1 जिना दिना दे न्यायी लोक इस्राएलो पाँदे राज करो थे तिना दिना दे तेस देशो दे अकाल़ पड़ेया, तेबे यहूदा प्रदेशो रे बेतलेहम शईरो रा एक माणूं आपणी लाड़ी ओर दोनो पाऊआ खे साथे लई की मोआब देशो दे परदेशी ऊई की रणे खे चलीगा। 2 तेस माणूंए रा नाओं एलीमेलेक था ओर तेसरी लाड़िया रा नाओं नाओमी था। तिना रे दुँईं पाऊआ रे नाओं महलोन ओर किल्योन थे। सेयो यहूदा प्रदेशो रे बेतलेहम शईरो रे एप्राता रे रणे वाल़े थे। ओर जेबे सेयो मोआबो रे देशो दे आए, तो तेथी ई रणे लगे। 3 जेबे सेयो तेथी रणे लगी रे थे तेबे नाओमिया रा लाड़ा एलीमेलेक मरी गा ओर नाओमी ओर तेसा रे दोनो पाऊ रयी गे। 4 तिने दुँईं जवान माठेया एक-एक मोआबिन बेटिया साथे ब्या करी ला; एकी बेटिया रा नाओं ओर्पा ओर दूजिया रा नाओं रूत था। सेयो तेते जगा दे कोई दस साला तक रये। 5 जेबे महलोन ओर किल्योन दोनो मरी गे। तेबे नाओमी आपणे दोनो पाऊआ ओर लाड़े रे मरने ते बाद कल्ली ऊईगी थी।

6 कुछ बखतो ते बाद नाओमीए मोआब देशो दे रंदे ऊए इस्राएलो रे बारे दे ये सुणेया, कि यहोवे आपणी प्रजा रे लोका री सम्बाल़ लई ओर तिना खे अच्छी फसल देई की आशीष देई राखी। तेबे नाओमी ओर तेसा रिया दोनो बऊआ मोआब देशो ते आपणे देशो खे आऊणे खे त्यार ऊईया। 7 तेबे से तेसा जगा खे छाडी की जेती से रणे लगी री थी, आपणी दुँईं बऊआ साथे इस्राएलो रे यहूदा प्रदेशो रिया तरफा खे वापस आऊणे री बाटा दे चलणे लगी। 8 तेबे नाओमीए बाटा दे आपणी दुँईं बऊआ खे बोलेया, "तुसे आपणे पेयुके खे वापस ऊई जाओ। ओर जेड़ी तुसे आपणे-आपणे लाड़ेया साथे जो मरी गे ओर मां साथे प्यार राखेया, तेड़ा ई यहोवा तुसा ते बी प्यार करो। 9 आऊँ ये बी प्रार्थना करूँई कि यहोवा एड़ा करो कि तुसे दोनो फेर आपणा कअर बसाई सको ओर अच्छा परिवार मिलो। तेबे तेसे सेयो चूम्मिया ओर सेयो जोरे-जोरे की रोणे लगिया।" 10 तिने नाओमिया खे बोलेया, "ना, आसा तेरे लोका साथे रणे खे तां साथे चलणा।" 11 पर नाओमीए बोलेया, "ओ मेरी बेटियो, तुसे आपणे पेऊके खे वापस ऊई जाओ। मां साथे जाणे ते तुसा खे कोई फाईदा नि ए आऊँ तुसा रिया तँईं ओर माठे पैदा नि करी सकदी ताकि तुसे तिना ते ब्या करी सको। 12 ओ मेरी बेटियो, आपणे पेऊके खे वापस ऊई जाओ, कऊँकि आऊँ दुबारा ब्या करने खे बऊत बुजुर्ग ऊई गी री ओर चाए ये ऊई बी जांदा, ओर आज राती मेरा ब्या बी ऊई जांदा, ओर मेरे माठे बी जमीं जांदे, तो बी इजी ते कोई फाईदा नि ए, 13 क्या तुसे तिना रे जवान ऊणे तक केसी ओरी ते ब्या करने खे ना करने रा इंतजार करना? ना, बिल्कुल नि, मेरी बेटियो! मां साथे नि आओ कऊँकि मेरा दु:ख तुसा रे दु:खो ते बड़ा ए यहोवे माखे सजा देई राखी।" 14 ओर सेयो फेर जोरे-जोरे की रोणे लगिया, ओर ओर्पे तो आपणी सासू चूम्मी ओर तेथा ते चली गी। पर रूत नाओमिया ते लग नि ऊई। 15 तेबे नाओमीए रूता खे बोलेया, "देख, तेरी जठाणी तो आपणे लोका ओर आपणे देवतेया गे वापस ऊई गी री; ताखे बी एड़ा ई करना चाईयो।" 16 पर रूते नाओमिया खे ज्वाब दित्तेया, "माखे ये नि बोल कि आऊँ ताखे छाडी की वापस ऊई जाऊँ। तां जेती जाणा मां तां साथे तेथी आऊणा; तूँ जेती बी रये मां बी तेथी रणा। तेरे लोक मेरे लोक ऊणे ओर तेरा परमेशर मेरा परमेशर ऊणा। 17 जेती तूँ मरेगी, तेती मां बी मरना ओर तेथी माखे माट्टी बी देणी। जदुए तक मौत आसा खे लग नि करो तदुए तक मां तांते लग नि ऊणा, जे मौता खे छाडी की ओरी केसी बजअ ते आऊँ तुसा ते लग ओऊँ, तो यहोवा माखे सख्त सजा देयो!" 18 तेबे नाओमीए ये जाणी की कि रूत आपणे देशो खे वापस जाणे खे त्यार नि ए। तेबे तेसे रूता खे ओर जादा एतेरे बारे दे बोलणा बंद करिता। 19 तेबे सेयो दोनो चली पड़िया ओर बेतलेहम शईरो दे पऊँछिया, बेतलेहमो दे तिना खे देखी की सारे शईरो रे लोक तिना रे बारे दे गल्ला करने लगे; ओर जवाणसे बोलेया, आसा खे ये परोसा ई नि ऊँदा कि ये नाओमी ए, 20 नाओमीए तिना खे बोलेया, "माखे नाओमी*1:20 नाओमी सुहावणी, सुखद नि बोलो।" बल्कि माखे "मारा"*1:20 "मारा" कड़वाअट बोलो। सर्वशक्तिमान परमेशरे मेरे जीवनो दे बड़ा दु:ख देई राखेया। 21 आऊँ परे पूरे परिवारो साथे एथा ते गई थी पर यहोवे आऊँ खाली आथ वापस ल्याई, सर्वशक्तिमान यहोवा मेरे खलाफ ऊई गा दा ए, जेतेते आऊँ दु:ख उठाणे लगी री। माखे नि लगदा कि एबे तुसा खे माखे नाओमी बोलणा चाईयो, 22 इजी री खातर नाओमी मोआब देशो ते बेतलेहम आई ओर तेसा साथे तेसा री बऊ रूत बी आई जो मोआबी जवाणस थी, जेबे से बेतलेहम पऊँची तेती तेस बखते जौ री फसल बाडणे रा बखत शुरू ई ऊआ था।