1 ये चिट्ठी यीशु मसीह रे दास पौलुस और तीमुथियुसो री तरफा ते ए। आँऊ ये चिट्ठी फिलिप्पी नगरो रे रणे वाल़े परमेशरो रे सारे पवित्र लोक, अध्यक्ष और सेवका खे लिखणे लगी रा जो यीशु मसीह रे ए। 2 म्हारे पिता परमेशर और प्रभु यीशु मसीह री तरफा ते तुसा खे कृपा और शान्ति मिलदी रओ।

3 आऊँ जेबे-जेबे तुसा खे याद करूँआ, तेबे-तेबे आपणे परमेशरो रा धन्यवाद करूँआ। 4 और जेबे कदी तुसा सबी खे प्रार्थना करूँआ, तो सदा खुशिया साथे बिनती करूँआ। 5 कऊँकि तुसे पईले दिनो ते लयी कि आजो तक प्रभु यीशुए रे सुसमाचारो खे फैलाणे खे मेरे सहभागी रई रे। 6 और माखे एते गल्ला रा विश्वास ए कि परमेशरे जिने तुसा रे खरा काम शुरू करी राखेया, तेस ई से काम जेबे यीशु मसीह फेर वापस आऊणा तेस दिनो तक पूरा करना।

7 ये खरा ए कि आऊँ तुसा सबी खे एड़ा ई बिचार करुँ, कऊँकि आऊँ तुसा ते बऊत प्यार करूँआ और जेबे आँऊ जेला रे ए और सुसमाचारो री रक्षा खे और इजी खे सच्च साबित करने रे तुसे सब मां साथे कृपा रे शामिल ए। 8 इदे परमेशर मेरा गवा ए कि जिंयाँ यीशु मसीह तुसा ते प्यार करोआ सच्ची आँऊ बी तिंयाँ ई तिना जेड़ा तुसा सबी ते प्यार करूँआ। 9 और आऊँ ये प्रार्थना करूँआ कि तुसा रा एकी दूजे ते प्यार, ज्ञान और पुरिया समजा साथे ओर बी बढ़दा जाओ। 10 तेबेई तुसे इना गल्ला खे परखणे रे जोगे ऊई जाओ कि कुण जी गल्ल करने खे खरी ए और मसीह रे फेर वापस आऊणे रे दिनो तक पवित्र और निष्कलंक बणे रे रओ। 11 और यीशु मसीह रे जरिए पैदा ऊणे वाल़े धार्मिकता रे कामा ते आपू खे परी लओ, जेते कि परमेशरो री महिमा और स्तुति ऊँदी रओ।

12 ओ प्यारे साथी विश्वासियो! आऊँ चाऊँआ कि तुसे ये जाणी लो कि मां पाँदे जो बीती रा, तिजी री बजअ ते बऊत सारे लोके सुसमाचारो पाँदे विश्वास कित्तेया। 13 एथो तक कि कैसर राजे रे राज्य री सारी पल़टण और बाकि बचे रे सारे लोका सामणे ये आईगा रा कि आऊँ मसीह री खातर जेला रे कैद ए। 14 और प्रभुए रे जो पाई ए, तिना बीचा ते बऊत जणे मेरे जेला रे कैद ऊणे री बजअ ते, मजबूत विश्वासो साथे, परमेशरो रा वचन नशंग सुनाणे री ओर बी ईम्मत करोए।

15 ये सच्च ये कि कुछ लोक जल़न और चगड़े री बजअ ते मसीह रे सुसमाचारो रा प्रचार करोए और कुछ खरे इरादे ते। 16 ये एड़े लोक जो मसीह रे सुसमाचारो रा प्रचार अच्छे इरादे और प्यारो ते करोए। सेयो जाणोए कि आँऊ यीशु मसीह रे सुसमाचारो रा जबाब देणे खे जेला रे कैद ए 17 पर ये चगड़ा करने वाल़े लोक जो सच्चाईया ते नि पर आपणे मतलबो खे मसीह रा सुसमाचार सुणाओए, ये सोचोए की कि जेबे आँऊ जेला रे कैद ए, माखे ओर जादा क्ल़ेश पैदा करो। 18 तो क्या ऊआ? बस ये कि हर किंयाँ चाए बुरिया बजअ ते, चाए सच्चाईया ते मसीह रा सुसमाचार सुणाया जाओआ। आऊँ इजी ते खुश ए और खुश ऊँदा रणा बी।

19 कऊँकि आऊँ जाणूंआ कि तुसा री प्रार्थना रे जरिए और यीशु मसीह री तरफा ते पेजी री पवित्र आत्मा री मतादा रे जरिए, इजी रा ईनाम, माखे अच्छा ई ऊणा। 20 आऊँ तो दिलो ते येई इच्छा और उम्मीद राखूँआ कि आऊँ किजी बी गल्ला रे शर्मिंदा नि ओऊँ, पर जेड़ी मेरी बड़ी इम्मता री बजअ ते, मसीह री तारीफ मेरे शरीरो रे जरिए सदा ऊँदी रओई, तेड़ा ई एबे बी ओ, चाए आऊँ जिऊँदा रऊँ या मरी जाऊँ। 21 कऊँकि जे आँऊ जिऊँ तो सिर्फ मसीह री खातर, और जेबे आँऊ मरूँ तो से माखे बऊत ई अच्छा ऊणा कऊँकि आँऊ मरने ते बाद बी मसीह साथे रणा। 22 पर जे शरीरो रे जिऊँदा रणा ई मेरे कामो खे फायदेमंद ए, तो आऊँ नि जाणदा कि केसखे चुणुँ? 23 कऊँकि इना दुँईं बीचा ते केसी एकी खे चुणना माखे बऊत ई कठण ए। जिऊ तो चाओआ कि मरी की मसीह गे जाई की रऊँ, कऊँकि ये माखे बऊत ई अच्छा ए। 24 पर शरीरो रे रणा ओर बी जरूरी ए कऊँकि तुसा खे मेरी मतादा री जरूरत ए। 25 इजी खे कि माखे इजी रा विश्वास (भरोसा) ए कि आऊँ जिऊँदा रणा, बल्कि तुसा सबी साथे रणा, जेते की आँऊ तुसा खे विश्वासो रे मजबूत करने और तिदे खुश रणे रे तुसा री मताद करूँगा। 26 जो कमण्ड तुसे मेरे बारे रे करोए, से मेरा तुसा गे जेला ते फेर वापस आऊणे ते, यीशु मसीह रे ओर जादा बड़ी जाओ।

27 बस इतणा करो कि तुसा रा चाल-चलण मसीह रे सुसमाचारो जोगा ओ, तेबे चाए आऊँ आईकि तुसा खे देखूँ, चाए ना बी आऊँ, बस तुसा रे बारे रे ये सुणूँ कि तुसे एक ई इरादे रे मजबूत रओ और एक मन ऊई कि सुसमाचारो रे विश्वासो खे मईणत करदे रओए। 28 केसी बी गल्ला रे बिरोदिया ते डरदे नि, तुसा री ईम्मत तिना खे नाशो रा साफ चिह्न् ए, पर तुसा खे उद्धारो रा और ये परमेशरो री तरफा ते ए। 29 कऊँकि मसीह री बजअ ते तुसा पाँदे ये कृपा ऊई कि ना बस तेस पाँदे ई विश्वास करो, पर तेसरिया तँईं दु:ख बी सईन करो, 30 और तुसा खे तेड़ा ई दुःख सईन करना ए, जेड़ा तुसे आऊँ सईन करदे देखी राखेया, जेबे आँऊ तुसा साथे फिलिप्पी नगरो रे था और एबे बी सुणोए कि दुःख सईन करूँआ।