इब्रानियों 5

1 परमेशरे हर महायाजक इस्राएली लोकन मरां च़ुनो, ते परमेशरे महायाजक, लोकां केरि तरफां अपनि सेवा कराने लेई ठहराए, ताके तैना लोकां केरे मैफरे लेई च़ढ़तल ते पापां केरू बलिदान च़ाढ़न। 2 किजोकि अक याजक एप्पू बेड़ि गल्‍लन मां कमज़ोरे, एल्हेरेलेइ तै बेसमझ़, ते टेपलोरे लोकन नेरमी सेइं बर्ताव केरि बटते। 3 किजोकि तै एप्पू कमज़ोरे, एल्हेरेलेइ तैस न सिर्फ लोकां केरे पापां केरे लेई, बल्के अपने पापां केरे लेई भी बलिदान च़ाढ़नेरि ज़रूरत भोतीए। 4 कोई मैन्हु अपने लेई महायाजकेरी पदवी अपने आपे सेइं हासिल न केरि सखे, ज़ांतगर तै हारूनेरो ज़ेरो परमेशरेरी तरफां कुजव न गाए।

5 तेन्च़रे मसीहे भी महायाजक बेनतां अपनि आदर न की, बल्के परमेशरे तैस आदर दित्ती ज़ैखन तैने ज़ोवं,

"तू मेरू मट्ठू आस,

अज़ अवं इन बांदू केरताईं तू मेरू मट्ठू आस।"

6 एल्हेरेलेइ परमेशर फिरी एक्‍की होरि ठैरी ज़ोते,

"तू मलिकिसिदकेरो*5:6 मलिकिसिदक: मलिकिसिदक अब्राहमेरे वक्ते महायाजक ते हुकूमत केरनेबालो थियो ज़ेरो

हमेशारे लेई याजक आस।"

7 यीशुए एक्‍की मैन्हेरी ज़ेरि ज़िन्दगी गुज़ारनेरे दिहाड़न मां फुकैरी-फुकैरी ते लेरां देइ-देइ परमेशरे कां प्राथना ते बिनती की, ज़ै तैस मौती करां बच़ेइ सकतो थियो, ते परमेशरेरे लेई तैसेरे भेक्तरे वजाई सेइं परमेशरे तैसेरी फरियाद शुनी। 8 ते परमेशरेरू मट्ठू भोइतां भी तैनी दुख झ़ैल्‍लतां हुक्म मन्नो शिखो। 9 ज़ैखन तैनी तैन सब कियूं ज़ैन तैनी कियेरू लोड़तू थियूं, त तै तैन केरे लेई हमेशारे लेई मुक्तरो ज़िरियो बनो, ज़ैना तैसेरे हुक्म मनतन। 10 ते तैस परमेशरेरी तरफां मलिकिसिदकेरी ज़ेरि महायाजकेरी पदवी मैल्ही।

विश्वासे करां भटकनेरो नितीजो

11 असन कां इस बारे मां ज़ोनेरे लेई बड़ू किछ आहे, पन तुसन समझ़ानू मुश्किले, किजोकि तुस समझ़ाने मां सुसतथ। 12 द्रासले मां अज़ तगर तुस गुरू बनोरे लोड़ते थिये, किजोकि तुसन विश्वास कियोरे बड़ू च़िर भोवरूए। पन हुन्ना त ज़रूरत इस गल्‍लरीए कि कोई मैन्हु तुसन परमेशरेरे वचनेरी शुरुआतरी गल्‍लां दुबारां शिखाले। तुस तैन बच्‍चां केरे ज़ेरेथ ज़ैन हेजू दुद्ध पीतन ते शूरी रोट्टी न खेइ बटन। 13 ज़ै दुद्ध पीते, तै हेजू बच्‍चो भोते, किजोकि तैस नईं पतो सही कुने ते गलत कुने। 14 पन शूरी रोट्टी तैन केरे लेई भोचे ज़ैना विश्वासे मां बड्डेन, ते अपने तजरबे सेइं इस काबल भोवरेन, कि रोड़े ते बुरे मां फर्क सेमझ़ी सखन।