2 राजा 18

हिजकिय्याह रे राज्य री शुरूआत

1 एला रे पाऊ इस्राएलो रे राजा होशे रे राजो रे तीजे साले यहूदा रे राजा आहाजो रा पाऊ हिजकिय्याह राजा बणेया। 2 जेबे हिजकिय्याह यहूदा पाँदे राज करने लगेया था, तेबे से पच्चीया साला रा था ओर ऊणत्तिया साला तक यरूशलेम शईरो दे राज करदा रया। तेसरिया माया रा नाओं अबी था, जो जकर्याह री बेटी थी।

3 जेड़ा तेसरे मूलमर्द दाऊदे कित्तेया था जो यहोवे री नजरा रे सई था, तेड़ा ई तिने बी कित्तेया। 4 तिने ऊच्ची जगा टाल़ी तिया, पात्थरा रिया मूर्तिया तोड़ी तिया अशेरा देविया री मूर्तिया तोड़ी तिया। पीतल़ी रा जो साप मूसे बणाया था, से तिने इजी बजा ते चूर-चूर करी ता, कऊँकि तेस बखतो तक इस्राएली तेसगे तूप बाल़ो थे ओर तिने तेसरा नाओं नहुशतान राखेया था। 5 से इस्राएलो रे परमेशर यहोवे पाँदे परोसा राखो था। यहूदा रे राजेया दे तेसते पईले या तेसते बाद हिजकिय्याह जेड़ा यहोवे पाँदे परोसा राखणे वाल़ा कोई राजा नि था। 6 ओर से यहोवे साथे लिपटेया दा रया ओर तेस पीछे चलणा नि छाडेया ओर जो आज्ञा यहोवे मूसे खे दित्ती थिया, से तिना खे मानो था। 7 इजी री खातर यहोवा तेस साथे तेसरी मताद करने खे रया करो था, ओर तेती तेसरा काम सफल ओ था। तिने अश्शूरो रे राजे साथे बगावत करी की तेसरी सेवा करना छाडी ती। 8 राजा हिजकिय्याहे लगातार गाजा ओर तेतेरे चऊँ कनारले पलिश्ती लोक अराईते। तिने सारे छोटे ते लई की बड़े पलिश्तिया रे शईर अराईते।

9 राजा हिजकिय्याह रे चौथे सालो दे जो एला रे पाऊ इस्राएलो रे राजा होशे रे राजो रा सातुआ साल था, अश्शूरो रे राजा शल्मनेसेरे सामरिया पाँदे अमला करी की से केरी ता। 10 ओर तीन साल बीतणे ते बाद तिने से लई ला। ईंयाँ हिजकिय्याह रे छठुए साले जो इस्राएलो रे राजा होशे रे राजो रा नऊआ साल था, सामरिया शईर लई ला। 11 तेबे अश्शूरो रा राजा इस्राएली लोका खे बन्दी बणाई की अश्शूर देशो दे लईगा ओर तिने सेयो हलह शईरो रे गोजान जगा दे हाबोर नदिया गे ओर मादिया रे शईरो दे सेयो बसाईते। 12 इजी री बजा ए थी कि इस्राएलिये आपणे परमेशर यहोवे री गल्ल नि मानी, बल्कि तेसरी वाचा तोड़ी ओर जितणी आज्ञा यहोवे रे दास मूसे दित्तिया थिया, सेयो टाल़ी तिया ओर ना सेयो सुणिया ओर ना तिना रे मुताबिक कित्तेया।

अश्शूरो रा यरूशलेम शईरो पाँदे अमला करना

13 हिजकिय्याह राजे रे राजो रे चौदुए सालो दे अश्शूरो रे राजे सन्हेरीबे यहूदा रे सब गढ़वाल़े शईरा पाँदे अमला करी की सेयो लई ले। 14 तेबे यहूदा प्रदेशो रे राजा हिजकिय्याहे अश्शूरो रे राजा लाकीशो गे सन्देसा पेजेया, "मांते अपराध ऊई रा, मांगा गे ते वापस ऊई जा। ओर जो पार तां मां पाँदे लादणा से मां चकणा।" तेबे अश्शूरो रे राजे यहूदा रे राजा हिजकिय्याह ते 10,000 किलो चाँदी ओर 1,000 किलो सूईना मांगेया। 15 तेबे जितणा चाँदी यहोवे रे मन्दर ओर राजमईलो रे पण्डारा दे मिलेया, से सारा राजा हिजकिय्याहे तेसखे देईता। 16 तेस बखते हिजकिय्याहे यहोवे रे मन्दरो रे दरवाजेया ते ओर तिना खम्बेया ते बी जिना पाँदे यहूदा रे राजा हिजकिय्याहे सूईना मढ़वाया था, सूईना छीली की अश्शूरो रे राजे खे देईता। 17 तेबे बी अश्शूरो रे राजे आपणे अधिकारिया रे मुखिया तर्त्तान, रबसारीस ओर रबशाके*18:17 रबशाके सेना रा बड़ा अधिकारी खे बड़ी सेना देई की, लाकीश शईरो ते यरूशलेम शईरो गे हिजकिय्याह राजे रे खलाफ पेजी ते। तेबे सेयो यरूशलेम शईरो खे गये ओर तेथी पऊँची की पाँदे पोखरे री नाल़िया गे तोबिया रे डोरूआ री सड़का गे जाई की खड़े ऊए। 18 जेबे तिने राजे खे आका पाईया, तेबे हिल्किय्याह रा पाऊ एल्याकीम जो राजकराने रे कामो पाँदे था ओर शेबना जो मंत्री था ओर आसापो रा पाऊ योआह जो इतिआसो खे लिखणे वाल़ा था, यो तीनो तेसगे बारे निकल़ी गे। 19 तेबे रबशाके तिना खे बोलेया, "हिजकिय्याह खे बोलो कि महाराजाधिराज, मतलब अश्शूरो रा राजा ईंयाँ बोलोआ कि तूँ केस पाँदे परोसा राखेया? 20 तूँ जो बोलेया कि मांगे एती युद्ध करने खे योजना ओर वीरता ए, से तो बस गल्ल ई गल्ल ए। तूँ केस पाँदे परोसा राखेया कि तैं मां साथे बगावत कित्ती? 21 सुण, तूँ तो तेस मिस्रो री सेना पाँदे परोसा राखेया जो टूटीया दिया लकड़िया जेड़ा ए, जो कोई तेसरा टासणा लओ, तो तेस तेसरे आथो रे चूबी की से कोरी देणा। मिस्रो रा राजा फिरौन आपणे सब परोसा राखणे वाल़ेया खे एड़ा ईए। 22 फेर जे तूँ माखे बोले कि म्हारा परोसा आपणे परमेशर यहोवे पाँदे ए, तो क्या से सेई नि ए जेसरी ऊच्ची जगा ओर बेदिया खे हिजकिय्याहे दूर करी की यहूदा ओर यरूशलेम शईरो खे बोलेया कि तुसे एसा बेदिया सामणे जो यरूशलेम शईरो दे ए माथा टेकणा? 23 तो एबे मेरे‍ स्वामी अश्शूरो रे राजे गे कुछ बन्दुआ राख, तेबे मां ताखे 2,000 कोड़े देणे, जे तूँ इना कोड़ेया पाँदे सवारी करने खे सवार टोल़ी सके! 24 फेर तूँ मेरे स्वामिए रे छोटे-ते छोटे सेनापतिये खे किंयाँ अराई सकेया? तेबे तूँ कऊँ रथ ओर सवारा रिया तँईं मिस्रो पाँदे परोसा राखेया? 25 क्या मैं यहोवे रे बिना बोले, एसा जगा खे उजाड़ने खे अमला करी राखी? यहोवे माखे बोली राखेया कि तेस देशो पाँदे अमला करी की तेस उजाड़ी दे।" 26 तेबे हिल्किय्याह रे पाऊ एल्याकीम ओर शेबना योआहे रबशाके खे बोलेया, "आपणे दासा साथे अरामी पाषा दे गल्ला कर, कऊँकि आसे तेसा समजूँए ओर आसा साथे यहूदी पाषा दे दवाला पाँदे बैठे दे लोका रे सुणदे ऊए गल्ला नि कर।" 27 रबशाके तिना खे बोलेया, "क्या मेरे स्वामिए आऊँ तुसा रे स्वामिए गेई या तुसा गेई इना गल्ला करने खे पेजी राखेया? क्या तिने आऊँ तिना लोका गे नि पेजेया, जो दवाला पाँदे बैठी रे, ताकि तुसा साथे तिना खे बी आपणा गू खाणा पड़ो ओर आपणा पशाब पीणा पड़ो?"

28 तेबे रबशाके खड़े ऊई की यहूदी पाषा रे जोरे की बोलेया, "महाराजाधिराज मतलब अश्शूरो रे राजे री गल्ल सुणो। 29 राजा ईंयाँ बोलोआ कि हिजकिय्याह तुसा खे तोखा नि देओ, कऊँकि से तुसा खे मेरे आथो ते नि बचाई सकदा। 30 ओर से तुसा ते ये बोली की यहोवे पाँदे परोसा नि कराओ कि यहोवे आसे पक्का बचाणे ओर ये शईर अश्शूरो रे राजे रे वशो दे नि पड़ना। 31 हिजकिय्याह री नि सुणो। अश्शूरो रा राजा बोलोआ कि पेंट पेजी की माखे खुश करो ओर मांगे निकल़ी की आओ ताकि हर एक आपणे-आपणे अंगूर ओर दाऊगल़े रे डाल़ो रे फल खांदा ओर आपणे-आपणे कुण्डो रा पाणी पींदा रओ। 32 तेबे मां आई की तुसे एड़े देशो दे लई जाणे, जो तुसा रे देशो जेड़ा नज्ज ओर नया शराबो रा देश, रोटी ओर अंगूरा रे बगीचे रा देश, जैतूनो रा तेल ओर सयीतो रा देश ए, तेती तुसे मरने नि, जिऊँदे रणे; तेबे जेबे हिजकिय्याह तुसा खे ये बोली की बह्ईकाओ कि यहोवे आसे बचाणे, तेबे तेसरी नि सुणनी। 33 क्या ओरी जातिया रे देवते आपणा-आपणा देश अश्शूरो रे राजे रे आथो ते कदी बचाया? 34 हमात ओर अर्पाद राजो रे देवता केई रये? सपवैंम, हेना ओर इव्वा शईरा रे देवता केई गये? सामरी शईरो रे देवता केई गये? क्या सेयो मेरे आथो ते सामरी शईरो खे बचाई सके? 35 सबी देशा रे देवतेया बीचे एड़ा कुण ए, जिने मेरे आथो ते आपणा देश बचाई राखेया ओ? तो क्या यहोवा यरूशलेम शईरो खे मांते बचाई सकोआ?" 36 पर सारे लोक चुप रये ओर तेसखे ज्वाबो दे एक बी गल्ल नि बोली, कऊँकि राजे री एड़ी आज्ञा थी कि तेसखे ज्वाब नि देणा। 37 तेबे हिल्किय्याह रा पाऊ एल्याकीम जो राजकराने रे कामो पाँदे था ओर शेबना जो मंत्री था ओर आसापो रा पाऊ योआह जो इतिआसो खे लिखणे वाल़ा था, आपणे टाल्ले फाड़ी कि हिजकिय्याह गे जाई की रबशाके रिया गल्ला सुणाईयां।