1 जेबे मनश्शे यहूदा प्रदेशो पाँदे राज करना शुरू कित्तेया, तेबे से बारा साला रा था ओर यरूशलेम शईरो दे पचूँजा साला तक राज करदा रया; ओर तेसरी माया रा नाओं हेप्सीबा था। 2 तिने तिना जातिया रे घिनौने कामा रे मुताबिक, जो यहोवे इस्राएली लोका रे सामणे देशो ते निकयाल़ी तिया थिया, से कित्तेया, जो यहोवे री नजरा दे बुरा था। 3 तिने सेयो ऊच्ची-ऊच्ची जगा खे जो तेसरे बाओ राजा हिजकिय्याहे नाश करी तिया थिया, फेर बणाईया ओर इस्राएलो रे राजा अहाबो जेड़े बाल देवते खे बेदिया ओर एक अशेरा बणाई ओर सर्गो रे सारे गणा गे माथा टेकदा ओर तिना री आराधना करदा रया। 4 तिने यहोवे रे तेस मन्दरो दे दूजे देवतेया री बेदिया बणाईया जेतेरे बारे दे यहोवे बोलेया था, "यरूशलेम शईरो दे मां आपणा नाओं राखणा।" 5 बल्कि यहोवे रे मन्दरो रे दुँईं आँगणा दे बी तिने सर्गो रे सारे गणा खे बेदिया बणाईया। 6 तेबे तिने आपणा पाऊ दूजे देवतेया रिया तँईं आगी दे बलि करी की चढ़ाया ओर शुभ-अशुभ मुर्ह्त मानो था ओर जादू-टोणा ओर पूत सिद्धिवाल़ेया साथे मेल-जोल राखो था, बल्कि तिने एड़े कई काम कित्ते, जो परमेशरो री नजरा रे बुरे थे ओर जिना साथे से रोषे ओआ। 7 अशेरा देविया री जो मूर्ति तिने बणवाई, से तिने तेते मन्दरो दे स्थापित कित्ती, जेतेरे बारे यहोवे दाऊद ओर तेसरे पाऊ सुलैमानो गे बोलेया था, "एते मन्दरो रे ओर यरूशलेम शईरो रे, जो मैं इस्राएलो रे सबी गोत्रा बीचे चूणी ले रे, मां सदा आपणा नाओं राखणा। 8 ओर जे सेयो मेरी सब आज्ञा ओर मेरे दास मूसे रे दित्ते रे बिधानो रे मुताबिक करने रे चौकसी करोगे, तो मां एड़ा नि करना कि जो देश मैं इस्राएलो रे बुजुर्गा खे दित्तेया था, सेयो तेथा ते निकल़ी की फेर मारे-मारे फिरो।" 9 पर इस्राएलो रे लोके यहोवे री गल्ल नि मानी, बल्कि मनश्शे सेयो एथो तक पटकाए कि तिने तिना जातिया ते बी बढ़ी की बुराई कित्ती, जो यहोवे इस्राएली लोका रे सामणे ते नाश कित्तिया थिया।

10 इजी री खातर यहोवे आपणे दास भविष्यबक्तेया रे जरीये बोलेया, 11 यहूदा रे राजा मनश्शे जो यो बुरे काम कित्ते ओर जितणी बुराईया एमोरिये जो तेसते पईले थे, कित्तिया थिया, तिना ते बी जादा बुराईया कित्तिया ओर यहूदिया ते आपणी बणाई रिया मूर्तिया री आराधना करवाई की सेयो पापो दे फसाई राखे। 12 इजी बजा ते इस्राएलो रा यहोवा परमेशर ईंयाँ बोलोआ कि सुणो, आऊँ यरूशलेम ओर यहूदा पाँदे एड़ी मुसीबत पाणा चाऊँआ कि जेस केसी तेतेरा सन्देश सुणना से बड़े सन्णाटे रे आई जाणा। 13 ओर जो नापणे री डोरी मैं सामरिया शईरो पाँदे पाई राखी ओर जो साल़ मैं अहाबो रे कराने पाँदे लटकाई राखी सेई यरूशलेम शईरो पाँदे लटकाणी। ओर मां यरूशलेम एड़ा टूसणा जेड़ा कोई थाल़िया खे टूसोआ ओर तेतेखे टूसी की उल्टी करी की राखी देयोआ। 14 मां आपणे निज इस्से दे बचे रे लोक त्यागी की दुश्मणा रे आथो रे करी देणे ओर सेयो आपणे सबी दुश्मणा खे लूट ओर तअन बणी जाणे। 15 इजी री बजा ए कि जदुओ ते तिना रे बुजुर्ग मिस्रो ते निकल़े, तदुओ ते आजके दिनो तक सेयो से काम करी की जो मेरी नजरा रे बुरा ए, माखे रोष दलांदे आई रे। 16 मनश्शे ना सिर्फ सेयो काम कराई की यहूदिया ते पाप कराया, जो यहोवे री नजरा रे बुरा ए, बल्कि निर्दोषा रा खून बऊत बाह्या, एथो तक कि तिने यरूशलेम एक कूणे ते दूजे कुणे तक खूनो साथे परी ता।

17 मनश्शे रे ओर सब काम जो तिने कित्ते ओर जो पाप तिने कित्ते, से सब यहूदा रे राजेया रे इतिआसो री कताबा रे लिखी राखे। 18 अंतो दे मनश्शे मरी गा ओर से तेसरे मईलो रे बगीचे दे जेतेखे उज्जा रा बगीचा बोलो थे, दबाईता; तेबे तेसरा पाऊ आमोन तेसरी जगा पाँदे नवां राजा बणेया।

19 जेबे आमोन यहूदा प्रदेशो दे राज करने लगेया, तेबे से बाईया साला रा था ओर यरूशलेम शईरो रे दो साला तक राज करदा रया ओर तेसरी माया रा नाओं मशुल्लेमेत था, जो योत्बा शईरो दे रणे वाल़े हारूसो री बेटी थी। 20 ओर तिने आपणे बाओ मनश्शे जेड़ा सेई कित्तेया, जो यहोवे री नजरा रे बुरा था। 21 से पुरिया तरअ ते आपणे बाओ जेड़ा बुरी चाल चलेया ओर जिना मूर्तिया री आराधना तेसरा बाओ करो था, से बी तिना री आराधना करो था ओर तिना गे माथा टेको था। 22 तिने आपणे बुजुर्गा रा यहोवा परमेशर त्यागी ता ओर यहोवे री बाटा रे नि चलेया। 23 आमोनो रे कर्मचारिये राजद्रोह री साजिश करी की राजा तेसरे ई मईलो रे काई ता। 24 तेबे आम माणूंए सेयो सब काईते, जिने राजा आमोनो रे खलाफ राजद्रोह री साजिश कित्ती थी ओर लोके तेसरी जगा पाँदे तेसरा पाऊ योशिय्याह राजा बणाया। 25 आमोनो रे ओर काम जो तिने कित्ते, सेयो यहूदा रे राजेया रे इतिआसो री कताबा दे लिखी राखे। 26 तेसखे बी उज्जा रे बगीचे रे तेसरी आपणी कब्रा दे माट्टी दित्ती ओर तेसरा पाऊ योशिय्याह तेसरी जगा पाँदे नवां राजा बणेया।