1 जेबे राजा योशिय्याह यहूदा प्रदेशो दे राज करने लगेया, तेबे से आठा साला रा था ओर यरूशलेम शईरो दे कत्ती साल तक राज करदा रया। ओर तेसरी माया रा नाओं यदीदा था जो बोस्कत शईरो दे रणे वाल़े अदायाह री बेटी थी। 2 तिने से कित्तेया जो यहोवे री नजरा दे सई आ ओर जेते बाटा दे तेसरा मूलमर्द दाऊद चलेया ठीक तेते पाँदे से बी चलेया ओर तिजी ते ना तो दाँणी तरफा खे ओर ना खूँजी तरफा खे मुड़ेया।

3 आपणे राजो रे ठारूए साले यहूदा रे राजा योशिय्याहे आपणे परदान असल्याह रे पाऊ शापान मंत्री, जो मशुल्लामो रा पोता था, यहोवे रे मन्दरो दे ये बोली की पेजेया, 4 "हिल्किय्याह बड़े पुरोईतो गे जाई की बोल कि जो चाँदी यहोवे रे मन्दरो दे ल्याई राखी ओर द्वारपाले प्रजा ते कट्ठी करी राखी, 5 तिजी खे जोड़ी की तिना काम करने वाल़ेया रे आथो दे सम्बाल़ी देयो, जो यहोवे रे मन्दरो रे काम करने वाल़ेया पाँदे मुखिये चूणी राखे; तेबे सेयो तिजी खे यहोवे रे मन्दरो रे काम करने वाल़ेया कारीगरा खे देओ, ताकि तिदे जो कुछ टूटी-फूटी रा सेयो तेतेरी मरम्मत कराणे रा काम पूरा करो। 6 मतलब मिस्त्रिया, राजमिस्त्रिया ओर तराशणे वाल़ेया खे देयो ओर मईलो री मरम्मत करने खे लकड़ी ओर कअड़े रे पात्थर मोले लणे दे लगाओ।" 7 पर जिना रे आथो दे से चाँदी सम्बाल़ी, तिना ते साअब नि लया, कऊँकि सेयो सच्चाईया साथे काम करो थे।

8 बादो ते हिल्किय्याह बड़े पुरोईते शापान मंत्रिये खे बोलेया, "माखे यहोवे रे मन्दरो दे बिधान री कताब मिली री।" तेबे हिल्किय्याहे शापानो खे से कताब दित्ती ओर से तेतेखे पढ़ने लगेया। 9 तेबे शापान मंत्रिये राजे गे वापस जाई की ये सन्देस दित्तेया, "जो चाँदी मईलो रे मिली, से तेरे कर्मचारिये थैलिया रे पाई की, तिना गे सम्बाल़ी ता जो यहोवे रे मन्दरो रे काम करने वाल़े थे।" 10 फेर शापान मंत्रिये राजे खे ये बताईता, "हिल्किय्याह पुरोईते तेसखे एक कताब देई राखी।" तेबे शापान तिजी खे राजे गे पढ़ी की सुनाणे लगेया। 11 बिधान री तेसा कताबा रिया गल्ला सुणी की राजे आपणे टाल्ले फाड़े। 12 तेबे राजे हिल्किय्याह पुरोईत, शापानो रे पाऊ अहीकाम, मिकायाह रा पाऊ अकबोर, शापान मंत्री ओर असायाह नाओं रे आपणे एकी कर्मचारिये खे आज्ञा दित्ती, 13 तिने बोलेया, "ये कताब जो मिली री, तिजी रे बारे तुसे जाई की मेरी ओर प्रजा री ओर सारे यहूदिया रिया तरफा ते यहोवे ते पूछो, कऊँकि यहोवे री बड़ी पारी जल़न आसा पाँदे इजी खे पड़की री, कऊँकि म्हारे बुजुर्गे एसा कताबा री गल्ल नि मानी कि कुछ आसा खे लिखी राखेया, तेतेरे मुताबिक करूँए।"

14 हिल्किय्याह पुरोईत, ओर अहीकाम, अकबोर, शापान ओर असायाहे हुल्दा नबिया गे जाई की तेसा साथे गल्ला कित्तिया, से तेस शल्लूमो री लाड़ी थी जो तिकवा रा पाऊ ओर हर्हसो रा पोता ओर टाल्लेया रा रखवाल़ा था, ओर से जवाणस यरूशलेम शईरो री नयी टोलिया रे रओ थी।

15 जेबे दूत तेती आए तेबे हुल्दे तिना खे बोलेया, "इस्राएलो रा यहोवा परमेशर ईंयाँ बोलोआ कि जिने माणूंए तुसे मांगे पेजी राखे, तेसखे ईंयाँ बोलो, 16 यहोवा ईंयाँ बोलोआ कि सुण, जो कताब यहूदा रे राजे पढ़ी राखी, तेसरिया सारिया गल्ला रे मुताबिक आऊँ एते जगा पाँदे ओर एथो रे रणे वाल़ेया पाँदे मुसीबत पाणा चाऊँआ। 17 तिने लोके आऊँ त्यागी की पराये देवतेया खे खुश करने रिया तँईं तिना खे तूप बाल़ेया ओर आपणी बणाई रिया सबी चीजा रे जरीये माखे रोष दलाया, इजी बजा ते मेरी जल़न एते जगा पाँदे पड़कणी ओर फेर शान्त नि ऊणी। 18 पर यहूदा रा राजा जिने तुसे यहोवे ते पूछणे खे पेजी राखे, तेसखे तुसे ईंयाँ बोलो कि इस्राएलो रा यहोवा परमेशर ईंयाँ बोलोआ, 19 इजी खे कि तूँ तिना गल्ला खे सुणी की दीन ऊआ ओर मेरी तिना गल्ला खे सुणी की एसा जगा खे ओर एथो रे रणे वाल़ेया खे देखी की लोक हैरान ऊणे ओर तिना स्राप देया करना, तैं यहोवे सामणे आपणा सिर चुकाया ओर आपणे टाल्ले फाड़ी की मां सामणे रोया, इजी बजा ते मैं तेरी सुणी, यहोवे री ये बाणी ए। 20 इजी री खातर देख, मां एड़ा करना कि तूँ मरी जाणा ओर तूँ शान्तिया साथे आपणी कब्रा दे पऊँचाया जाणा ओर जो मुसीबत आऊँ एते जगा दे पाणा चाऊँआ, तेते बीचा ते तां आपणिया आखी ते कुछ नि देखणा।" तेबे तिने वापस ऊई की राजे खे येई सन्देस दित्तेया।