1 तेबे एलीशे राजे खे बोलेया, "यहोवे रा वचन सुणो, यहोवा ईंयाँ बोलोआ कि काल एस ई बखते सामरिया शईरो रे बड़े द्वारो दे लगभग तीन किलो आटा एक चाँदिए रे सिक्के दे ओर छे किलो जौ बी एक चाँदिए रे सिक्के दे बिकणे।" 2 तेबे तिने सरदारे जो राजे रा परोसे वाल़ा था, परमेशरो रे पग्त एलीशा खे ज्वाब देई की बोलेया, "सुण, चाए यहोवा सर्गो रे चरोखे बी खोली देयो, तेबे बी एड़ा नि ऊई सकदा।" एलीशे तेसखे बोलेया, "सुण, तां ये आपणिया आखी साथे तो देखणा, पर तेते नज्जो बीचा ते कुछ खाई नि सकणा।"

3 तेस ई दिने चार कोढ़ी बड़े द्वारो ते बारे थे; सेयो आपू बीचे बोलणे लगे, "आसे कऊँ एती बैठी-बैठी की मरूँ? 4 जे आसे बोलूँ, ‘कि शईरो दे जाऊँ,’ तो तेथी मरी जाणे; कऊँकि तेथी अकाल़ पड़ी रा ओर जे आसे एथी बैठे दे रऊँ, तेबे बी मरी जाणे। तो आओ आसे आपू खे अरामो री सेना ते पकड़वाई देऊँए; अगर सेयो आसा खे जिऊँदा राखोगे, तो आसे जिऊँदे रणे ओर जे सेयो आसा खे काई देयो, तो बी आसा खे मरना ईए।" 5 तेबे सेयो साँजा न्हेरे अरामो रे डेरे खे जाणे खे चले ओर अरामो रे डेरे रे कूणे पाँदे पऊँची की क्या देखेया कि तेथी कोई नि ए। 6 कऊँकि यहोवे अरामो री सेना खे रथ ओर कोड़ेया री बड़ी पारी आवाज सुणाई थी ओर सेयो आपू बीचे बोलणे लगे थे, "सुणो, इस्राएलो रे राजे हित्ती ओर मिस्रो रे राजे तनखाई पाँदे बुलाई राखे, ताकि आसा पाँदे अमला करो।" 7 इजी री खातर सेयो साँजा खे उठी की एड़े नठीगे कि आपणे कोड़े, गह्दे ओर डेरे जेड़े के तेड़े छाडी की आपणे-आपणे प्राण बचाई की नठीगे। 8 जेबे सेयो कोढ़ी डेरे रे कूणे पाँदे पऊँचे, तेबे एकी डेरे दे कूसी की खाया-पिया ओर तिजी बीचा ते चाँदी, सूईना ओर टाल्ले लई जाई की लकोई ते; तेबे वापस आई की दूजे डेरे दे कूसी गे ओर तिजी बीचा ते बी लई जाई की लकोईता। 9 तेबे सेयो आपू बीचे बोलणे लगे, "जो आसे करने लगी रे से ठीक काम नि ए, ये खुशिया रे सन्देशो रा दिन ए, पर आसे केसी गे नि बताणे लगी रे। अगर आसे प्याग ऊणे तक रूके रे रऊँगे तो आसा खे सजा मिलणी; तो आओ आसे राजे रे कराने गे जाई की ये गल्ल बताई देऊँए।" 10 तेबे सेयो तेथा ते चली गे ओर शईरो रे चौकीदारा खे बुलाई की बोलेया, "आसे जेबे अरामो रे डेरेया दे गये, तो क्या देखेया कि तेती कोई नि ए ओर माणूंआ री कोई आवाज नि सुणोई, बस बाने रे कोड़े ओर गह्दे ए ओर डेरे जेड़े के तेड़े ए।" 11 तेबे चौकीदारे आका पाई की राजमईलो ते पीतरे सन्देश दित्तेया।

12 तेबे राजा राती ई उठी गा ओर आपणे कर्मचारिया खे बोलेया, "आऊँ तुसा खे बताऊँआ कि अरामी सेने आसा साथे क्या करी राखेया? सेयो जाणो थे कि आसे लोक पूखे ए इजी री खातर सेयो डेरे ते मैदानो दे इजी री खातर लूकणे जाई रे कि जेबे सेयो शईरो ते निकल़ो, तेबे आसा सेयो जिऊँदे ई पकड़ी की आपू शईरो दे कूसी की से शईर आपणे कब्जे दे करी लणा।" 13 पर राजे रे एकी कर्मचारिये ज्वाब दित्तेया, "ओ राजा, जो कोड़े आसा गे बची रे तिना बीचा ते पाँज सिपाई कोड़े लई की बारे जाओ, जे सेयो जिऊँदे बची गे तो ओरी इस्राएली सिपाईया जेड़े जिऊँदे रई जाणे। पर जे सेयो मरीगे तो तिना रा बी सेई आल ऊणा जो ओरी इस्राएली सिपाईया रा ऊआ, जो मरी चूकी रे। आओ आसे तिना खे पेजी की पूरी सच्चाईया रा पता लगाई लईए।" 14 तेबे तिने दो रथ ओर तिना रे कोड़े लये ओर राजे सेयो अरामो री सेना पीछे पेजे ओर बोलेया, "जाओ देखो।" 15 तेबे सेयो यरदन नदिया तक तिना पीछे चली गे ओर क्या देखेया, कि पूरी बाट टाल्लेया ओर पांडेया साथे परी री थी, जो अरामिये जल्दबाजिया रिया बजा ते सेटी ते थे; तेबे दूत वापस आए ओर राजे गे ये बताया। 16 तेबे सामरी लोके निकल़ी की अरामी सेना रे डेरे लूटी ले ओर यहोवे रे वचनो रे मुताबिक लगभग तीन किलो आटा एक चाँदिए रे सिक्के दे ओर छे किलो जौ बी एक चाँदिए रे सिक्के दे बिकणे लगे। 17 राजे से सरदार जेस पाँदे से परोसा करो था बड़े द्वारो रा अधिकारी ठराया; तेबे से बड़े द्वारो गे लोका रे पैरा निठे आई की दबी की मरीगा। ये परमेशरो रे पग्तो रे तेस वचनो रे मुताबिक ऊआ जो तिने जेबे राजा तेसगे आया था तेबे बोले थे। 18 परमेशरो रे पग्ते जेड़ा राजे खे बोलेया था, "काल एस ई बखते सामरिया रे बड़े द्वारो गे तीन किलो आटा एकी चाँदिए रे सिक्के दे ओर छे किलो जौ बी एकी चाँदिए रे सिक्के दे बिकणे", तेड़ा ई ऊआ। 19 ओर तिने सरदारे परमेशरो रे पग्तो खे ज्वाब देई की बोलेया था, "सुण, चाए यहोवा सर्गो रे चरोखे बी खोली देयो तेबे बी एड़ा नि ऊणा" ओर तिने बोलेया था, "सुण, तां ये आपणिया आखी साथे तो देखणा, पर तेते नज्जो बीचा ते खाई नि सकणा।" 20 तो तेस साथे ठीक तेड़ा ई ऊआ, लोके से बड़े द्वारो गे आपणे पैरा निठे दबाईता ओर से मरी गा।