1 हुनी अवं तुश्शे तैन सवालां केरो जुवाब देताईं, ज़ैना तुसेईं अपने चिट्ठी मां पुछ़े, तुसेईं पुछ़ू, इन रोड़ूए कि लोक ड्लाह न बनान? 2 हाँ इन ज़रूरी आहे कि बदमाशी केरनेरे डरे सेइं हर मड़देरी कुआन्श, ते हर कुआन्शरो मुन्श भोए। 3 मुन्श अपने कुआन्शरू हक पूरू केरे; ते तेन्च़रे कुआन्श भी अपने मुन्शेरू। 4 कुआन्शी अपने जिसमे पुड़ अधिकार नईं, पन तैसेरे मुन्शेरो अधिकारे; तेन्च़रे मुन्शे भी अपने जिसमे पुड़ अधिकार नईं, पन कुआन्शी। 5 तुस एक्‍की होरि करां अलग न भोथ; पन सिर्फ थोड़े च़िरेरे लेई बिस्तारे सेइं कि प्राथनारे लेई फुर्सत मैल्हे, ते फिरी अकोट्ठे भोथ, कि एरू न भोए, शैतान तुसन परखे। 6 पन ज़ैन अवं इन ज़ोने लगोरोईं ई सुझावे, न कि हुक्म। 7 अवं इन चाताईं, कि ज़ेरो अवं अड्लाव आई, तेरहे सब मैन्हु भोन; पन परमेशरे किछन ड्लाह केरनू वरदान दित्तोरूए, ते किछन अकैल्‍लू रानेरू वरदान दित्तोरू।

8 मेरी सलाह अड्लां ते विधवां केरे ईए, कि तैना अड्लाहे रान, ज़ेन्च़रे अवं आईं। 9 पन अगर तैना अपनो आप कैबू न केरि बटन, त ड्लाह बनान, किजोकि ड्लाह बनानो इच्छान मां मसत राने करां रोड़ूए।

10 ज़ैन केरो ड्लाह भोवरोए, तैन केरे लेई अवं नईं, बल्के प्रभु हुक्म देते, कि कुआन्श अपने मुन्शे करां अलग न भोए। 11 (अगर अलग भोइ गाए, त होरो ड्लाह न बनाए; या अपने मुन्शे सेइं फिरी मेल मिलाप केरे) ते मुन्श अपने कुआन्शी न शारे।

12 होरन सेइं प्रभु नईं, पन अवं ज़ोताईं, अगर केन्ची विश्वासी ढ्लाएरी कुआन्श विश्वासी न भोए, ते तै कुआन्श तैस साथी राने सेइं खुश भोए, त तै तैस न शारे। 13 ते ज़ैस कुआन्शरो मुन्श विश्वासी न भोए, ते तै मैन्हु तैस साथी राने सेइं खुशी भोए; तै मुन्शे न शारे। 14 किजोकि एरो मुन्श ज़ै विश्वासी न भोए, परमेशर तैस सेइं एरो बर्ताव केरते ज़ेन्च़रे अपने लोकन सेइं, किजोकि तैसेरी कुआन्श मसीही आहे, ते एरी कुआन्श ज़ै विश्वासी न भोए, परमेशर तैस सेइं एरो बर्ताव केरते ज़ेन्च़रे अपने लोकन सेइं, किजोकि तैसेरो मुन्श मसीही आहे। अगर एरू न भोथू कि विश्वास न केरनेबालो मुन्श या कुआन्श परमेशरेरे लोक न भोथे, तैखन तुश्शे बच्‍चे भी परमेशरेरे न भोथे। पन हुनी तुश्शे बच्‍चे भी परमेशरेरे भोइ जे। 15 पन ज़ै मड़द ते कुआन्श विश्वासी न भोए, अगर तैना अलग भोन, त अलग भोने देथ, एस हालती मां कोई विश्वासी ढ्लाए या बेइन बन्धने मां नईं। पन परमेशरे अस कुजेवरेम कि सुखे सेइं ज़ींम। 16 हे कुआन्शव तुस इस गल्‍ली याद रखा कि तुश्शे मुन्श तुश्शे वजाई सेइं मुक्ति हासिल केरि बटतन, ते हे मुन्शव तुस याद रखा कि तुश्शे वजाई सेइं तुश्शी कुआन्शां मुक्ति हासिल केरि बेटतिन।

17 ज़ैन किछ अवं ज़ोने लगोरोईं तैसेरो नचोड़ ईए: हर मैन्हु तैस हालती मां राहोरो लोड़े ज़ै प्रभुए तैस दित्तोरीए ज़ेइस तैनी परमेशरेरू कुजानू शुनू। अवं इन सेब्भी कलीसियान मां एन्च़रे ठहराताईं। 18 अगर कोई मैन्हु ज़ै खतनो कियोरे कुजेवरोए; त तै प्रभु यीशु पुड़ विश्वास केरते, तैस अपनो आप बगैर खतने बालो हिरानेरी ज़रूरत नईं; ते अगर कोई मैन्हु ज़ेसेरो खतनो नईं भोवरो, ते तै प्रभु यीशु पुड़ विश्वास केरते, तैस खतनो करानेरी ज़रूरत नईं। 19 न खतनो किछ चीज़े, ते न खतनो न करानो, बल्के परमेशरेरे हुक्म मन्ने बड़े ज़रूरिन। 20 हर अक ज़ैस हालती मां कुजावरोए, तेन्च़रे राए। 21 अगर तू गुलाम थियो ज़ेइस परमेशरे कुजेवरो थियो, फिरी भी परेशान न भो; पन अगर तू आज़ाद भोइ सकतस, त भो। 22 किजोकि ज़ैना गुलामेरे हालती मां कुजेवरेन, तैना प्रभु मां आज़ादन, तेन्च़रे ज़ैना प्रभु मां आज़ाद कुजेवरेन, तैना मसीहेरे गुलामन। 23 परमेशरे तुस बड़ी कीमत देइतां घिनोरेथ, मैन्हु केरे गुलाम न बना, पन परमेशरेरे गुलाम बना। 24 हे ढ्लाव ते बेइनव, ज़ै ज़ैस हालती मां परमेशरे कुजेवरोए, तै तैस्से हालती मां परमेशरे सेइं साथी राए।

25 कुवैरी केरे लेई मीं प्रभु करां कोई हुक्म नईं मैल्होरो, पन प्रभुए दयाई सेइं मीं अक्ल दित्तोरीए, ज़ैस पुड़ भरोसो कियो गाते, ते अवं ई सलाह देताईं। 26 किजोकि इन दिहाड़न मां विश्वासी लोकां केरे लेई बुरी गल्‍लां भोने लेगोरिन, एल्हेरेलेइ मीं लगते कि इन तुश्शे लेई रोड़ूए, अवं ई सलाह देताईं कि ज़ैना ज़ेरे आन तैना एन्च़रे रान। 27 अगर तेरी कुआन्शे, त तू तैस करां अलग भोनेरी कोशिश न केर, ते अगर तेरी कुआन्श नईं त तू कुआन्शी न तोप। 28 पन अगर तू ड्लाह भी केरस, त पाप नईं; ते अगर कुवारी ड्लाई गाए त कोई पाप नईं; पन एरे लोकन इस दुनियाई मां बड़ी परेशैनी भोल्ही, ते अवं बच़ाने चाताईं। 29 हे ढ्लाव ते बेइनव, अवं इन ज़ोताईं, इश्शो इस दुनियाई मां जादे वक्त नईं राहोरो, एल्हेरेलेइ जादे फिक्र न केरा कि तुश्शी कुआन्शां आन या नईं, पन प्रभुएरी सेवारे बारे मां सोचते राथ। 30 ते तैना ज़ैना लेरां देतन या ज़ैना खुशी आन, या ज़ैना अपनि बनानेरे लेई चीज़न घिन्तन, इन सेब्भी गल्‍लां केरे बारे मां जादे लोड़े सोचोरू (किजोकि इना सब गल्‍लां प्रभुएरी सेवा केरनि बिसरैली)। 31 तैना ज़ैना दुनियारी चीज़ां इस्तेमाल केरतन, तैनेईं तैन सेइं लगाव न लोड़े रखोरो, किजोकि ज़ेन्च़रे अस ज़ानतम ई दुनिया जल्दी खतम भोनेबालीए।

32 मेरी इच्छा ईए कि तुस दुनियारे ज़िन्दगरी खुवैइशन करां आज़ाद राथ, अड्लाव मैन्हु प्रभुएरी सेवा केन्च़रे केरनि ई फिक्र केरते कि प्रभुए खुश केरे। 33 पन ड्लावरो मैन्हु दुनियारी गल्‍लां केरि फिक्री मां रहते, कि केन्च़रे अपने कुआन्शी खुश रख्खे। 34 तैने दूई चीज़ां केरे बारे मां सोचोरू लोड़े, अपनि कुआन्श खुश केरनेरे बारे मां ते प्रभु खुश केरनेरे बारे मां। ड्लावरी ते अड्लाई मां भी फर्के, अड्लाई प्रभुएरी फिक्री मां रहतीए, कि केन्च़रे अपनि आत्मा, ते जिसम दूईये पवित्र रख्खे, पन ड्लावरी दुनियारे फिक्री मां रहतीए, कि अपने मुन्शे खुश रख्खे। 35 ई गल तुश्शे फैइदेरे लेई ज़ोताईं, न कि तुसन फसानेरे लेई, बल्के एल्हेरेलेइ ज़ेन्च़रे लोड़े तेन्च़रे कियूं गाए, ताके तुस अक मन भोइतां प्रभुएरी सेवाई मां लगोरे राथ।

36 ते अगर कोई इन समझ़े कि, अवं एपनी तैस कुवैरारू हक लगोरोईं मारने, ज़ेसेरी जुवानी लगोरी ढलने, त ज़ेन्च़रे चाए तै केरे, इस मां पाप नईं, तै तैसेरो ड्लाह भोने दे। 37 पन अगर ज़ैने बाजी अपने मने मां पक्‍को फैसलो कियोरोए, कोन्ची होरेरे दबावेरे अलावा तै केरते, त तैस कां तै अधिकारे ज़ैन तै केरनू चाते। ते अगर तै फैसलो केरते कि तैसेरी कुई ज़ेरि आहे तेरही रख्खे, तै परमेशरेरी नज़री मां रोड़ू कम केरेलो। 38 ज़ै अपनि कुवैरारो ड्लाह कराते, तै रोड़ू केरते, ते ज़ै न कराए तै भी रोड़ू केरते।

39 ज़ांतगर कोन्ची कुआन्शरो मुन्श ज़ींतो रहते, तांतगर तैस सेइं साथी राहोरू लोड़े, पन ज़ेइस तैसेरो मुन्श मेरि गाए, ज़ैस सेइं चाए ड्लाह बनेई बटतीए, सिर्फ विश्वासी लोकन मां। 40 पन अगर तै फिरी दुबारां ड्लाह न बनाए, त मेरे खियाले मां बड़ी धने ते अवं समझ़ताईं, कि परमेशरेरी आत्मा मीं च़लाने लगोरीए।