1 इस्राएलो रे राजा दूजे यारोबामो रे राज्य रे सताईये साले यहूदा रे राजा अमस्याहो रा पाऊ अजर्याह जेसखे उज्जियाह बी बोलोए राजा बणेया। 2 जेबे से राज करने लगेया, तेबे सोल़ा साला रा था ओर यरूशलेम शईरो दे बूँजा साल तक राज करदा रया। तेसरी माया रा नाओं यकोल्याह था, जो यरूशलेम शईरो री थी। 3 जेड़ा तेसरा बाओ अमस्याह करेया करो था, जो यहोवे री नजरा रे सई था, तेड़ा ई से बी करो था। 4 तेबे बी ऊच्चिया जगा नि टाल़िया; प्रजा रे लोक तेस बखते बी तिना पाँदे बलि चढ़ाओ थे ओर तूप बाल़ो थे। 5 यहोवे से राजा एड़ा काया कि से मरने रे दिना तक कोढ़ी रया ओर एकी कअरो दे लग रओ था। तेबे योताम नाओं रा राजकुमार तेसरे कामो पाँदे अधिकारी ऊई की देशो रे लोका रा न्याय करने लगेया। 6 अजर्याह रे ओर सारे काम जो तिने कित्ते, से यहूदा रे राजेया रे इतिआसो री कताबा रे लिखी राखे, 7 अंतो दे अजर्याह मरीगा ओर से तेसरे बुजुर्गा साथे दाऊदो रे शईरो रे दबाईता। तेबे तेसरा पाऊ योताम तेसरी जगा पाँदे राज करने लगेया।

8 यहूदा रे राजा अजर्याह रे राजो रे ठथिये साले दूजे यारोबामो रा पाऊ जकर्याह इस्राएलो पाँदे सामरिया दे राज करने लगेया ओर तिने छे मीन्ने तक राज कित्तेया। 9 तिने आपणे बुजुर्गा जेड़ा तेड़ा ई कित्तेया, जो यहोवे री नजरा दे बुरा था, मतलब नबातो रे पाऊ यारोबाम, जिने इस्राएलो ते पाप करवाया था, तेसरे पापो रे मुताबिक से करदा रया ओर तिना बुरे कामा ते लग नि ऊआ। 10 ओर याबेशो रे पाऊ शल्लूमे तेस साथे राजद्रोह री सभा करी की से प्रजा सामणे काया ओर तेसखे काई की तेसरी जगा पाँदे राजा बणेया। 11 जकर्याह रे ओर सब काम इस्राएलो रे राजेया रे इतिआसो री कताबा रे लिखी राखे। 12 ईंयाँ यहोवे रा से वचन पूरा ऊआ, जो तिने येहूए खे बोलेया था, "तेरे पड़पोते रे पाऊए तक तेरी ल्वाद इस्राएलो री गद्दिया पाँदे बैठी की राज करना।" ओर तेड़ा ई ऊआ।

13 यहूदा रे राजा उज्जियाह जेसरा नाओं जकर्याह बी ए, तेसरे राजो रे उँताल़िये साले याबेशो रा पाऊ शल्लूम राज करने लगेया ओर एक मीन्ने तक सामरिया दे राज करदा रया। 14 कऊँकि गादिए रे पाऊ मनहेमे, तिर्सा ते सामरिया रे जाई की याबेशो रा पाऊ शल्लूम तेथी काई ता ओर तेसखे काई की तेसरी जगा पाँदे राजा बणी गा। 15 शल्लूमो रे ओर काम ओर तिने राजद्रोह री जो सभा कित्ती, ये सब इस्राएलो रे राजेया रे इतिआसो री कताबा रे लिखी राखेया। 16 तेबे मनहेमे तिर्सा रे जाई की, सब रणे वाल़े ओर ओरले-पोरले सबी देशो रे लोका समेत तिप्सह इजी बजा ते काया, कऊँकि तिप्सहिये तेसखे बड़े द्वार नि खोले थे, इजी बजा ते तिने से काई ता ओर तिदे जितणी गर्भवती जवाणसा थिया, सेयो सब चीरी तिया।

17 यहूदा रे राजा अजर्याह रे राजो रे उँताल़िये साले गादिए रा पाऊ मनहेम इस्राएलो पाँदे राज करने लगेया ओर दस साल तक सामरिया दे राज करदा रया। 18 तिने से कित्तेया जो यहोवे री नजरा दे बुरा था, मतलब नबातो रे पाऊ यारोबाम, जिने इस्राएलो ते पाप करवाया था, तेसरे पापो रे मुताबिक से करदा रया ओर से पूरी जिन्दगी तेड़ा ई करदा रया।

19 अश्शूरो रे राजा पूले* इस्राएल देशो पाँदे अमला कित्तेया ओर राजा मनहेमे तेसखे 35,000 किलो चाँदी एते इच्छा ते दित्तेया, ताकि से तेसरा मतदगार ऊई की राज्य तेसरे आथो दे मजबूत करो। 20 ये चाँदी अश्शूरो रे राजे खे देणे खे मनहेमे बड़े-बड़े अमीर इस्राएली लोका ते लई ली, एकी-एकी मर्दो खे पंजा-पंजा चाँदिए रे सिक्के देणे पड़े; तेबे अश्शूरो रा राजा देशो खे छाडी की वापस ऊईगा। 21 मनहेमो रे ओर काम जो तिने कित्ते, सेयो सब क्या इस्राएलो रे राजेया रे इतिआसो री कताबा रे नि लिखी राखे? 22 अंतो रे मनहेम मरी गा ओर तेसरा पाऊ पकहयाह तेसरी जगा पाँदे राज करने लगेया।

23 यहूदा रे राजा अजर्याह रे राज्य रे पँजाऊए साले मनहेमो रा पाऊ पकहयाह सामरिया रे इस्राएलो पाँदे राज करने लगेया ओर दो साल तक राज करदा रया। 24 तिने से कित्तेया जो यहोवे री नजरा रे बुरा था, मतलब नबातो रे पाऊ यारोबाम, जिने इस्राएलो ते पाप करवाया था, तेसरे पापो रे मुताबिक से करदा रया ओर से तिना ते लग नि ऊआ। 25 पकहयाह री सेना रे परदान रमल्याह रा पाऊ पेकह था। पेकह गिलादो ते पंजा माणूं आपू साथे लई की सामरिया रे राजमईलो दे गया। तेती तिने गुम्मटो पाँदे तिने राजा ओर तेस साथे अर्गोब ओर अर्ये काईते। ओर से तेसखे काई की तेसरी जगा पाँदे राजा बणी गा। 26 पकहयाह रे ओर सब काम जो तिने कित्ते, से इस्राएलो रे राजेया रे इतिआसो री कताबा रे लिखी राखे।

27 यहूदा रे राजा अजर्याह रे राजो दे बूँजुए साले रमल्याह रा पाऊ पेकह सामरिया दे इस्राएलो पाँदे राज करने लगेया ओर बीइ साला तक राज करदा रया। 28 तिने से कित्तेया जो यहोवे री नजरा दे बुरा था, मतलब नबातो रे पाऊ यारोबाम, जिने इस्राएलो ते पाप करवाया था, तेसरे पापो रे मुताबिक से करदा रया ओर से तिना ते लग नि ऊआ। 29 इस्राएलो रे राजा पेकह रे दिना दे अश्शूरो रे राजा तिग्लत्पिलेसेरे* आई की इय्योन, आबेल्वेत्माका, यानोह, केदेश ओर हासोर नाओं रे शईर ओर गिलाद ओर गलील, बल्कि नप्तालिया रा पूरा देश बी लई ला ओर तिना रे लोका खे बन्दी बणाई की अश्शूरो खे लईगा। 30 उज्जियाह रे पाऊ योतामो रे बीये साले एला रे पाऊ होशे रमल्याह रे पाऊ पेकह साथे राजद्रोह री साजिश करी की से काया ओर तेसखे काई की तेसरी जगा पाँदे राजा बणी गा। 31 पेकह रे ओर सारे काम जो तिने कित्ते सेयो इस्राएलो रे राजेया रे इतिआसो री कताबा दे लिखी राखे।

32 रमल्याह रे पाऊ इस्राएलो रे राजा पेकह रे राज्य रे दूजे साले यहूदा रे राजा उज्जियाह रा पाऊ योताम राजा बणी गा। 33 जेबे से राज करने लगेया, तेबे पच्चीया साला रा था ओर सोल़ा साल तक यरूशलेम शईरो पाँदे राज करदा रया। ओर तेसरी माया रा नाओं यरूशा था जो सादोको री बेटी थी। 34 तिने से कित्तेया, जो यहोवे री नजरा दे सई था, मतलब जेड़ा तेसरे बाओ उज्जियाहे कित्तेया था, तेड़ा ई तिने बी कित्तेया। 35 तेबे बी ऊच्चिया जगा नि टाल़िया, प्रजा रे लोक तिना पाँदे तेस बखते बी बलि चढ़ाओ थे ओर तूप बाल़ो थे। यहोवे रे मन्दरो रे ऊच्चे बड़े द्वार इने ई बणाए थे। 36 योतामो रे ओर सब काम जो तिने कित्ते, सेयो यहूदा रे राजेया रे इतिआसो री कताबा दे लिखी राखे। 37 तिना दिना रे यहोवा अरामो रे राजा रसीनो खे ओर रमल्याह रे पाऊ पेकह खे, यहूदा रे खलाफ पेजणे लगेया। 38 अंतो रे योताम मरीगा, तेबे से तेसरे मूलमर्द दाऊदो रे शईरो दे आपणे बुजुर्गा बीचे दबाईता। तेबे तेसरा पाऊ आहाज तेसरी जगा पाँदे राज करने लगेया।