2 राजा 25

यहूदा रा पतन ओर गुलामी

1 ये इजी खे ऊआ जेबे सिदकिय्याह राजे बाबेलो रे राजे साथे बगावत कित्ती। तेसरे राज्य रे नऊए सालो रे दसुए मीन्ने रे दसुए दिने बाबेलो रे राजे नबूकदनेस्सरे आपणी पूरी सेना लई की यरूशलेम शईरो पाँदे अमला कित्तेया ओर यरूशलेम शईरो रे नेड़े डेरे लगाई की तेतेरे चऊँ कनारे कांद बणाई। 2 से शईर सिदकिय्याह राजे रे ग्यारुए सालो तक केरेया दा रया। 3 चौथे मीन्ने रे नऊए दिनो ते शईरो दे अकाल़ एथो तक बढ़ी गा कि देशो रे लोका खे कुछ खाणे खे नि रया। 4 तेबे शईरो री दवाला दे माणूंए रे निकल़ने जोगा एक बड़ा कोर कित्तेया। जेबे यहूदा प्रदेशो रे राजे ये देखेया, तेबे तिने ओर तेस साथे रणे वाल़े सिपाईए से शईर छाडीता। सेयो राती दुँईं दवाला रे बीछीए जो द्वार था तीसिए बारे निकल़ी की चली गे। ये बाट राजे रे बगीचे रे नेड़े थी। जेबे कि कसदी सिपाईए शईर चऊँ कनारा ते केरी राखेया था, तेबे बी सेयो यरदन नदिया रे कनारे अराबा दे सूकी काट्टिया रिया तरफा खे चली गे।✝25:4 यहेज. 33:21 5 तेबे कसदिया री सेने राजे रा पीछा कित्तेया ओर से यरीहो रे नेड़े मैदानो रे जाई की पकड़ेया, ओर तेसरी पूरी सेना तित्तर-बित्तर ऊई गी। 6 तेबे सेयो राजे खे पकड़ी की रिबला शईरो दे बाबेलो रे राजे गे लईगे ओर तेसखे दण्डो री आज्ञा दित्ती। 7 तिने सिपाईए सिदकिय्याह रे पाऊ तेस सामणे काये ओर सिदकिय्याह रिया आखी फोड़ी तिया ओर तेसखे पीतल़ी री बेड़िया दे जकड़ी की बाबेलो खे लईगे।

यरूशलेम शईरो रा विनाश

8 बाबेलो रे राजा नबूकदनेस्सरो रे उन्निए सालो रे पाँजुए मीन्ने रे सातुए दिने रक्षा करने वाल़ेया रा परदान नबूजरदान नाओं रा माणूं जो बाबेलो रे राजे रा एक कर्मचारी था, यरूशलेम शईरो दे आया। 9 तिने यहोवे रे मन्दर, ओर राजमईल ओर यरूशलेम शईरो रे सारे कअर, मतलब हर एक बड़ा कअर आग लगाई की फूकी ता। 10 यरूशलेम शईरो रे चऊँ कनारली सारिया दवाला, कसदिया री पूरी सेने जो रक्षा करने वाल़ेया रे परदानो साथे थी, टाल़ी तिया। 11 तेबे जो लोक शईरो रे रई गे थे ओर जो लोक बाबेल रे राजे गे नठीगे थे ओर आम लोक जो रई गे थे, इना सबी खे रक्षा करने वाल़ेया रा परदान नबूजरदान बन्दी बणाई की लईगा। 12 पर रक्षा करने वाल़ेया रे परदाने देशो रे कंगाल़ा बीचा ते कई जणे अंगूरा रे बगीचे री देख-रेख ओर खेतीबाड़ी करने खे छाडी ते। 13 यहोवे रे मन्दरो दे जो पीतल़ी रे खम्बे थे ओर कुर्सिया ओर पीतल़ी रा अऊद जो यहोवे रे मन्दरो दे था, इना खे तोड़ी की कसदी सिपाई इना रा पीतल़ बाबेलो खे लईगे। 14 आण्डिया, फरूए, चिमटे, तूपदान ओर पीतल़ी रे सारे पांडेया खे बी जिना साथे सेवा-टईल ओ थी, तिना खे बी सेयो लईगे। 15 कड़छ ओर कटोरिया जो सूईने रिया थिया ओर जो कुछ चाँदिए रा था, से सब सूईना, चाँदी रक्षा करने वाल़ेया रा परदान लईगा। 16 दोनो खम्बे, एक अऊद ओर जो कुर्सिया सुलैमाने यहोवे रे मन्दरो खे बणाए थे, इना सबी रा पीतल़ तोलणे ते बारे था। 17 एक-एक खम्बा सताई फुट ऊच्चा था ओर तिना रे सिरे पीतल़ी रे थे। तिना रा एक-एक सिरा साडे चार फुट ऊच्चा था। सिरेया रे चऊँ कनारे जाल़ी ओर अनार बणी रे थे। सेयो सारे पीतल़ी रे बणी रे थे। 18 रक्षा करने वाल़ेया रे परदाने सरायाह बड़े पुरोईत ओर तेसते थालले पुरोईत सपन्याह ओर तीनो द्वारपाल पकड़ी ले। 19 तिने शईरो दे एक अधिकारी पकड़ेया जो सिपाईया रा परदान था। तिने राजे रे पाँज ओर मंत्री बी पकड़े। यो तेस बखते शईरो देई थे। इजी ते अलावा तिने मुन्शीये यो माणूं बी पकड़े, सेना रा अधिकारी जो लोका खे सेना दे पर्ती करो था; साठ जणे जो तेस बखते शईरो देई थे। 20 इना खे रक्षा करने वाल़ेया रा परदान नबूजरदान पकड़ी की बाबेलो दे रिबला शईरो दे राजे गे लईगा। 21 तेबे बाबेलो रे राजे सेयो हमात देशो रे रिबला शईरो दे काईते। ईंयाँ यहूदी बन्दी बणाई की आपणे देशो ते निकयाल़ी ते।

यहूदा रे राज्यपाल गदल्याह री अत्या

22 जो लोक यहूदा प्रदेशो दे रई गे मतलब जो बाबेलो रे राजे नबूकदनेस्सरे छाडी ते थे, तिना पाँदे तिने अहीकामो रा पाऊ गदल्याह जो शापानो रा पोता था यहूदा रा राज्यपाल ठराईता। 23 जेबे दलो रे सारे परदाने, मतलब नतन्याह रे पाऊ इश्माएल कारेहूए रा पाऊ योहानान, नतोपाई शईरो रा, तन्हूमेतो रे पाऊ सरायाह ओर केसी माकाईए रे पाऊ याहन्याहे ओर तिना रे माणूंए ये सुणेया कि बाबेलो रे राजे गदल्याह खे राज्यपाल ठराया, तेबे सेयो आपणे-आपणे माणूंआ समेत मिस्पा शईरो दे गदल्याह गे आए। 24 गदल्याहे तिना ते ओर तिना रे माणूंआ साथे कसम खाई की बोलेया, "कसदिया रे सिपाईया ते नि डरो, देशो रे रंदे ऊए बाबेलो रे राजे री सेवा करदे रओ, तेबे तुसा रा पला ऊणा।" 25 पर सातुए मीन्ने दे नतन्याह रा पाऊ इश्माएल, जो एलीशामा रा पोता ओर राजे रे कराने रा था, तिने दस माणूं साथे लई की गदल्याह गे जाई की से कुटेया ओर से मरी गा ओर जो यहूदी ओर कसदी तेस साथे मिस्पा दे रओ थे, सेयो बी काईते। 26 तेबे क्या छोटे, क्या बड़े सारी प्रजा रे लोक ओर दलो रे परदान कसदिया रे डरो रे मारे उठी की मिस्र देशो दे जाई की रणे लगे।

यहोयाकीनो रा जेला ते छूटणा

27 जेबे यहूदा रे राजा यहोयाकीनो री बन्दुआईया रे सैंतीए साले मतलब जेते सालो दे बाबेलो रे राजा नबूकदनेस्सरो रा पाऊ एवील्मरोदक राजगद्दिया पाँदे बैठेया, तेसरे ई बारूए मीन्ने रे सताईये दिने तिने यहूदा रे राजे यहोयाकीनो खे जेला ते बारे निकयाल़ी ता। 28 ओर तेसखे ऊच्चा पद देई की जो राजा तेस साथे बाबेलो दे कैदी थे तिना रे सिंहासनो ते तेसरा सिंहासन जादा ऊच्चा कित्तेया। 29 यहोयाकीने जेला दे कैदिया रे आपणे टाल्ले बदली ते। तिने पूरी जिन्दगी राजे री मेजा पाँदे तेस साथे रोटी खाई। 30 ओर हर रोजके खर्चो खे राजे रे मईलो ते हर दिनो रा खर्च ठराया, जो तेसरी पूरी जिन्दगी लगातार तेसखे मिलदा रया।