1 एल्हेरेलेइ ज़ैखन परमेशरेरो ऐह वाधोए कि असां तैस आरामे मां दाखल भोइ सकतम, ते असेईं खबरदार राहोरू लोड़ते, ताके कोस्कोई एरू न भोए, कि तुसन मरां कोई तैस मां दाखल भोने करां एरो रेइ गाए। 2 किजोकि ज़ेन्च़रे असेईं यीशु मसीहेरी खुशखबरी शुनी, तेन्च़रे इस्राएली लोकेईं भी आरामेरे ठैरी दाखल भोनेरी खुशखबरी शुनोरी थी। पन तैनेईं तैस पुड़ विश्वास न कियो, एल्हेरेलेइ तै सन्देश तैन केरे लेई बेफैइदो भोव। 3 पन असेईं ज़ैनेईं विश्वास कियो, परमेशरेरे तैस वाधो कियोरे आरामे मां दाखल भोतम, ज़ेन्च़रे परमेशरे ज़ोवरू थियूं,

"मीं अपने क्रोधे मां कसम खाइ,

कि तैना तैस ठैरी कधे दाखल न भोल्हे ज़ैड़ी अवं तैन आराम देथो।"

परमेशरे एन एल्हेरेलेइ नईं ज़ोवरू, किजोकि हेजू तगर आरामेरी ठार तियार न थी, पन तै ठार दुनिया बनानेरे वक्ते करां तै तियारे। 4 किजोकि परमेशरे सत्तोवं दिहैड़ारे बारे मां पवित्रशास्त्रे मां एन्च़रे ज़ोवरूए,

"परमेशरे अपना सब कम्मां खतम केरतां सत्तोवं दिहाड़े आराम कियो।"

5 ते अस भी इन पढ़तम कि तैनी बादे मां ज़ोवं,

"एना मेरे आरामेरे ठैरी कधी दाखल न भोल्हे।"

6 तैना इस्राएलेरे लोक ज़ैनेईं पेइली ई खुशखबरी त शुनी, पन आरामेरे ठैरी दाखल भोने मां कामयाब न भोए, किजोकि तैनेईं परमेशरेरे हुक्म न मन्ने। पन हुन्ना भी किछ लोकां केरे लेई आरामेरे ठैरी दाखल भोनेरे लेई मौकोए। 7 एल्हेरेलेइ परमेशरे कोई होरो वक्ते अपने आरामेरे ठैरी मां दाखल भोनेरे लेई ठहरावरो, तै वक्त अज़ आहे, इश्शे दादे पड़दादेईं खलाफत केरनेरे बड़े सालना बाद परमेशरे दाऊदेरे ज़िरिये ज़ोवं, ज़ेन्च़रे तैने ज़ोवं

"अगर अज़ तुस तैसेरी आवाज़ शुनथ,

त अपनो दिल सखत न केरा।"

8 अगर यहोशूए तैना लोक आरामे मां दाखल करावरे भोथे त बादे मां परमेशरे होरि दिहैड़ारे बारे मां गल न थी केरनि। 9 एल्हेरेलेइ परमेशरे लोकां केरे लेई एरी ठार तियारे ज़ैड़ी तैना पूरे तरीके सेइं आराम केरि बटतन। तैना तेन्च़रे आराम केरेले ज़ेन्च़रे परमेशरे सत्तोवं दिहाड़े आराम कियोरो थियो। 10 किजोकि ज़ै कोई परमेशरेरे आरामे मां दाखल भोते त तै परमेशरेरो ज़ेरो अपने कम्मन पूरे केरतां आराम केरते। 11 एल्हेरेलेइ एज्जा अस भी तैस आरामेरी ठैरी मां दाखल भोनेरी कोशिश केरम, ताके कोई भी मैन्हु इस्राएली लोकां केरे ज़ेरो हुक्म न मेनतां तैस आरामेरी ठैरी दाखल भोने करां रेइ न गाए। 12 किजोकि परमेशरेरू वचन ज़ींतू ते शेक्ति बालूए, ते हर दूई धारण बैली तलवारी करां भी जादे तिख्खू आहे। ते तैन प्राण ते आत्माई गहराई तगर च़ीरते, ज़ेन्च़रे तिख्खी तलवार जोड़न ते हेड्डी केरे एन्त्रियों मासे वारां पार च़िरतां निसतीए ते दिलेरे खियाल ते मैन्हेरो इरादो भी ज़ानते। 13 दुनियारी कोई भी चीज़ परमेशरेरी नज़री करां छ़पोरी नईं, बल्के तैसेरे सामने सब चीज़ां खुल्‍ली ते बैंदिन, ते असेईं तैस, ज़ैन किछ भी अपने पूरे ज़िन्दगी मां कियोरू तैसेरो हिसाब देनो पेनोए।

14 बस्सा, एज्जा अस अपने विश्वासे पुड़ मज़बूत रहम। किजोकि इश्शो अक महान महायाजके, ज़ै सुर्गे मां जेवरोए, यानी परमेशरेरू मट्ठू यीशु। 15 किजोकि इश्शो महायाजक इश्शी सैरी कमज़ोरी समझ़ते। किजोकि शैताने तै सेब्भी गल्‍लन मां इश्शो ज़ेरो अज़मव, पन तैनी कोई पाप न कियो। 16 एल्हेरेलेइ एज्जा असां दिलेरी सेइं, अनुग्रह देनेबाले परमेशरेरे तखतेरे सामने च़लम, ताके तै असन पुड़ अनुग्रह ते दया केरे ते ज़रूरतरे मौके तै इश्शे मद्दत केरे।