1 अहाबो रे सत्तर पाऊ, पोते सामरिया शईरो दे रओ थे। तेबे येहूए सामरिया दे तिना बुजुर्गा गे ओर जो यिज्रेलो रे परदान थे ओर जो अहाबो रे बच्चेया खे पाल़ने वाल़े थे, तिना खे चिट्ठी लिखी की पेजी, 2 तेते चिट्ठिया दे ये लिखी राखेया था, "तुसा रे स्वामिए रे पाऊ, पोते तो तुसा गे रओए ओर तुसा गे रथ ओर कोड़े बीए ओर तुसा रा एक गढ़ वाल़ा शईर ओर अथियार बीए; तो जेबे तुसा खे ये चिट्ठी मिलोगी, 3 तो आपणे स्वामिए रे पाऊआ बीचा ते जो सबी ते सई ओर काबिल ओ, तेसखे छाँटी की तेसरे बाओ री गद्दिया पाँदे बठयाल़ी देयो ओर आपणे स्वामिए रे कराने रिया तँईं लड़ो।" 4 पर सेयो बऊत डरी गे ओर बोलणे लगे, "तेस सामणे दो राजे पनि ठईरी सके, तेबे आसे किंयाँ ठईरी सकूँए?" 5 तेबे जो राजकराने रे कामो पाँदे था ओर जो शईरो पाँदे था, तिने ओर बुजुर्गे ओर बच्चेया खे पाल़ने वाल़ेया येहूए गे ये सन्देसा पेजेया, "आसे तेरे दास ए, जो कुछ तूँ आसा खे बोले, से आसा करना; आसा कोई राजा नि बनाणा, जो ताखे अच्छा लगो सेई कर।" 6 तेबे तिने दूजी चिट्ठी लिखी की तिना गे पेजी, "जे तुसे मेरी तरफा खे ए ओर मेरी मानो, ओर आपणे स्वामिए रे बच्चेया ओर पोतेया रे सिर बाडी की काल एस ई बखतो तक मांगे यिज्रेलो दे आजीर ऊई जाएयो।" राजे रे परिवारो रे जो सत्तर माणूं थे, सेयो तेस शईरो रे अमीरा गे पल्ल़ो थे। 7 ये चिट्ठी तिना खे मिलदे ई तिने सेयो सत्तर राजकुमार पकड़ी की काईते ओर तिना रे सिर टोकरिया दे राखी की यिज्रेलो दे येहूए गे पेजी ते। 8 जेबे एकी दूते तेसगे जाई की बताईता, "राजकुमारा रे सिर आईगे रे।" तेबे तिने तिना खे बोलेया, "तिना खे बड़े द्वारो गे दो टेर करी की प्यागा तक राखी देयो।"

9 प्यागा येहू बारे निकल़ेया ओर लोका सामणे खड़ा ऊआ। तिने लोका खे बोलेया, "तुसे तो निर्दोष ए, मैं आपणे स्वामिए साथे राजद्रोह री साजिश करी की से काई ता, पर यो सारे किने काये? 10 एबे जाणी लो कि यहोवे जो कुछ बी अहाबो रे कराने रे बारे दे बोलेया था, से सब तेस पूरा करना; जो वचन यहोवे आपणे दास एलिय्याह रे जरीये बोलेया था, से तिने पूरा कित्तेया।" 11 येहूए अहाबो रे कराने दे जितणे लोक यिज्रेल शईरो दे रई गे थे सेयो सब काईते। तिने तेती अहाबो रे सारे परदान मर्द, दोस्त ओर पुरोईत बी काईते। तिने कोई बी जिऊँदा नि छाडेया।

12 तेबे येहू तेथा ते चली की सामरिया शईरो दे गया ओर बाटा दे गवाल़े री ऊन कतरने वाल़ी जगा दे पऊँचेया ई था, 13 कि यहूदा रे राजा अहज्याह रे पाई येहूए खे मिले ओर जेबे यहूए तिना ते पूछेया, "तुसे कुण ए?" तेबे तिने ज्वाब दित्तेया, "आसे अहज्याह रे पाई ए ओर राजकुमार ओर राजमाता रे पाऊआ रा सुख-साँद लणे खे चली रे।" 14 तेबे तिने बोलेया, "इना खे जिऊँदे पकड़ो।" तेबे तिने सेयो जो बयाल़ी मर्द थे, जिऊँदे पकड़े ओर ऊन कतरने वाल़ी जगा बेत-एकेदो दे काईते। तिने तिना बीचा ते कोई नि छाडेया।

15 जेबे से तेथा ते चलेया, तेबे रेकाबो रा पाऊ यहोनादाब सामणे ते आऊँदा ऊआ तेसखे मिलेया। तेसरा सुख-साँद पूछी की तिने बोलेया, "मेरा मन तेरिया तँईं पूरी तरआ ते ईमानदार ए, तो क्या तेरा मन बी तेड़ा ई ए?" यहोनादाबे बोलेया, "आ, एड़ा ई ए।" तेबे तिने बोलेया, "एड़ा ओ, तो आपणा आथ माखे दे।" तिने आपणा आथ तेसखे दित्तेया ओर से ये बोली की तेसखे आपणे रथो दे चढ़ाणे लगेया, 16 मां साथे चल ओर देख कि माखे यहोवे रिया तँईं केड़ी जल़न रओई। तेबे से तेसरे रथो पाँदे चढ़ीगा। 17 सामरिया दे पऊँची की तिने यहोवे रे तेस वचनो रे मुताबिक जो तिने एलिय्याह खे बोलेया था, अहाबो रे जितणे सामरिया दे बची रे थे, सेयो सारे काई की नाश करीते।

18 तेबे येहूए सारे लोक कट्ठे करी की बोलेया, "अहाबे तो बाल देवते री थोड़ी जी ई आराधना कित्ती थी, एबे येहूए तेसरी आराधना ओर बी जादा करनी। 19 इजी री खातर एबे बालो रे सबी नबिया, सबी उपासका ओर सबी पुरोईता खे मांगे बुलाई की ल्याओ, तिना बीचा ते कोई पनि रओ; कऊँकि बाल देवते खे मेरा एक बड़ा यज्ञ ऊणे वाल़ा ए; जो कोई नि आओगा, से जिऊँदा नि बचणा।" येहूए ये काम कपट करी की बाल देवते री आराधना करने वाल़ेया सबी रा नाश करने खे कित्तेया। 20 तेबे येहूए बोलेया, "बाल देवते री एक पवित्र सभा रा प्रचार करो।" तेबे लोके प्रचार कित्तेया। 21 येहूए सारे इस्राएलो दे दूत पेजे; तेबे बाल देवते रे सारे पूजा करने वाल़े आए, एथो तक कि एड़ा कोई नि रई गा जो नि आया ओ। सेयो बाल देवते रे मन्दरो रे इतणे आए कि से एकी सिरे ते दूजे सिरे तक परी गा। 22 तेबे तिने तेस माणूंए खे जो टाल्लेया रे कअरो रा अधिकारी था, बोलेया, "बालो रे सबी पूजा करने वाल़ेया खे टाल्ले निकयाल़ी की ल्याओ।" तेबे से तिना खे टाल्ले निकयाल़ी की ली आया। 23 तेबे येहू रेकाबो रे पाऊ यहोनादाबो खे साथे लई की बालो रे मईलो रे गया ओर बालो रे उपासका खे बोलेया, "टोल़ी की देखो, कि एती तुसा साथे यहोवे रा कोई पुरोईत तो नि ए, बस बालो रेई पूजा करने वाल़े ए।" 24 इजी ते बाद सेयो मेलबलि ओर होमबलि चढ़ाणे खे पीतरे गये। येहूए अस्सी मर्द बारे ठराई की तिना खे बोलेया था, "जे तिना माणूंआ खे जिना खे आऊँ तुसा रे आथो दे करी देऊँ, कोई बी जिऊँदा बचोगा, तो जो तेसखे जिऊँदा छाडी की जाणे देओगा, तो तेसरे प्राणो रे बदले जिने से जिऊँदा छाडी राखेया से काया जाणा।" 25 तेबे जेबे से होमबलि चढ़ाई चुकेया, तेबे येहूए पईरेदार ओर अधिकारिया खे बोलेया, "पीतरे जाई की तिना खे काई देयो; कोई बची की निकल़ी नि सको।" तेबे तिने सेयो तलवारी साथे काईते ओर तिने सेयो बारे सेटी की बालो रे मन्दरो दे शईरो खे गये। 26 तिने बालो रे मन्दरो रिया मूर्तिया बारे काडी की फूकी तिया। 27 ओर बालो रिया मूर्तिया तिने तोड़ी तिया ओर बालो रा मन्दर टाल़ी की तेते जगा दे शौचालय बणाईता ओर तेती आजो तक शौचालय ई ए। 28 ईंयाँ येहूए बाल देवते रिया मूर्तिया इस्राएलो ते नाश करी की दूर करी तिया। 29 तेबे बी येहू नबातो रा पाऊ यारोबाम रे तेस पापो ते आपू खे पूरी तरआ ते बचाई नि सकेया, जिने इस्राएलो ते पाप कराया था, मतलब बेतेल ओर दानो दे सूईने रे बाच्छूए री मूर्तिया नाश नि कित्तिया। 30 यहोवे येहूए खे बोलेया, "इजी खे कि तैं से कित्तेया, जो मेरी नजरा दे ठीक ए ओर अहाबो रे कराने साथे मेरी इच्छा रे मुताबिक सई बर्ताव कित्तेया, तेरे पड़पोते रे पाऊआ तक तेरी ल्वाद इस्राएलो री गद्दिया पाँदे बैठदी रणी।"

31 पर राजा येहूए इस्राएलो रे परमेशर यहोवे रे बिधानो पाँदे पूरे मनो ते चलणे री चौकसी नि कित्ती, बल्कि यारोबाम जिने इस्राएलो ते पाप कराया था, तेसरे पापो रे मुताबिक करने ते से लग नि ऊआ। 32 तिना दिना रे यहोवा इस्राएलो रे बने खे कटाणे लगेया, इजी री खातर हजाएले इस्राएलो रे तिना सारे देशा रे सेयो काये: 33 यरदन नदिया ते पूर्वो रिया तरफा खे गिलादो रा सारा देश, गादी ओर रूबेनी ओर मनश्शेई रा देश, मतलब अरोएर ते लई की जो अर्नोनो री तराईया गे ए, गिलाद ओर बाशानो तक। 34 सेयो सब बड़े काम जो येहूए कित्ते, ओर तेसरी सारी वीरता, ये सब इस्राएलो रे राजेया रे इतिआसो री कताबा दे लिखी राखे। 35 येहू मरीगा ओर से तेसरे बुजुर्गा साथे सामरिया शईरो दे कब्रा दे दबाईता। तेसते बाद तेसरा पाऊ यहोआहाज तेसरी जगा पाँदे नवां राजा बणी गा। 36 येहूए सामरिया दे इस्राएलो पाँदे ठाई साला तक राज कित्तेया।