2 राजा 20

हिजकिय्याह राजे रा मौता ते बचणा

1 तिना दिना दे यहूदा रा राजा हिजकिय्याह एड़ा बमार ऊआ कि से मरने ई वाल़ा था ओर आमोसो रे पाऊ यशायाह भविष्यबक्ते तेसगे जाई की बोलेया, "यहोवा ईंयाँ बोलोआ, कि आपणे कराने रे बारे जो आज्ञा देणी से दे; कऊँकि तूँ नि बचणा, मरी जाणा।" 2 तेबे तिने कांदा रिया तरफा खे मूँ फेरी की यहोवे ते प्रार्थना करी की बोलेया, 3 "ओ यहोवा! आऊँ बिनती करूँआ, याद कर कि आऊँ सच्चाई ओर खरे मनो साथे आपू खे तां सामणे जाणी की चलदा आई रा ओर जो ताखे अच्छा लगोआ, आऊँ सेई करदा आई रा।" तेबे हिजकिय्याह बिलखी-बिलखी की रोया।

4 तेबे एड़ा ऊआ कि यशायाह शईरो रे बीचे पऊँची नि रया था कि यहोवे रा ये वचन तेसगे पऊँचेया, 5 "वापस ऊई की यहूदा री प्रजा रे परदान हिजकिय्याह खे बोल कि तेरे मूल़ मर्द दाऊदो रा यहोवा परमेशर ईंयाँ बोलोआ कि मैं तेरी प्रार्थना सुणी ओर तेरे आसू देखी राखे; देख, आऊँ ताखे ठीक करूँआ, तूँ परसु यहोवे रे मन्दरो रे जाई सकणा। 6 मां तेरी उम्र पंद्रा साल ओर बढ़ाणी ओर अश्शूरो रे राजे रे आथो ते तूँ ओर ये शईर बचाणा ओर मां आपणे दाऊदो साथे कित्ते रे वादे रे मुताबिक शईरो री रक्षा करनी।" 7 तेबे यशायाहे बोलेया, "दाऊगल़े री एक टिक्की लओ।" जेबे तिने से लई की फोड़े पाँदे लगाई, तेबे से ठीक ऊईगा। 8 इजी ते पईले हिजकिय्याहे यशायाह ते पूछेया, "यहोवे जेस आऊँ ठीक करना ओर आऊँ परसु यहोवे रे मन्दरो खे जाई सकणा, इजी रा क्या नशाण ऊणा?" 9 भविष्यवक्ता यशायाहे बोलेया, "यहोवे जेस आपणे बोले रे वचन पूरे करने, एसा गल्ला रा यहोवे रिया तरफा ते ताखे ये नशाण ऊणा कि तूपा री कड़िया री छांए दस कदम आगे बढ़ी जाणी या दस कदम कम ऊई जाणी।" 10 हिजकिय्याहे बोलेया, "छांयी रा दस कदम आगे बढ़ना तो अल़्की जी गल्ल ए, इजी री खातर एड़ा ओ कि छांए दस कदम पीछे टाई देयो।" 11 तेबे यशायाह भविष्यबक्ते यहोवे खे आका पाईया ओर आहाजो री तूपा री कड़िया री छांए, जो दस कदम आगे जाई चूकी थी, यहोवे से पिछली तरफा खे दस कदम टाईती।

हिजकिय्याह रा गर्व ओर तेसरी सजा

12 तेस बखते बलदानो रा पाऊ बरोदक-बलदान जो बेबीलोनो रा राजा था, तिने हिजकिय्याह रे बमार ऊणे री खबर सुणी की तेसगे चिट्ठी ओर पेंट पेजी। 13 हिजकिय्याह राजा तिना दूता खे देखी कि खुश ऊआ। तिने तिना खे आपणे कीमती पदार्था रा सारा पण्डार दशेया, चाँदी, सूईना, मसाले, कीमती तेल, ओर आपणे अथियार। हिजकिय्याहे आपणा पूरा कअर ओर आपणे पण्डारो दे जो चीजा थिया, सेयो सब दखाईया। हिजकिय्याह रे मईल ओर पूरे राज्य दे कोई एड़ी चीज नि रई, जो तिने तिना खे नि दखाई ओ। 14 तेबे यशायाह भविष्यबक्ते राजे गे जाई की पूछेया, "सेयो माणूं क्या बोली गे? ओर तांगे केथा ते आई रे थे?" हिजकिय्याह राजे बोलेया, "सेयो तो दूर देशो ते, मतलब बाबेलो ते आई रे थे।" 15 तेबे यशायाहे हिजकिय्याह खे पूछेया, "तिने तेरे मईलो दे क्या-क्या देखेया?" हिजकिय्याहे बोलेया, "जो कुछ मेरे मईलो दे ए, से सब तिने देखेया। मेरे पण्डारो दे एड़ी कोई चीज नि ए, जो मैं तिना खे नि दखाई ओ।" 16 तेबे यशायाहे हिजकिय्याह ते बोलेया, "यहोवे रा वचन सुणी लो। 17 एड़े दिन आऊणे वाल़े ए, जिना दे जो कुछ तेरे मईलो दे ए ओर जो कुछ तेरे बुजुर्गा रा राखेया रा आजो तक पण्डारो दे ए से सब बाबेलो खे लई जाणा; यहोवा ईंयाँ बोलोआ कि कोई चीज नि बचणी। 18 ओर जो पाऊ तेरे कुलो दे पैदा ओ, तिना बीचा ते बी कई तिना बन्दी बणाई की लई जाणे ओर सेयो खुसरे बणी की बाबेलो रे राजमईलो दे रणे।" 19 तेबे हिजकिय्याहे यशायाह खे बोलेया, "यहोवे रा वचन जो तैं बोलेया, से खरा ई ए" तेबे तिने सोचेया, "जे मेरे दिना दे शान्ति ओर सच्चाई बणी दी रओगी तो क्या ये ठीक नि ए?" 20 हिजकिय्याह रे ओर सब काम ओर तेसरी सारी वीरता ओर तिने किंयाँ एक पोखरा ओर नाल़ी खणवाई की शईरो दे पाणी पऊँचाया, ये सब यहूदा रे राजेया रे इतिआसो री कताबा रे लिखी राखेया। 21 अंतो रे हिजकिय्याह मरी गा ओर तेसरा पाऊ मनश्शे तेसरी जगा पाँदे राज करने लगेया।