2 राजा 12

योआश रा राज्य

1 येहूए रे इस्राएलो दे राज करदे ऊए सात साल ऊए तेबे योआश यहूदा दे राज करने लगेया ओर यरूशलेम शईरो दे चाल़ी साल तक राज करदा रया। तेसरी माया रा नाओं सिब्या था, जो बेर्शेबा शईरो री रणे वाल़ी थी। 2 ओर जदुओ तक यहोयादा पुरोईत योआशो खे शिक्षा देंदा रया, तदुओ तक से सेई काम करदा रया जो यहोवे री नजरा दे सई ए। 3 तेबे बी दूजेया देवतेया रिया ऊच्चिया जगा नि टाल़िया; पर प्रजा रे लोक तेबे बी ऊच्ची जगा दे बलि चढ़ाओ थे ओर तूप बाल़ेया करो थे। 4 तेबे योआशे पुरोईता खे बोलेया, "पवित्र कित्ती री चीजा रा जितणा पैसा यहोवे रे मन्दरो दे पऊँचाया जाओ, मतलब गिणे रे लोका रा पैसा ओर जितणे पैसेया जोगा जो कोई ओ ओर जितणा पैसा जेसरी इच्छा यहोवे रे मन्दरो दे ल्याऊणे री ओ, 5 इना सबी खे पुरोईत लोक आपणी जान-पछयाणी रे लोका ते लया करो ओर मन्दरो दे जो कुछ टूटेया-फूटेया रा ओ तिना खे सुदारी देयो।" 6 राजा योआशो रे राज करदे ऊए तेई साल ऊईगे ओर एबुए तक बी पुरोईते मन्दरो रे टूटे-फूटे दे इस्से नि सुदारे थे। 7 इजी री खातर राजा योआशे यहोयादा पुरोईत ओर पुरोईता खे बुलाई की पूछेया, "मन्दरो दे जो कुछ टूटी-फूटी रा, से तुसे कऊँ नि सुदारदे? आजो ते आपणी जाणी-पछयाणी रे लोका ते ओर पैसा नि लणा ओर जो तुसा खे मिलो, से मन्दरो रे सुदारने खे देई देणा।" 8 तेबे पुरोईते आपू बीचे गल्ल-बात करी की फैंसला कित्तेया कि आसा ना तो लोका ते पैसा लणा, ओर ना ई मन्दर सुदारना। 9 तेबे यहोयादा पुरोईते एक सन्दूक लया ओर तेतेरे टकणे दे कोर करी की से यहोवे रे मन्दरो दे आऊणे वाल़ेया रे दाँणे आथो पाँदे बेदिया गे राखी ता ओर द्वारो री रखवाल़ी करने वाल़े पुरोईत तिदे से सारा पैसा पाणे लगे जो यहोवे रे मन्दरो दे लोक ल्यायो थे। 10 जेबे तिने देखेया कि सन्दूको दे बऊत पैसा ए, तेबे राजे रे परदान ओर बड़े पुरोईते आई की यहोवे रे मन्दरो दे आया दा पैसा गिणी की से थैलिया दे परीता। 11 तेबे तिने से तोलेया दा पैसा तिना काम करने वाल़ेया रे आथो दे दित्तेया, जो यहोवे रे मन्दरो रे अधिकारी थे ओर इने से पैसा यहोवे रे मन्दरो खे बनाणे वाल़े चूणे दे मिस्त्रिया, राजमिस्त्रिया ओर कारीगरा खे दित्तेया। 12 ओर लकड़ी ओर कअड़े दे पात्थर मोले लणे खे, बल्कि जो कुछ यहोवे रे मन्दरो दे टूटे-फूटे री मरम्मत करने खे खर्च ओ था, तिदे लगाया। 13 पर जो पैसा यहोवे रे मन्दरो दे आओ था, तिजी साथे चाँदिए रे तसले, चिमटा, कटोरे, तुरहिया बगैरा सूईने या चाँदिए रे कोई पांडे नि बणे। 14 पर से काम करने वाल़ेया खे दित्तेया ओर तिने से लई की यहोवे रे मन्दरो री मरम्मत कित्ती। 15 ओर जिना रे आथो रे काम करने वाल़ेया खे देणे खे पैसा देयो थे, तिना ते कुछ साब नि लओ थे, कऊँकि सेयो सच्चाईया साथे काम करो थे। 16 जो पैसा दोषबलि ओर पापबलिया खे देयो थे, से तो यहोवे रे मन्दरो दे नि लगाया, से सिर्फ पुरोईता खे मिलो था। 17 तेबे अरामो रे राजे हजाएले गत शईरो पाँदे अमला कित्तेया ओर तिना साथे लड़ाई करी की से लई ला। तेबे तिने यरूशलेम शईरो पाँदे बी अमला करने खे आपणा मूँ कित्तेया। 18 तेबे यहूदा रे राजा योआशे सेयो सारिया पवित्र चीजा जो तेसरे बुजुर्गे यहोशापात, यहोराम ओर अहज्याह नाओं रे यहूदा रे राजेया पवित्र कित्तिया थिया ओर आपणी पवित्र कित्ती रिया चीजा बी ओर जितणा सूईना यहोवे रे मन्दरो रे पण्डारो दे ओर राजमईलो दे मिलेया, से सारा लई की अरामो रे राजा हजाएलो गे पेजीता ओर से यरूशलेम शईरो ते चली गा। 19 राजा योआशे जो बड़े काम कित्ते तिना रे बारे दे यहूदा रे राजेया रे इतिआसो री कताबा दे लिखी राखेया। 20 योआशो रे कर्मचारिये राजद्रोह री साजिश करी की, से मिल्लो रे मईलो दे जो सिल्लो री उतराईया दे ए, काईता। 21 मतलब शिमातो रा पाऊ योजाकार ओर शोमेरो रा पाऊ यहोजाबाद, जो तेसरे कर्मचारी थे, तिने से काईता। तेबे से तेसरे बुजुर्गा बीचे दाऊदो रे शईरो रे दबाईता ओर तेसरा पाऊ अमस्याह तेसरी जगा पाँदे राज करने लगेया।