2 राजा 8

शूनेमो री जवाणसा री जमीना रा वापस लणा

1 जेसा जवाणसा रा पाऊ एलीशे जिऊँदा कित्तेया था, तेसा खे तिने बोलेया था कि आपणे कराने समेत एथा ते जाई की जेती केथी दूर रई सके तेती रओ; कऊँकि यहोवे री इच्छा ए कि अकाल़ पड़ो ओर से अकाल़ एते देशो दे साता साला तक पड़ेया दा रणा। 2 परमेशरो रे पग्तो रे एस वचनो रे मुताबिक से जवाणस आपणे कराने समेत पलिश्तिया रे देशो दे साता साला तक रई। 3 जेबे सात साल बीतीगे तेबे से पलिश्तिया रे देशो ते वापस आईगी ओर आपणी जमीन ओर कअरो रिया तँईं राजे गे गई ओर दुहाई देणे लगी। 4 राजा तेस बखते परमेशरो रे पग्तो रे सेवक गेहजिये साथे गल्ला करने लगी रा था ओर तिने बोलेया, "जो बड़े-बड़े काम एलीशे करी राखे, तिना मांगे बता।" 5 जेबे से राजे गे बताणे लगी रा था, कि एलीशे एक मुड़दा जिऊँदा कित्तेया था, तेस ई बखते से जवाणस राजे गे आई जेसारा पाऊ तिने जिऊँदा कित्तेया था। से चाओ थी कि राजा तेसारे कअर ओर जमीना खे तेसा खे दलाणे खे मताद करो। तेबे गेहजी बोलणे लगेया, "ओ मेरे प्रभु! ओ राजा! ये सेई जवाणस ए ओर येई एसा रा पाऊ ए जो एलीशे जिऊँदा कित्तेया था।" 6 जेबे राजे जवाणसा ते पूछेया, तेबे तेसे तेसखे सब कुछ बताईता। तेबे राजे एक परदान बुलाई की तेसा साथे पेजीता कि जो कुछ एसा रा था, बल्कि जदुओ ते एसे देश छाडेया, तदुओ ते जितणी आऊँदणी आजो तक ऊई री सब एसा खे वापस करी देयो।

एलीशा ओर अरामो रा राजा

7 कुछ दिना बाद एलीशा दमिश्को खे गया। ओर जेबे अरामो रे राजे बेन्हददो खे जो बमार था ये सन्देश मिलेया "कि परमेशरो रा पग्त एती बी आई रा," 8 तेबे राजे हजाएल नाओ रे आपणे कर्मचारिये खे बोलेया, "पेंट लई की परमेशरो रे पग्तो साथे मिलणे खे जा ओर तेसरे जरीये यहोवे ते ये पूछ कि क्या बेहन्दद जो बमार ए से बचणा कि नई?" 9 तेबे हजाएल पेंटा खे दमिश्को रिया सारिया खरिया-खरिया चीजा बीचा ते चाल़ी ऊँट लदवाई की, तेस साथे मिलणे खे गया ओर तेस सामणे खड़े ऊई की बोलणे लगेया, "तेरे परोसे जोगे सेवक अरामो रे राजा बेन्हददे आऊँ तांते ये पूछणे खे पेजी राखेया कि क्या आऊँ जो बमार ए तो बचणा कि नई?" 10 एलीशे तेस कर्मचारिये खे बोलेया, "जाई की बोली दे कि तूँ पक्का एते बमारिया ते ठीक ऊई सको था, पर तेबे बी यहोवे मांगे बताई राखेया कि तूँ पक्का मरी जाणा।"

11 ओर से तेसरी तरफा खे देखदा ई रईगा, एथो तक की से शर्मिंदा ऊआ ओर परमेशरो रा पग्त एलीशा रोणे लगेया। 12 तेबे हजाएले पूछेया, "मेरा प्रभु कऊँ रोणे लगी रा?" तिने ज्वाब दित्तेया, "इजी री खातर कि माखे पता ए कि तां इस्राएली लोका पाँदे क्या-क्या उपद्रव करने; तिना रे गढ़वाल़े शईर तां फूकी देणे, तिना रे जवान तां तलवारी साथे काणे, तिना रे बाल-बच्चे तां थाले पटकणे ओर तिना रिया गर्भवती जवाणसा तां चीरी देणियां।" 13 हजाएले बोलेया, "तेरा दास जो कुत्ते जेड़ा ए, से क्या ए कि एड़ा बड़ा काम करो?" एलीशे बोलेया, "यहोवे मांगे बताई राखेया कि तूँ अरामो रा राजा बणी जाणा।" 14 तेबे से एलीशा ते बिदा ऊई की आपणे स्वामिए गे गया ओर तिने तेसते पूछेया, "एलीशे तांगे क्या बोलेया?" तिने ज्वाब दित्तेया, "तिने मांगे बोलेया कि बेन्हदद जरूर बची जाणा।" 15 दूजे दिने तिने रज्जाई पाणिए साथे सेड़ी ती ओर तेसरे मुंए पाँदे एड़ी टखाई ती कि से मरी गा। तेबे हजाएल तेसरी जगा पाँदे राजा बणीगा।

यहूदा दे यहोरामो रा राज

16 इस्राएलो रे राजा अहाबो रे पाऊ योरामो रे राज्य रे पाँजुए सालो दे, जेबे यहूदा रा राजा यहोशापात जिऊँदा था, तेबे यहोशापातो रा पाऊ यहोराम यहूदा पाँदे राज करने लगेया। 17 जेबे से राजा बणेया, तेबे बत्तिया साला रा था ओर आठा साला तक यरूशलेम शईरो दे राज करदा रया। 18 से इस्राएलो रे राजेया जेड़ा बुराई करदा रया, जेड़ा अहाबो रा कराना करो था, कऊँकि तेसरी लाड़ी अहाबो री बेटी थी; ओर से तेड़े काम करो था जो यहोवे री नजरा दे बुरा था। 19 तेबे बी यहोवे यहूदा नाश नि कित्तेया, कऊँकि तिने आपणे दास दाऊदो ते वादा कित्तेया था कि तेसरे परिवारो रा कोई ना कोई सदा राजा ऊणा। 20 तेसरे दिना दे एदोमे यहूदा रे खलाफ ऊई की आपणा एक राजा बणाई ला। 21 तेबे योराम आपणे सारे रथ साथे लई की साईर शईरो खे गया ओर राती उठी की सेयो एदोमी जिने से केरी राखेया था, तिने रथो रे परदान बी काईते ओर लोक आपणे-आपणे डेरेया खे नठीगे। 22 ईंयाँ एदोम यहूदा रे वशो ते छूटीगा ओर आजो तक एड़ा ईए। तेस बखते लिब्ना बी यहूदा रे खलाफ ऊई की तेसते लग ऊईगा। 23 यहूदा रे राजा योरामो रे ओर सारे काम ओर जो कुछ तिने कित्तेया, से सब यहूदा रे राजेया रे इतिआसो री कताबा दे लिखी राखे। 24 तेबे योराम मरीगा ओर से तेसरे बुजुर्गा बीचे दाऊदो रे शईरो दे दबाईता ओर तेसरा पाऊ अहज्याह तेसरी जगा पाँदे राज करने लगेया।

यहूदा दे अहज्याह रा राज्य

25 अहाबो रे पाऊ इस्राएलो रे राजा योरामो रे बारूए साले यहूदा रे राजा यहोरामो रा पाऊ अहज्याह राज करने लगेया। 26 जेबे अहज्याह राजा बणेया तेबे से बाईया साला रा था ओर तिने यरूशलेम शईरो रे एक ई साल राज कित्तेया। ओर तेसरी माया रा नाओं अतल्याह था, जो इस्राएलो रे राजा ओम्रीये री पोती थी। 27 से अहाबो रे कराने री जी चाल चलेया ओर तिने अहाबो रे कराने जेड़े काम कित्ते, जो यहोवे री नजरा रे बुरे थे, कऊँकि से अहाबो रे कराने रा जवांई था। 28 तेबे से अहाबो रे पाऊ योरामो साथे गिलाद इलाके रे रामोत शईरो दे अरामो रे राजा हजाएलो साथे लड़ने खे गया ओर अरामिये योराम कायल करी ता। 29 राजा योराम इजी खे वापस ऊईगा, ताकि यिज्रेलो दे तिना जख्मा रा लाज कराओ, जो तेसखे अरामिया रे आथो ते तेस बखते लगे, जेबे से हजाएलो साथे रामोतो दे लड़ने लगी रा था। ओर अहाबो रा पाऊ योराम तो यिज्रेलो रे बमार था, इजी बजा ते यहूदा रे राजा यहोरामो रा पाऊ अहज्याह तेसखे देखणे खे गया।