1 हुनी विश्वास उमीद कियोरी चीज़ां केरू याकीन, ते अलैई चीज़ां केरू सबूते। 2 इश्शे दादे पड़दादन भी एरो विश्वास थियो। एल्हेरेलेइ परमेशर तैन पुड़ खुशी भोव। 3 विश्वासे सेइं असन पतो लगते कि दुनियारी हर चीज़ परमेशरेरे वचने सेइं बनोरीए। एल्हेरेलेइ ज़ैन किछ अस लहतम, तैन लेइहोने बैली चीज़न सेइं नईं बनोरूए।

4 विश्वासे सेइं आदमेरे मट्ठे हाबिले अपने बड्डे ढ्ला कैने करां रोड़ू बलिदान परमेशरेरे लेई च़ाढ़ू। ज़ेसेरी वजाई सेइं परमेशरे तैसेरू बलिदान कबूल कियूं, ते तैसेरे बारे मां गवाही दित्ती, कि हाबिल धर्मी मैन्हु आहे। हालांकी हाबिल मेरि जेवरोए, फिरी भी अस तैसेरे विश्वासेरे ज़िरिये परमेशरे पुड़ भरोसो केरनो शिखतम। 5 विश्वासे सेइं हनोक नव्वेंरो मैन्हु मौती करां पेइलो ज़ींतो सुर्गे जो नियो, ते तैसेरो पतो न च़लो, किजोकि परमेशरे तै सुर्गे जो नीयोरो थियो, तैसेरे उबरे गाने करां पेइले तैसेरे हके मां गवाही दित्तोरी थी, कि तैनी परमेशर खुश कियो। 6 किजोकि विश्वासे बगैर परमेशर खुश केरनो नामुमकिने, बस्सा रोड़ू एने कि परमेशरे कां एजनेबालेईं विश्वास कियोरो लोड़े कि परमेशरे, परमेशर तैन ज़ैना तैस सच़्च़ैई सेइं तोपतन फल देते। 7 विश्वासे सेइं नूहे तैन गल्‍लां केरे बारे मां ज़ैना एजने बाले वक्ते मां भोनी बैली थी, परमेशरेरे तरफां हुक्म मैलतां परमेशरेरे प्यारे सेइं तैस पुड़ अमल कियूं, ते अक किश्ती बनाई ज़ैस मां तैसेरू सारू टब्बर बच़ू, एन केरने सेइं तैनी सारी दुनिया मुर्ज़म बनाई ते एप्पू तैस धार्मिकतारो बारस बनो ज़ै विश्वासे सेइं हासिल भोचे।

8 विश्वासे सेइं ज़ैखन परमेशरे अब्राहम, ज़ैस जगाई गाने जो परमेशरे तै कुजेवरो थियो, त तै हुक्म मेनतां तैस जगाई च़लो जेव, ज़ै जगाई बादे मां परमेशर तैस विरासतरो ज़ेरो देनेबालो थियो। हालांकी तै एन भी न थियो ज़ानतो कि अवं कोरहां च़लोरोईं, फिरी भी च़लो जेव। 9 विश्वासेरे ज़िरिये सेइं तै परमेशरेरे कियोरे वाधेरे मुताबिक तैस मुल्खे मां परदेशी केरो ज़ेरो डेरन मां गेइतां बस्सो। ते तैस सेइं साथी तैसेरू मट्ठू इसहाक ते तैसेरू पोट्लड़ू याकूब भी राए, तैन भी परमेशरे करां तैए वाधो मैलो ते तैना भी डेरन मां राए। 10 किजोकि अब्राहम तैस नगरेरे इंतज़ारे मां थियो (ज़ैन सुर्गे मांए) ज़ेसेरी मुनीयाद सदारे लेई आहे, ज़ेसेरो तियार केरनेबालो ते बनानेबालो परमेशरे। 11 विश्वासे सेइं सारा दोज़ींती भोनेरी ताकत हासिल की, हालांकी तै उमरारे हिसाबे सेइं बच्‍चो ज़ांनेरे काबल न थी राहोरी, सारा एन याकीन थियूं कि वाधो केरनेबालो परमेशर अपनो वाधो पूरो केरेलो। 12 ज़ेइस अब्राहम बड़ो बुड्डो थियो ते बच्‍चे पैदा केरनेरे काबल न थियो, अम्बरेरे तारां केरे ते समुन्दरेरी रेतरे बराबर एत्रू हछु वंश पैदा भोव।

13 एन सेब्भी लोकेईं परमेशरे पुड़ भरोसो कियो ते मेरि जे, ते तैन तै कोई चीज़ न मैल्ही ज़ेसेरो वाधो परमेशरे कियोरो थियो, तैनेईं समझ़ू कि परमेशर एन एजने बाले वक्ते मां केरेलो, ते तैना इन भी समझ़ते थिये, कि तैना ज़मीनी पुड़ परदेशी ते मुसाफर आन। 14 ज़ैना एरी गल्‍लां ज़ोतन तैन सेइं एन साबत भोते, कि तैना अज़ तगर अपने मुल्खेरी तलाशी मां आन। 15 अगर तैना तैस मुल्खेरो खियाल रखते भोथे ज़ैस मरां तैना एवरे थिये, त तैना वापस गेइ बटते थिये। 16 पन असलीती मां तैना एक्‍की रोड़े सुर्गेरे मुल्खेरे उमीदी मां थिये, एल्हेरेलेइ परमेशर तैन केरो परमेशर ज़ुवाने सेइं खुशी भोव, एल्हेरेलेइ तैनी तैन केरे लेई अक नगर तियार कियोरूए।

17 विश्वासे सेइं अब्राहमे अपने इम्तिहानेरे मौके अपने मट्ठे इसहाकेरू बलिदान देने करां न टलो, ज़ैन तैस परमेशरेरे वाधे कबूल केरने बाद मैल्होरो थियूं, तैस्से अकैल्‍ले मट्ठे बलिदान केरने जो तियार भोइ जेव। 18 हालांकी परमेशरे तैस सेइं ज़ोवरू थियूं, "कि इसहाकेरे वंशे सेइं तेरे वंशेरू नवं रालू।" 19 किजोकि अब्राहमे याकीन थियूं, कि परमेशरे कां मुड़दन ज़ींते केरनेरी शक्ति आहे, एल्हेरेलेइ लेई ज़ेन्च़रे परमेशरे इसहाक मुड़दन मरां फिरी वापस आनो। 20 विश्वासे सेइं इसहाके अपने दूईये मट्ठन याकूबे ते एसावे आशिर्वाद दित्तो, कि एजने बाले वक्ते मां तैना वाधे पूरे भोल्हे। 21 विश्वासे सेइं याकूबे मरते वक्ते यूसुफेरे दूईये मट्ठन बरकत दित्ती ते अपने सोटरे सहारे सेइं परमेशरेरी आराधना की। 22 विश्वासे सेइं यूसुफे मरते बार पूरे याकीने सेइं ज़ोवरू थियूं, इस्राएली लोक मिस्र मुल्खे शारेले। ते तैन हुक्म दित्तोरो थियो कि ज़ेइस तैना मिस्र मुल्खे मरां निसेले त तैना तैसेरी हेड्डी साथी नेन।

23 विश्वासे सेइं मूसेरे हाज बव्वेईं तैसेरे ज़रमनेरां पत्ती ट्लाई महीन्न तगर छ़ुपेइतां रख्खो, किजोकि तैनेईं हेरू कि तै बच्‍चो खासे, ते तैना राज़ेरो हुक्म ट्लोड़ने करां न डरे। 24 विश्वासे सेइं मूसा बड्डे भोइतां फ़िरौनेरे कुइयरू मट्ठू* बन्ने करां इन्कार कमाव। 25 पापेरे थोड़े दिहाड़े आनन्देरी ज़िन्दगी गुज़ारनेरे बजाहे तैनी परमेशरेरे लोकन सेइं साथी मिलतां दुख झ़ैलनो च़ुनो। 26 तैनी मसीहेरे लेई दुख झ़ैलनो मिस्रेरे खज़ानन् करां जादे दौलत समझ़ी, किजोकि तै ज़ानतो थियो कि तैस सुर्गे मां इनाम मैल्हनूए। 27 विश्वासे सेइं तैनी राज़ेरे सरकरो डर न कियो, बल्के मिस्र मुल्ख छ़ेडी दित्तो, एल्हेरेलेइ तैनी समझ़ोरू थियूं ज़ेन्च़रे तैनी न लेइहोने बाले परमेशरे लाहू। 28 विश्वासे सेइं मूसे इस्राएली लोकन हुक्म दित्तो कि तैना फ़सह तिहारेरी दिहाड़ी बनानी ते गबड़ेरो खून दारन छ़िड़कन, ताके मौतरो स्वर्गदूत ज़ै परमेशरेरी तरफां भेज़ोरोए इस्राएलेरे ज़ेठे मट्ठन न मैरी बटे। 29 विश्वासे सेइं इस्राएली लोक लाल समुन्दरे मांमेइं एन्च़रे लंघे ज़ेन्च़रे शुक्‍कोरी ज़मीनी पुड़मेइं पार निस्से, पन ज़ैखन मिस्रेइं तैट्ठां पार लंघनेरी कोशिश की त तैना डुबतां मेरि जे। 30 किजोकि इस्राएली लोकेईं परमेशरे पुड़ विश्वास कियो, ते सत दिहैड़न तगर यरीहो नगरेरे चक्‍कर लाए (ज़ेन्च़रे परमेशरे ज़ोवरू थियूं) ते दिवार डुल्‍ली। 31 विश्वासे सेइं राहाब वेश्या परमेशरेरे हुक्म न मन्ने बालन साथी नाश न भोइ; एल्हेरेलेइ कि तैसां इस्राएली जासूस शैन्ति सेइं अपने घरे मां आने ज़ैना छ़ेपतां यरीहो नगरे हेरने एवरे थिये।

32 हुनी होरू किछ ज़ोनेरी ज़रूरत नईं। हुनी मीं कां वक्त नईं कि एरे ज़ेरे लोकां केरे बारे मां ज़ोईं, ज़ेन्च़रे गिदोन, बाराक, शिमशोन, यिफतह, दाऊद, ते शमूएल ते होरे नबी। 33 तैनेईं विश्वासे सेइं राज़्ज़ां ज़ींतां, ते धार्मिकतारां कम्मां कियां ते वाधो कियोरी चीज़ां हासिल की, ते शेरेईं तैना न खाए। 34 अग्गां तैना न फुक्‍के, ते तलवारी सेइं तैना न मारे जे, ज़ैखन तैना कमज़ोर थिये तैखन तैन ताकतबर बनाए, ते जंगी मां भी बहादर निस्से, ते तैनेईं दुश्मना केरि फौज निशानी।

35 विश्वासे सेइं किछ कुआन्शन अपने मुओरे लोक ज़ींतो मैल्हे, किछ मार खांते-खांते मेरि जे। ते तैनेईं अपनो विश्वास शारनो न चाव, तैसेरे बदले मां तैनेईं कैद रानू मन्ज़ूर कियूं, एल्हेरेलेइ तैना मरनेरां बाद फिरी ज़ींते भोन, ते तैन रोड़ी ज़िन्दगी मैल्हे। 36 किछ लोकां केरो मज़ाक बनाव जेव, किछ लोकन कोड़े बाए, ते किछ शंगलन सेइं बन्धे ते कैदखाने मां छ़डे। 37 ते किछन घोड़ेईं बैई; ते आरे सेइं च़िरे, ते तलवारी सेइं मारे जे। तैना गरीब थिये, तैन दुख दित्तो जेव ते तैन सेइं बुरो बर्ताव कियो जेव। तैना भैड्डां छ़ेल्‍ली केरि खाड़ी लेइतां इरां उरां नश्शते थिये। 38 तैना जंगलन ते पहाड़न ते कुढन मां ते धेरतरे खडन मांमेइं हंठते थिये।

39 इन बुरू संसार तैन विश्वासी लोकां केरे काबल न थियूं, तैन सेब्भी केरे विश्वासेरे वजाई सेइं परमेशर तैन पुड़ खुश भोव, पन तैन, तैन मैल्हू ज़ेसेरो वाधो परमेशरे कियोरो थियो। 40 किजोकि परमेशरे कां न सिर्फ तैन केरे लेई बल्के इश्शे लेई रोड़ी योजनाए। परमेशर तैन शुद्ध बनानो चाते, पन सिर्फ असन सेइं साथी।