1 कुन अक्ल हक न दे?

कुन समझ़ उच्‍चे शब्दे सेइं न ज़ोए?

2 अक्ल त बत्तरे उच्‍ची ठारन पुड़े,

ते च़ुबत्तन मां खड़ी भोतीए;

3 फाटकां केरे नगरां केरे दारे मां,

ते दारन मां तै उच्‍ची आवाज़ी सेइं ज़ोतीए,

4 "हे लोकव, अवं तुसन जो हक देती,

ते मेरी गल्‍लां सब मैन्हु केरे लेई आन।

5 हे सिद्धे-सादे लोकव च़लाकी शिखा;

ते हे बेवकूफव, अपने मने मां समझ़ा

6 शुना, किजोकि अवं रोड़ी गल्‍लां ज़ोली,

ते ज़ैखन अवं आशी खोल्‍लेली, तैखन तैस सेइं सिद्धी गल्‍लां निस्सेली;

7 किजोकि मीं करां सच़्च़ेरी गल्‍लां बियान भोल्ही;

दुष्टेरी गल्‍लन सेइं मीं नफरत भोतीए।

8 मेरे ऐशेरी सब गल्‍लां धर्मेरी भोतिन,

तैन मरां कोई टारी या उलट-फेरेरी गल्‍लां न निस्सन।

9 समझ़ी बालेरे लेई तैना सब आसान,

ते ज्ञान हासिल केरनेबालां केरे लेई बेड़ि सिद्धी आन।

10 चाँदी नईं, मेरी शिक्षा च़ुना,

ते रोड़े कुन्दने करां बेद्धतां ज्ञाने कबूल केरा।

11 किजोकि अक्ल, बड़े कीमती रत्नन करां भी रोड़ीए,

ते सारी मन पसंद चीज़न मां कोई भी तैसेरे बराबर नईं।

12 अवं ज़ै अक्ल आईं, ते अवं होशियारी मां बास केरतीं,

ते ज्ञान ते ज़मीरे हासिल केरतीं।

13 यहोवारो डर मन्नो बुरैई सेइं बैर रखनोए।

घमण्ड ते अहंकार, बुरी चाली सेइं,

ते उलट-फेरेरी गल्‍लन सेइं अवं बैर रखतीं।

14 रोड़ी योजना, ते खरी अक्ल मेरीए, मीं मां समझ़े,

ते कुदरत भी मेरीए।

15 मेरे ज़िरिये राज़े राज़ केरतन,

ते अधिकारी धर्मे सेइं हुकूमत केरतन;

16 मेरे ज़िरिये राज़ केरनेबाले,

हाकिम ते धेरतरे सब न्याय केरनेबाले हुकूमत केरतन।

17 ज़ैना मीं सेइं प्यार रखतन, तैन सेइं अवं भी प्यार रखतीं,

ते ज़ैना मीं झ़ेझ़ां उठतां तोपतन, तैन अवं मैलतीं।

18 दौलत ते आदर,

हमेशारी रानेबाली दौलत ते धार्मिकता मीं कां आन।

19 मेरो फल शुद्ध सोन्ने करां,

बल्के कुन्दने करां भी रोड़ोए,

ते मेरी फसल रोड़े चैंदी करां रोड़ीए।

20 अवं धर्मेरे बत्ती मां,

ते न्यायेरे बत्तां केरे दरमियाने मां च़लतीं,

21 ज़ैस करां अवं अपने ट्लारन धन-दौलतरो हिस्सेदार केरि,

ते तैन केरे गुदामन भेरि देईं।

22 यहोवा अवं कम केरनेरे शुरू मां,

बल्के अपने पुराने ज़मानेरे कम्मन करां भी पेइले पैदा की।

23 अवं हमेशा करां बल्के शुरू करां धेरतरे सृष्टि करां पेइले ठहराई जेवरी आईं।

24 ज़ैखन न त डुग्घो समुन्दर थियो,

ते न पैनेरे नाग थिये, तैखन करां अवं पैदा भोइ।

25 ज़ैखन पहाड़ ते पहैड़ी न थी कायम कियोरी,

तैखने करां अवं पैदा भोइ।

26 ज़ैखन यहोवा न त धरती

ते न मैइदान, न दुनियारी धूड़ बनेवरे थी, इन करां पेइले अवं पैदा भोइ।

27 ज़ैखन तैने अम्बर कायम कियूं, तैखन अवं तैड़ी थी,

ज़ैखन तैने डुग्घे समुन्दरे पुड़ अम्बर बनावं,

28 ज़ैखन तैने अम्बर बह कायम कियूं,

ते डुग्घे समुन्दरेरे नाग निस्सने लगे,

29 ज़ैखन तैने समुन्दरेरी हद ठहराई,

कि पानी तैसेरो हुक्म न ट्लोड़ी सके,

ते ज़ैखन तै ज़मीनरी बुनियादरी डोरी लातो थियो,

30 तैखन अवं प्रधान कारिगेरेरी* ज़ेरि तैस कां थी;

ते अवं रोज़ तैसेरी खुशी थी,

ते हर वक्त तैसेरे सामने खुश रहतीए थी।

31 अवं तैसेरी बसावरी धेरती सेइं खुश थी

ते मेरू सुख मैन्हु केरि सेंगती सेइं भोतू थियूं।

32 एल्हेरेलेइ हुनी हे मेरे मट्ठव, मेरी शुना;

कुन धन आन तैना ज़ैना मेरे बत्तन ट्लेइतां रहतन।

33 शिक्षा शुना, ते अक्लमन्द भोइ गाथ,

तैस नज़रानदाज़ न केरा।

34 केत्रो धने तै मैन्हु ज़ै मेरी शुनते,

बल्के मेरे दारे पुड़ रोज़ खड़ो रहते,

ते मेरे दारां केरे खम्भन कां मीं बलगते।

35 किजोकि ज़ैस अवं मैलतीं, तै ज़िन्दगी हासिल केरते,

ते यहोवा तैस सेइं खुश भोते।

36 पन ज़ै मीं तोप्पने मां बेफल भोते,

तै एप्पु पुड़ ज़ुलम आनते;

ज़ेत्रे मीं सेइं बैर रखतन, तैना मौती सेइं प्यार रखतन।"