मरकुस 5

याईरो री मरी री मुन्नी और एक बमार जवाणस

21 जेबे यीशु किस्तिया रे वारले कनारे आए और समुद्रो रे कनारे पऊँची गे तेबे एक बड़ी पारी पीड़ तिना गे कट्ठी ऊईगी। 22 तेबे याईर नाओं रे प्रार्थना रे कअरो रे सरदारा बीचा ते एक तेती आया और यीशुए खे देखी की तिना रे पैरो पाँदे पड़ी गा। 23 तेबे तिने बिनती कित्ती और बोलेया, "मेरी छोटी बेटी मरने वाल़ी ए, तुसे मेरे कअरे आई की तेसा पाँदे आथ राखो, ताकि से ठीक ऊई जाओ और जिऊँदी रओ।" 24 तेबे यीशु तेस साथे चली गे, और एक बड़ी पारी पीड़ बी तिना साथे आईगी, एथो तक की लोक तिना पाँदे रूड़ी जाओ थे।

25 तेबे एक जवाणस जो तेसा पीड़ा रे थी, जेसा खे बारा साला ते खून बइणे री बमारी थी 26 और से आपू खे ठीक ऊणे री तँईं कई बैदा गे गई और आपणा सब कुछ खर्च करी ता, पर से ओर बी बमार ऊईगी और कुछ फाईदा नि ऊआ। 27 यीशुए रे बारे रे सुणी की से पीड़ा ते पीछे ते आई और तिना रे टाल्ले छूँएं। 28 कऊँकि से बोलो थी, "जे आऊँ तिना रे टाल्ले ई छुँईं लऊँगी, तो ठीक ऊई जाणी।" 29 और तेबुई तेसा रा खून बइणा बंद ऊईगा और तेसे आपणे शरीरो ते जाणी ला कि मेरी बमारी ठीक ऊईगी। 30 यीशुए तेबुई आपू रे जाणी ला, "मांते सामर्थ निकल़ी री।" तेबे तिने पीड़ा रे पीछे मुड़ी की पूछेया, "मेरे टाल्ले किने छुँए?" 31 तिना रे चेलेया तिना खे बोलेया, "तुसा खे पता तो आए कि इतणी पीड़ तुसा पाँदे पड़ी री और तुसे बोलोए, ‘आऊँ किने छूँयां?’ " 32 तेबे यीशु ये देखणे री तँईं, "आऊँ किने छूँयां" सेयो चऊँ कनारे देखणे लगे। 33 तेबे से जवाणस ये जाणी गी कि मां साथे केड़ी पलाई ऊई री, से डरदी और थरथरांदी ऊई आई और यीशुए रे पैरा पाँदे पड़ी गी और तेसे सारा आल सच्च-सच्च तिना खे सुणाया। 34 यीशुए तेसा खे बोलेया, "बेटिये, तेरे विश्वासे तूँ ठीक कित्ती। बेफिकर ऊई की जा और आपणी एसा बमारिया ते बची री रओ।"

35 यीशु ये बोलणे ई लगी रे थे कि प्रार्थना रे कअरो रे सरदारो रे कअरो ते कुछ लोक आए और बोलेया, "तेरी मुन्नी मरी गी। एबे गुरूओ खे कष्ट कऊँ लगी रा देणे?" 36 जो गल्ल सेयो करने लगी रे थे, से यीशुए अणसुणी करी की प्रार्थना रे कअरो रे सरदारो खे बोलेया, "डर नि; बस विश्वास राख।" 37 तेबे यीशुए पतरस, याकूब और तेसरा पाई यूहन्ने खे छाडी की कोई बी आपू साथे आऊणे नि दित्तेया। 38 तेबे प्रार्थना रे कअरो रे सरदारो रे कअरे पऊँची की तिने लोक रोंदे ऊए और राड़िया देंदे ऊए देखे। 39 तेबे यीशुए पीतरे जाई की तिना खे बोलेया, "तुसे रोणे और राड़िया कऊँ लगी रे देणे? तेरी मुन्नी मरी नि रई, पर सऊणे लगी री।" 40 सेयो ये गल्ल सुणी की यीशुए रा मजाक लगे ऊड़ाणे, पर तिने सब जणे बारे निकयाल़ी की मुन्निया रे माए-बाओ और आपणे तीनो चेलेया साथे पीतरे गया, जेती मुन्नी थी पड़ी री। 41 तेबे तिने मुन्निया रा आथ पकड़ी की तेसा खे बोलेया, "तलीता कूमी!" मतलब "ओ मुन्निए आऊँ ताखे बोलूँआ कि उठ।" 42 तेबे मुन्नी उठी और फटाफट चलणे-फिरने लगी। से बारा साला री थी। ये देखी की सारे लोक बऊत हैरान रई गे। 43 तेबे तिने तिना खे सावधान करी की बोलेया, "ये गल्ल केसी गे नि बोलणी और एसा मुन्निया खे कुछ खाणे खे देओ।"