Mateus 14

पाँज ह्जार माणूंआ खे खुलाणा

13 जेबे यीशुए ये सब सुणेया, तेबे सेयो किस्तिया रे बैठी की सुनसाण जगा रे लग जे चली गे और जेबे लोके ये सुणेया तेबे सेयो नगरो-नगरो रिये हांडी की तिना पीछे आईगे। 14 यीशुए निकल़ी की एक बड़ी पीड़ देखी और तिना पाँदे तिना खे तरस आया और तिने तिना रे बमार ठीक कित्ते।

15 जेबे साँज ऊई, तेबे तिना रे चेले तिना गे आए और बोलणे लगे, "एती तो सुनसाण जगा ए और देर लगी री ऊणे, तुसे लोका खे बिदा करो, ताकि सेयो जाई की बस्तिया रे आपू खे रोटी खरीदी सको।"

16 यीशुए तिना खे बोलेया, "तिना रा जाणा जरूरी निए, तुसेई इना खे खाणे खे देयो।" 17 तिने बोलेया, "एती तो आसा गे पाँज रोटिया और दो मछलिया छाडी की कुछ निए।" 18 यीशुए बोलेया, "तिना खे मांगे ली आओ।" 19 तेबे तिने लोका खे काओ पाँदे बैठणे खे बोलेया, तेबे तिने सेयो पाँज रोटिया और दो मछलिया लईया और स्वर्गो खे देखेया और धन्यवाद कित्तेया और रोटिया तोड़ी-तोड़ी की चेलेया खे दित्तिया और चेलेया लोका खे। 20 जेबे सब खाई की रजी गे, तेबे चेलेया जो टुकड़े थे बचे रे तिना रिया बारा टोकरिया परिया और चकिया। 21 खाणे वाल़े जवाणसा और बच्चेया खे छाडी की तकरीबन पाँज ह्जार मर्द थे।