयाँ बोलोआ कि आऊँ एस पाणिए खे ठीक करी देऊँआ, जेते कि से उपज फेर कदी बी खराब नि ऊणी।" 22 एलीशा रे एस वचनो रे मुताबिक पाणी ठीक ऊईगा ओर आजो तक तेड़ा ईए।

23 तेथा ते एलीशा बेतेल शईरो खे गया ओर बाटा री चढ़ाईया रे चलणे लगी रा था कि शईरो ते जवान माठे निकल़ी की तेसरा मजाक करी की बोलणे लगे, "ओ गन्जे ऊबे चढ़ी जा, ओ गन्जे ऊबे चढ़ी जा।" 24 तेबे तिने पीछे नजर करी की तिना खे देखेया ओर यहोवे रे नाओं ते तिना खे स्राप दित्तेया, तेबे जंगल़ो ते दो रीछणिये निकल़ी की तिना बीचा ते बयाल़ी जवान माठे फाड़ी ते। 25 तेथा ते से कर्मेलो खे गया ओर तेथा ते फेर सामरिया शईरो खे वापस ऊईगा।