1 तेबे फेर यीशु तिना साथे उदारणा रे बोलणे लगे, 2 "स्वर्गो रा राज्य तेस राजे जेड़ा ए, जिने आपणे पाऊए रा ब्या कित्तेया। 3 तेबे तिने आपणे दास पेजे कि जाओ, निऊँदा दित्ते रे लोका खे ब्याओ री पाट्टिया रे बुलाओ, पर तिने आऊणा नि चाया। 4 तेबे तिने आपणे दास ये बोली की पेजे, निऊँदा दित्ते रे लोका खे बोलो, देखो, आऊँ पाट्टी त्यार करी चुकेया रा। मेरे बल़द और पाल़े रे डांगर सब बाडी ते रे; और सब कुछ त्यार ए, ब्याओ री पाट्टिया रे आओ। 5 पर तिने कोई परवा नि कित्ती और कोई आपणे डोरूआ खे और कोई आपणे कामो खे चली गा। 6 और जो बचे, तिने सेयो दास पकड़े और तिना रा मजाक ऊड़ाया और काई ते। 7 जेबे राजे ये सुणेया तेबे तिना खे रोष आईगा और तिने आपणी सेना पेजी और जो अत्यारे थे, तिना रा सत्यानाश करी ता और तिना रे नगर फूकी ते। 8 तेबे तिने आपणे दासा खे बोलेया, ब्याओ री रोटी तो त्यार ए, पर खाणे वाल़े नि आए। 9 एबे एड़ा करो कि चौको रे जाओ और जितणे लोक तुसा खे मिलोगे, तिना खे रोटी खाणे ली आओ। 10 तेबे तिने दासे सड़का दे जाई की क्या खरे बुरे जो बी मिले सबी खे कट्ठे करी की ली आया और ब्याओ रा कअर माणूंआ साथे परी गा।

11 "जेबे राजा मईमाना खे देखणे पीतरे गया, तेबे तिने देखेया कि एक माणूंए ब्याओ रे टाल्ले नि थे पइने रे जो राजे ब्याओ खे तेसखे पईनणे खे दित्ते थे। 12 तिने तेसते पूछेया, ओ दोस्त, तूँ एती ब्याओ रे टाल्ले पईनी की कऊँ नि आयी रा, जो ताखे मैं पईनणे खे दित्ते थे? और से माणूं चुप ऊईगा। 13 तेबे राजे, दासा खे बोलेया कि एसरे आथ-पैर बानो और एसखे बारे न्हेरे रे राखी देओ, तेती रोणा और दाँद किरड़ना ई ऊणा। 14 कऊँकि बुलाए रे तो बऊत ए, पर चूणे रे थोड़े ईए।"

15 तेबे फरीसी गए और आपू बीचे सोच-बिचार लगे करने कि एसखे किंयाँ फसाइए? 16 तेबे यहूदी अगुवे यीशु गल्ला रे फसाणे री तँईं कई फरीसी चेले और हेरोदेस राजे रा समर्थन करने वाल़े यहूदी तिना गे पेजे। और तिने आयी की तिना खे बोलेया, "ओ गुरू! आसे जाणूंए कि तुसे सच्चे और परमेशरो री बाट सच्चाईया साथे सिखाओए, और केसी री परवा नि करदे, कऊँकि तुसे माणूंए रा मूँ देखी की गल्ल नि करदे। 17 तो तुसे आसा खे बताओ कि तुसे क्या समजोए? कैसरो खे कर देणा खरा ए, या नई।" 18 यीशुए खे तिना री दुष्टता पता थी और तिने बोलेया, "ओ कपटियो; माखे कऊँ परखोए? 19 करो रा सिक्का मांगे दखाओ।" तेबे सेयो तिना गे एक चाँदिए रा सिक्का ली आए। 20 तिने तिना ते पूछेया, "ये मूर्ति और ये नाओं केसरा ए?" 21 तिने बोलेया, "कैसरो रा।" तेबे तिने बोलेया, "जो कैसरो राए से कैसरो खे और जो परमेशरो राए से परमेशरो खे देओ।" 22 ये सुणी की सेयो हैरान ऊईगे और तिना खे छाडी की चली गे।

23 तेसी दिने सदूकी, जो बोलो थे कि जो मरी जाओए तिना रा दुबारा जन्म नि ऊँदा, यीशुए गे आए और पूछणे लगे, 24 "ओ गुरू, मूसे बोलेया था कि जे कोई बिना ल्वादा ते मरी जाओ, तो तेसरा पाई तेसरी लाड़िया साथे ब्या करी लओ और आपणे पाईए खे वंश पैदा करो। 25 एबे आसा रे सात पाई थे, पईला पाई ब्या करी की बिना ल्वादा तेई मरी गा और ल्वाद ना ऊणे री बजअ ते आपणी लाड़िया खे आपणे पाईए खे छाडी गा। 26 तिंयाँ ई दूजे और तीजे बी एड़ा ई कित्तेया और साता साथे एड़ा ई ऊआ। 27 सबी ते बादो ते, से जवाणस बी मरी गी। 28 जेबे से जिऊँदी ऊणी तो केसरी लाड़ी ऊणी? कऊँकि से तो सबी री लाड़ी रई चूकी थी।" 29 यीशुए तिना खे ज्वाब दित्तेया, "तुसे पवित्र शास्त्र और परमेशरो री सामर्थ नि जाणदे, तेबेई तो तुसा ते पूल ऊई री। 30 कऊँकि जेबे जिऊँदे ऊणे, तेबे ब्या-शादिया नि ऊणिया, पर सेयो स्वर्गो रे परमेशरो रे स्वर्गदूतो जेड़े ऊणे। 31 पर क्या तुसे, मरे रे जिऊँदे ऊणे रे बारे रे ये वचन नि पढ़ेया, जो परमेशरे तुसा खे बोलेया, 32 आऊँ अब्राहमो रा परमेशर, इसहाको रा परमेशर और याकूबो रा परमेशर आ? सेयो मरे रेया रे नि, पर जिऊँदेया रे परमेशर ए।" 33 ये सुणी की लोक तिना रे उपदेशो ते हैरान ऊईगे।

34 जेबे फरीसिये सुणेया कि तिने सदूकिये रे मूँ बन्द करी ते, तो सेयो कट्ठे ऊईगे। 35 तेबे तिना बीचा ते एक धर्मशास्त्रीए परखणे खे तिना ते पूछेया, 36 "ओ गुरू! बिधानो रे कुण जी गल्ल बड़ी ए?" 37 यीशुए तेसखे बोलेया, "तूँ परमेशर आपणे प्रभुए साथे, आपणे पूरे मन, आपणे पूरे प्राण और आपणी पूरी अक्ला साथे प्यार राख। 38 बड़ी और मुख्य आज्ञा तो येईए। 39 और एसा ई जेड़ी ये दूजी बी ए, ‘तूँ आपणे पड़ोसिये साथे आपू जेड़ा प्यार राख।’ 40 येई दो आज्ञा सारा बिधान और भविष्यबक्तेया रा आधार ए।"

41 जेबे फरीसी कट्ठे थे, तेबे यीशुए तिना ते पूछेया, 42 "मसीह रे बारे रे तुसे क्या समजोए? से केसरी ल्वाद ए?" फरीसिये बोलेया, "दाऊदो री।" 43 तेबे तिने फेर पूछेया, "तेबे दाऊद आत्मा रे परी की तेसखे प्रभु कऊँ बोलोआ? 44 प्रभुए, मेरे प्रभुए खे बोलेया, ‘मेरे दाँणे बैठ, जदुओ तक आऊँ तेरे बैरिया खे तेरे पैरा निठे नि ल्याई देऊँ।’ 45 तो, जेबे दाऊद तेसखे प्रभु बोलोआ, तो से तेसरा पुत्र किंयाँ ऊआ?" 46 इजी रा ज्वाब कोई नि देई सकेया। पर तिजी ते बादो ते केसी खे बी तिना ते कुछ पूछणे री ईम्मत नि ऊई।