2 राजा 19

यशायाह रे जरिये छुटकारे री भविष्यबाणी

1 जेबे हिजकिय्याह राजे ये सुणेया, तेबे तिने पश्चाताप ओर शोक प्रकट करने रिया तँईं तेबुई आपणे टाल्ले फाड़े ओर टाट टखी की यहोवे रे मन्दरो दे गया। 2 तेबे तिने एल्याकीम जो राजकराने रे कामो पाँदे परदान था, ओर शेबना मंत्री ओर पुरोईता रे बुजुर्ग, जिने सबी टाट टखी राखी थी, आमोसो रे पाऊ यशायाह भविष्यबक्ते गे पेजी ते। 3 तिने जाई की यशायाह खे बोलेया, "हिजकिय्याह ईंयाँ बोलोआ कि आजका दिन संकट, ल़वामे ओर निंदा रा दिन ए; कऊँकि जेड़ी बच्चा पैदा करने री तागत एक माया दे ओई, से तागत एबे नि रई। 4 आऊँ उम्मीद करूँआ कि तेरा यहोवा परमेशर रबशाके री सारिया गल्ला सुणो, जो तेसरे स्वामिए अश्शूरो रे राजे जिऊँदे परमेशरो री निन्दा करने खे पेजी राखेया ओर जो गल्ला तेरे यहोवा परमेशरे सुणी राखिया, तिना खे बको; इजी री खातर तूँ इना बचे रेया लोका खे जो रई गे रे प्रार्थना कर।"

5 जेबे हिजकिय्याह राजे रे कर्मचारिये यशायाह खे संदेश दित्तेया, 6 तेबे यशायाहे तिना खे बोलेया, "आपणे स्वामिए गे जाई की बोलो, यहोवा ईंयाँ बोलोआ कि जो वचन तैं सुणी राखे, जिना साथे अश्शूर राजे रे माणूंए मेरी निन्दा करी राखी, तिना रिया बजा ते नि डर। 7 सुण, मां तेसरे मनो दे बजा पैदा करनी कि से कोई सन्देश सुणी की आपणे देशो खे वापस ऊई जाओ ओर मां से तेसरे ई देशो रे तलवारा साथे मरवाई देणा।" 8 तेबे रबशाके वापस ऊई की अश्शूरो रा राजा लिब्ना शईरो दे युद्ध करदा ऊआ देखेया, कऊँकि तिने सुणेया था कि से लाकीश शईरो ते चली पड़ी रा। 9 जेबे तिने कूशो रे राजा तिर्हाका रे बारे दे ये सुणेया, "से मां साथे लड़ने खे निकल़ी रा" तेबे तिने आपणे दूत हिजकिय्याह राजे गे ये बोली की पेजे, 10 "तुसे यहूदा रे राजा हिजकिय्याह गे ईंयाँ बोलणा: तेरा परमेशर जेस पाँदे तूँ परोसा राखेया, ये बोली की ताखे तोखा नि देयो कि यरूशलेम शईर अश्शूरो रे राजे रे वशो दे नि पड़ना। 11 देख, तैं तो सुणी राखेया कि अश्शूरो रे राजे सबी देशा साथे क्या करी राखेया ओर तिना रा सत्यानाश करिता। तेबे क्या तूँ बचणा? 12 जिना शईरा या राजेया खे, गोजान, हारान, रेसेपो खे ओर तलस्सार राजधानिया दे रणे वाल़े एदेन जातिया रे लोका खे जेबे मेरे बुजुर्गे नाश कित्तेया था, तेबे क्या तिना रे देवते तिना खे मेरे बुजुर्गा रे आथा ते नाश ऊणे ते बचाई सके थे? 13 हमात ओर अर्पादो रा राजा, ओर सपवैंम शईरो रा राजा ओर हेना ओर इव्वा शईरो रा राजा यो सब केई रये?"

हिजकिय्याह री प्रार्थना

14 ये चिट्ठी हिजकिय्याहे दूता रे आथो ते लई की पढ़ी। चिट्ठिया खे पढ़ने ते बाद हिजकिय्याह राजा यहोवे रे मन्दरो रे जाई की यहोवे रे सामणे से चिट्ठी खोली की राखी ती।

15 ओर हिजकिय्याह यहोवे ते ये प्रार्थना करने लगेया, "ओ इस्राएलो रे यहोवा परमेशर! ओ करूबा पाँदे विराजणे वाल़े! तरतिया रे सबी राजेया पाँदे बस तूँ ई परमेशर ए! सर्ग ओर तरतिया दे जो कुछ बी तैं बणाई राखेया। 16 ओ यहोवा! कान लगाई की सुण, ओ यहोवा आपणिया आखी ते देख ओर सन्हेरीबो रे वचन सुणी ले, जो तिने जिऊँदे परमेशरो री बेज्जती करने खे पेजी राखे। 17 ओ यहोवा, सच तो ये कि अश्शूरो रे राजेया कई जातिया ओर तिना रे देश उजाड़ी राखे। 18 ओर तिना रे देवता आगी रे फूकी राखे, कऊँकि सेयो ईश्वर नि थे; सेयो माणूंआ रे बणाए रे लकड़ी ओर पात्थर ई थे; इजी बजा ते सेयो तिना खे नाश करी सके। 19 इजी री खातर एबे ओ म्हारे यहोवा परमेशर तूँ आसा खे तेसरे आथो ते बचा, ताकि तरतिया रे राज्य-राज्य रे लोक जाणी लो कि बस तूँ ई यहोवा ए।"

20 तेबे आमोसो रे पाऊ यशायाहे हिजकिय्याह गे ये सन्देसा पेजेया, "इस्राएलो रा यहोवा परमेशर ईंयाँ बोलोआ कि जो प्रार्थना तैं अश्शूरो रे राजा सन्हेरीबो रे बारे मांते करी राखी, से मैं सुणी राखी।" 21 सन्हेरीबो रे खलाफ यहोवा ईंयाँ बोलोआ; सिय्योनो रे लोक ताखे तुच्छ जाणोए

ओर तेरा मजाक उडाओए, यरूशलेम शईरो रे लोक, तेरिया पीठी पीछे सिर इलाओए।

22 तुसे तो बेज्जती ओर निन्दा करी राखी, से केसरी करी राखी?

ओर तैं जो बड़ी गल्ल बोली राखी ओर कमण्ड करी राखेया, से केसरे खलाफ करी राखेया?

इस्राएलो रे पवित्रो रे खलाफ तैं करी राखेया!

23 आपणे दूता रे जरीये परमेशरो री निन्दा करी की बोली राखेया कि बऊत सारे रथ लई की आऊँ पाह्ड़ा रिया चूँडिया पाँदे,

बल्कि लबानोनो तक चढ़ी की आई रा

ओर मां तेसरे ऊच्चे-ऊच्चे देवदार ओर ठीक-ठीक सनौबर बाडी देणे

ओर तेथो री जो सबी ते ऊच्ची टिकणे री जगा ऊणी तिदे

ओर तेसरे बणो रे फलो वाल़े बगीचे रे जाणा।

24 मैं तो खणी की परदेसो रा पाणी पिया

ओर मिस्रो री नईरा दे पैर राखदे ई से सुखाई देणा।

25 ओ सन्हेरीब, क्या तैं नि सुणेया कि पुराणे बखतो ते मैं येई ठराई राखेया?

ओर पिछले दिनो ते एतेरी त्यारी कित्ती थी, से मैं एबे पूरा बी करी राखेया,

ताकि तूँ गढ़वाल़े शईर खण्डहर ई खण्डहर करी दे,

26 इजी बजा ते तेती रणे वाल़ेया री तागत कम ऊई;

सेयो कमजोर ओर शर्मिंदा ऊए;

सेयो छोटे-छोटे डाल़, अरा काआ, छतो पाँदला काआ

ओर एड़े नज्जो जेड़े ऊईगे, जो बढ़ने ते पईले ई सूकी जाओआ।

27 आऊँ तो तेरा बैठे दे रणा, चलणा, ओर वापस ऊणा जाणूंआ

ओर ये बी जाणूंआ कि तूँ मां पाँदे आपणा रोष पड़काएया।

28 इजी बजा ते कि तूँ मां पाँदे आपणा रोष पड़काएया

ओर तेरे कमण्डो रिया गल्ला मेरे कानो दे पड़ी रिया;

मां तेरे नाको दे आपणी नकेल पाई की ओर तेरे मुंए दे आपणी लगाम लगाई की,

जेते बाटा रिये तूँ आई रा, तिदे ई तूँ वापस पेजी देणा।

29 तेबे यशायाहे हिजकिय्याह राजे खे बोलेया, ताखे ये नशाण ऊणा कि एते साल तो तुसा से खाणा जो आपणे-आपू जम्मी रे ओर दूजे साल से जो पैदा ऊई रा से खाणा ओर तीजे साले बिऊ बाणे ओर से बाडी सकणा ओर अंगूरा रे बगीचे लगाणे ओर तिना रे फल खाई सकणे। 30 ओर यहूदा रे कराने रे बचे दे लोका फेर जड़ पकड़नी ओर फल़णे बी। 31 कऊँकि यरूशलेम शईरो ते बचे रे ओर सिय्योन पाह्ड़ो ते नठे रे लोक निकल़ने। यहोवे ये काम आपणी जल़ना रिया बजा ते करना। 32 इजी री खातर यहोवा अश्शूरो रे राजे रे बारे ईंयाँ बोलोआ कि से एस शईरो रे नि आई सकणा, बल्कि एक तीर नि बाई सकणा ओर ना ई से एते शईरो रे सामणे ढाल लई की आई सकोआ ओर ना ई एते शईरो रे खलाफ आपणा दबदबा बणाई सकोआ। 33 जेते बाटा रे से आऊणा, तिदे ई से वापस बी ऊई जाणा ओर एते शईरो रे नि आई सकणा, यहोवे री येई बाणी ए। 34 ओर मां आपणिया तँईं ओर आपणे दास दाऊदो रिया तँईं एस शईरो री रक्षा करनी ओर ये बचाणा। 35 तेसा ई राती रे क्या ऊआ कि यहोवे रे दूते निकल़ी की अश्शूरिया रे डेरे 185,000 मर्द काईते ओर प्यागा जेबे लोक उठे, तेबे देखेया कि लाशा ई लाशा पड़ी रिया। 36 तिजी ते बाद अश्शूरो रा राजा सन्हेरीब तेथा ते चली गा ओर वापस ऊई की नीनवे दे रणे लगेया। 37 तेती से आपणे देवता निस्रोको रे मन्दरो रे माथा टेकणे लगी रा था कि अद्रम्मेलेक ओर शरेसेरे से तलवारी साथे काया ओर अरारात देशो खे नठीगे। तेबे तेसरा ई पाऊ एसर्हद्दोन तेसरी जगा पाँदे राज करने लगेया।