1 देखो परमेशरे यरूशलेम शईरो खे आपणी सजा रे खतरे दे पाईता! तिने इस्राएलो री शोभा सर्गो ते तरतिया पाँदे पटकी ती ओर प्रकोपो रे दिने आपणे पैरा री चौकी याद नि राखी। 2 परमेशरे गुस्से दे आई की याकूब मतलब यहूदा प्रदेशो रिया सब दवाला टाल़ी तिया, यहोवे रोषो दे आई की यहूदा प्रदेशो रे लोका रे सारे मजबूत गढ़ टाल़ी की माट्टिया रे मलाई ते; तिने परदाना समेत राज्य अपवित्र ठराई राखेया। 3 तिने रोषो दे आई की इस्राएलो री सारी तागत खत्म करिती; तिने दुश्मणा सामणे तिना री मताद करने ते आपणा मूँ फेरी ता रा; तिने चऊँ कनारे स्वा करदी ऊई लौ जेड़ा याकूब फूकी ता। 4 यहोवे दुश्मण बणी की तीरक बाण चढ़ाया ओर बैरी बणी की दाँणा आथ बढ़ाई की खड़ा ऊई रा ओर यहूदा रे लोक जितणे देखणे दे बांके थे, तिने सेयो सब काईते; यरूशलेम शईरो रे तम्बूए पाँदे तिने आपणा गुस्सा आगी जेड़ा पड़काई ता रा।

5 परमेशर आसा इस्राएलिया रा दुश्मण बणीगा दा ए, तिने इस्राएल निगल़ी ता; तिने तेसरे सारे मईल खत्म करीते ओर तेसरे मजबूत गढ़ नाश करीते ओर यहूदा प्रदेशो रे लोका रा शोग ओर रोणा-पीटणा बऊत बढ़ाईता। 6 यहोवे आपणा मन्दर बगीचे रे मचरूँडणे जेड़ा अचाणक रूड़ाईता, तिने आपणा मिलणे वाल़ा तम्बू तोड़ी ता; यहोवे सिय्योनो दे ठराए रे त्यार ओर रामो रे दिन दोनो पुलाई ते ओर आपणे पड़के रे रोषो ते राजा ओर पुरोईत दुँईं रा तिरस्कार करी ता। 7 परमेशरे आपणी बेदी मनो ते उतारी ती ओर आपणे पवित्र मन्दर यरूशलेम बेज्जतिया साथे छाडी ती; तिने मन्दरो रिया कांदा दुश्मणा रे वशो दे करी तिया; तिने दुश्मणे यहोवे रे मन्दरो दे एड़ा जीतणे री जयकारा रा आल्ला कित्तेया कि मानो ठराए रे त्योआरो रा दिन ओ। 8 यहोवे सिय्योनो री दवाल* तोड़ने री ठाणी ली थी: तिने डोरी ओर साल़ पाई ओर से पूरी तरआ ते नाश करिती; तिने किले ओर दवाला दुँईं ते शोग मनवाया, सेयो दोनो कट्ठे टाल़ी ते। 9 सिय्योन शईरो रे द्वार जमीना दे तसी गे रे, तिना रे साँगल़ तिने तोड़ी की नाश करीते। तेथो रे राजा ओर परदान दूजी जातिया बीचे रणे रिया बजा ते बिना बिधानो ते ऊईगे ओर यरूशलेमो रे नबिया खे यहोवे रे दर्शण नि मिलदे। 10 यरूशलेमो रे बुजुर्ग दु:खी ऊई की जमीना पाँदे चुपचाप बैठी रे; तिने आपणे सिरो पाँदे तूड़ सेटी ओर चादरी की लक बानी राखेया; यरूशलेमो री कुआँरिये आपणा-आपणा सिर जमीना तक थाले चुकाया। 11 मेरिया आखी आसू बाह्ंदे-बाह्ंदे थकी गिया, मेरी आन्तड़िया कमजोर ऊईगिया; मेरे लोका री बेटिया रे नाशो रिया बजा ते मेरा काल़जा फटीगा रा, कऊँकि बच्चे, बल्कि दूद पीणे वाल़े बच्चे बी शईरो रे चौको पाँदे बेओश ओए। 12 सेयो बच्चे आपणी-आपणी माया खे रोई की बोलोए, "नज्ज ओर अंगूरा रा रस केई ए? सेयो शईरो रे चौका दे कायल कित्ते रे माणूंआ जेड़े बेओश ऊई की आपणे प्राण आपणी माया री गोदा दे छाडोए।"

13 ओ यरूशलेमो रे लोको, आऊँ तेरे बारे दे क्या बोलूँ? आऊँ तेरी उपमा केस साथे करुँ? ओ सिय्योनो री कुआँरी बेटी, आऊँ कुणजी चीज तां जेड़ी ठराई की ताखे शान्ति देऊँ? कऊँकि तेरा दु:ख समुद्रो जेड़ा बड़ा ए; ताखे कुण ठीक करी सकोआ? 14 तेरे भविष्यबक्ते यहोवे रे दर्शणो रा दावा करी की ता साथे बेकार ओर मूर्खता री गल्ल करी राखी; तिने तेरे पाप नि बताए, नई तो तूँ गुलाम नि ऊणी थी; पर तिने ताखे बेकार ओर चूठे वचन बताए। जो ताखे देशो ते काडणे री बजा ऊए। 15 सारे यात्री तां पाँदे चाड़िया बजाओए; सेयो यरूशलेमो रे लोका पाँदे आपू बीचे एकी दूजे ते पूछी की चाड़िया बजाओए ओर सिर ईलाओए, "क्या ये सेई शईर ए, जेतेखे परमसुन्दरी ओर सारी तरतिया री खुशिया री बजा बोलो थे?"* 16 तेरे सबी दुश्मणे तेरे खलाफ बोलेया, सेयो चाड़ी बजाओए ओर दाँद पीसोए, सेयो आपू बीचे एकी दूजे ते पूछोए, "आसे इस्राएल निगल़ी ता! जेस दिनो खे आसे न्याल़ूँ थे, से येई ए, से आसा खे मिली गा, आसे तेसखे देखी चूकी रे।" 17 यहोवे जो कुछ ठाणेया था सेई कित्तेया बी, जो वचन से पुराणे बखतो ते बोलदा आई रा सेई तिने पूरा बी कित्तेया; तिने निर्दयी ऊई की से टाल़ी ता, तिने दुश्मण तां पाँदे खुश कराये ओर तेरे दुश्मणा री तागतबर बढ़ाई। 18 यरूशलेमो रे लोक परमेशरो रिया तरफा खे तन-मनो ते बुलाओए। ओ सिय्योनो री कुआँरी बेटी, आपणे आसू दिन-रात नदिया जेड़े बाह्दीं रओ! जरा बी राम नि कर, ना ई तेरिया आखी खे चैन मिलो! 19 सारिया राती दे बार-बार उठी की चींगेया कर! परमेशरो सामणे आपणे मनो रिया गल्ला खे खाड्डा रे पाणिये जेड़िया लटी दे। तेरे बच्चे जो हर सड़का रे सिरे पाँदे पूखा रिया बजा ते बेओश ऊणे लगी रे, तिना रे प्राणो रिया खातर आपणे आथ परमेशरो रिया तरफा खे ऊबे चक।

20 ओ यहोवा देख ओर त्यानो साथे देख कि तैं ये सारा दु:ख केसखे देई राखेया? क्या जवाणसा आपणा फल, मतलब आपणे गोदा रे बच्चेया खे खाओ? ओ प्रभु, क्या पुरोईत ओर भविष्यबक्ता खे तेरी पवित्र जगा दे काया करो? 21 सड़का दे जवान ओर स्याणे दोनो जमीना दे पड़ी रे; मेरी कुआँरिया ओर जवान लोक तलवारी साथे काईते रे; तैं सेयो तेस दिने काये जेस दिने ताखे रोष आया; तैं सेयो निर्दयी ऊई की फाटी ते। 22 तैं मेरे दुश्मण मेरे चऊँ कनारा ते डरो रो त्योआर मनाणे खे बुलाई राखे, ओर यहोवे रे रोषो रे दिने ना तो कोई नठी की निकल़ेया ओर ना ई कोई बचेया; मेरे दुश्मणे मेरे बच्चेया री अत्या करिती, जो मैं पाल़े ओर प्यार कित्तेया।