1 जेबे अहज्याह री माये अतल्याह देखेया कि तेसा रा पाऊ मरी गा, तेबे तेसे राजे रे परिवारो रे सब लोक काईते। 2 पर यहोशेबा जो राजा योरामो री बेटी ओर अहज्याह री बईण थी, तेसे अहज्याह रा पाऊ योआश दाईया समेत बछौणे राखणे रे कमरे दे लकोईता, ओर तेसे से अतल्याह ते एड़ा लकोईता कि से तेसखे नि काई सकी ओर से जिऊँदा बचीगा। 3 ओर से पाऊ तेसा रिया नजरा ते यहोवे रे मन्दरो दे छे साल तक लूकेया दा रया ओर अतल्याह देशो पाँदे राज करदी रई।

4 सातुए साले यहोयादे करेतिया रे अंगरक्षक ओर पईरेदारा रे परदान बुलाए ओर तिना खे यहोवे रे मन्दरो दे आपू गे ली आया ओर तिना साथे वाचा बानी ओर यहोवे रे मन्दरो दे तिना खे कसम खुल़ाई की, तिना खे राजे रा पाऊ दखाया। 5 तेबे यहोयादे तिना खे आज्ञा दित्ती, "एक काम करो, मतलब तुसा बीचा ते एक तिहाई लोक जो रामो रे दिने आऊणे वाल़े ए, सेयो राजमईलो रा पईरा देओ। 6 ओर एक तिहाई लोक सूर नाओं रे बड़े द्वारो गे ठईरे दे रओ ओर एक तिहाई लोक पईरेदारा रे पिछले बड़े द्वारो गे रओ, ईंयाँ तुसे मईलो री चौकसी करी की लोक रोके दे राखणे; 7 ओर तुसा रे दो दल, मतलब जितणे रामो रे दिने बारे जाणे वाल़े ओ सेयो राजे रे नेड़े-तेड़े ऊई की यहोवे रे मन्दरो री चौकसी करो। 8 तुसे आपणे-आपणे आथो दे अथियार लई की राजे रे चऊँ कनारे रएयो ओर जो कोई अथियार लई की पीतरे कूसणा चाओगा, से काया जाणा ओर तुसे राजे रे आऊँदे-जांदे बखते राजे साथे रएयो।"

9 यहोयादा पुरोईतो री इना सबी आज्ञा रे मुताबिक परदाने कित्तेया। सेयो रामो रे दिने आऊणे वाल़े ओर जाणे वाल़े दुँईं दला दे आपणे-आपणे माणूंआ खे साथे लई की यहोयादा पुरोईतो गे गये। 10 तेबे पुरोईते परदाना खे राजा दाऊदो रे बड़छे ओर ढाला जो यहोवे रे मन्दरो दे थिया देईतिया। 11 इजी ते बाद से पईरेदार आपणे-आपणे आथो दे अथियार लई की मन्दरो रे दक्खणा रे कूणे ते लई की उत्तरा रे कूणे तक बेदी ओर मन्दरो दे राजे रे चऊँ कनारे तेसखे केरी की खड़े ऊए। 12 तेबे तिने राजकुमार बारे ल्याई की तेसरे सिरो पाँदे मुकुट ओर गवाईया री चिट्ठी राखी ती; तेबे लोके तेसरा अभिषेक करी की से राजा बणाईता; तेबे तिने चाड़िया बजाई-बजाई की बोलेया, "राजा जिऊँदा रओ!" 13 जेबे अतल्याह खे पईरेदार ओर लोका रा आल्ला सुणेया, तेबे से तिना गे यहोवे रे मन्दरो दे गई; 14 ओर तेसे क्या देखेया कि राजा रवाजा रे मुताबिक खम्बे गे खड़ी रा ओर राजे रे नेड़े परदान ओर तुरही बजाणे वाल़े खड़े ए। ओर सारे लोक खुशिया मनांदे ऊए तुरहिया बजाणे लगी रे। तेबे अतल्याह आपणे टाल्ले फाड़ी की, "राजद्रोह! राजद्रोह!" बोलदे ऊए ईंयाँ जोरे-जोरे की चींगणे लगी। 15 तेबे यहोयादा पुरोईते दलो रे अधिकारिया खे आज्ञा दित्ती, "एसा खे एथा ते बारे लई जाओ ओर जो कोई एसा पीछे जाओ से तलवारी की काई देणा।" कऊँकि पुरोईते बोलेया, "ये यहोवे रे मन्दरो दे नि काणी।" 16 इजी री खातर तिने तेसा खे दुँईं तरफा ते जगा दित्ती ओर से तेसा बाटा रिये चली गी, जिदे कोड़े राजमईलो दे जाया करो थे ओर से तेती काईती।

17 तेबे यहोयादे यहोवे रे ओर राजा ओर प्रजा बीचे यहोवे री प्रजा ऊणे री वाचा बनाई ओर तिने राजा ओर प्रजा बीचे बी वाचा बनाई। 18 तेबे सबी लोके जाई की बाल देवते रा मन्दर टाल़ी ता ओर तेसरी बेदिया ओर मूर्तिया सब तोड़ी तिया ओर मत्तान नाओं रा बाल देवते रा पुरोईत बेदिया सामणे ई काई ता, ओर पुरोईते यहोवे रे मन्दरो दे अधिकारी ठराईते। 19 तेबे पुरोईत परदान, करेतो दे अंगरक्षक ओर पईरेदारा ओर सबी लोका खे साथे लई की राजे खे यहोवे रे मन्दरो ते थाले लईगा ओर राजा पईरेदारा रे बड़े द्वारो रिया बाटा ते ऊँदे ऊए राजमईलो दे पऊँचाई ता ओर तेबे राजा राजगद्दिया पाँदे बैठेया। 20 तेबे सारे लोक खुश ऊए ओर शईरो दे शान्ति ऊई। अतल्याह तो राजमईलो दे तलवारी साथे काईती थी। 21 जेबे योआश राजा बणेया तेस बखते से साता साला रा था।