कहावतां 7

1 हे मेरे मट्ठा, मेरी गल्‍लन मन्न,

ते मेरे हुक्मन अपने मने मां रेखी छ़ड।

2 मेरे हुक्मन मन, इस सेइं तू ज़ींतो रालो,

ते मेरी शिक्षा अपने एछ़्छ़री पुतली समझ़;

3 तैन्न अपने एंगलोयन मां बन्ध,

ते अपने दिलेरी तेख्ती पुड़ लिखी छ़ड।

4 अक्ली सेइं ज़ो कि, "तू मेरी बेइन आस,"

ते समझ़ी अपनि रिश्तेदार बना;

5 तैखन तू बेखली कौन्शी करां बच़ेलो,

ज़ै मिट्ठी-मिट्ठी गल्‍लां ज़ोतीए।

चालबाज़ वेश्या

6 मीं एक्सां अपने घरेरे दैरी मरां,

मतलब अपने रोशनदाने मरां तक्‍कू,

7 तैखन मीं सिद्धे-सादे लोकन मरां

अक बेअक्ल जुवान लाव;

8 तै तैस कौन्शरे घरेरे कूने कां सड़की मांमेइं च़लोरो थियो,

ते तैने तैसारे घरेरी बत ट्लाई।

9 तैस वक्ते दिहाड़ी ढेली जेई, ते ड्लोझ़रो मौको एवरो थियो,

बल्के रातरू बड़ू आंधरू भोवरू थियूं।

10 ते तैस सेइं एक्‍की कौन्शरी मुलाकात भोइ,

ज़ेसेरू लान वेश्यारू ज़ेरू थियूं, ते तै बड़ी च़लाक थी।

11 तै बगैर शैन्तां ते बेशर्म थी,

ते तैसारे पव घरे मां न थिये टिकते;

12 कधी तै सड़की मां, कधी चौके मां मैलती थी,

ते एक्‍की-एक्‍की कूने पुड़ तै बलगती थी।

13 तैखन तैसां तै जुवान ट्लेइतां तैस फुम्मड़ी दित्ती,

ते बे शरमरी कोशिश केरतां तैस सेइं ज़ोवं,

14 "मीं अज़्ज़े मेलबलि च़ाढ़ी।

ते एपनी मिन्नतां पूरी की;

15 इस्से वजाई सेइं अवं तीं सेइं मुलाकात केरनेरे लेई निस्सी,

अवं तेरे दर्शन केरनेरे तोपी मां थी, ते हुन्ना तू मैल्हो।

16 मीं अपने खट्टरे बिछ़ाने पुड़

मिस्रेरां कढ़ाई दार लिगड़ां बिछ़ावरन;

17 मीं अपने बिछ़ाने पुड़ गन्धरस,

अगर ते दालचीनी छ़िड़कोरीए।

18 एल्हेरेलेइ हुनी च़ल अस प्यारे सेइं झ़ेझ़ां तगर दिल बहलाते रहम;

अस एक्‍की होरी सेइं प्यार केरतां खुश रहम।

19 किजोकि मेरो मुन्श घरे नईं;

तै दूर मुल्खे जो च़लो जेवरोए;

20 तै चैंदरी थेली घिन्तां जेवरोए;

ते पुनयारे मौके वापस एज्जेलो।"

21 एरी लालच़ाने बाली गल्‍लां ज़ोइ ज़ोइतां, तैसां तै फसव;

ते अपनि मिट्ठी-मिट्ठी गल्‍लन सेइं तै अपने कैबू मां कियो।

22 तै लूशी तैस पत्ती भोइ जेव,

ज़ेन्च़रे दांत कसाई-खाने जो, या हिरन फंदे मां कदम रखते।

23 आखरी मां तैस जुवानेरो कलैज़ो तीरे सेइं कोशेलो;*7:23 कलैज़ो तीरे सेइं कोशेलो मतलब तै अपनि ज़िन्दगी गुवालो।

तै तैस च़ुड़ोलवेरो ज़ेरोए ज़ैन फंदेरे पासे जल्दी उडरते

ते न ज़ाने कि तैस सेइं तैसेरे प्राण गाले।

24 हुनी हे मेरे मट्ठव, मेरी शुना,

ते मेरी गल्‍लन पुड़ मन लाथ।

25 तेरो मन एरी कौन्शरे बत्तरे पासे न फिरे,

ते तैसेरी बत्तन मां बिसरतां भी नईं गानू;

26 किजोकि बड़े लोक तैसेरे ज़िरिये मारे जेवरेन;

तैसारे मारोरां केरि बड़ी तैधात भोल्ही।

27 तैसारू घर पातालेरी बत्ते,

तै मौतरे दुनियाई मां पुज़ातीए।