कहावतां 23

1 ज़ैखन तू कोन्ची हाकिमे सेइं साथी रोट्टी खानेरे लेई बिश्शस,

तैखन इस गल्‍ली मन लेइतां सोचां कि मेरे सामने कौने?

2 ते अगर तू जादे खाने बालो भोस,

त थोड़ू खेइतां ढ्लुखोरो खड़ो भोइयां।

3 तैसेरी सुवादे बाली खानेरी चीज़ां केरू लालच़ न केरां,

किजोकि तै धोखेरी रोट्टीए।

4 दौलतमन्द भोनेरे लेई मेहनत नईं केरनि;

अपने समझ़रो भरोसो शारनो।

5 ज़ैखन तू अपनि नज़र दौलती पुड़ लाएलो,

तै च़ली गाली,

तै उकाब च़ुड़ोलवेरी ज़ेरि फंघां लाएली, इस मां कोई शक नईं अम्बरेरे पासे उडरतां गाली।

6 ज़ै कंजूस मैन्हेरी रोट्टी न खेइयां,

ते न तैसेरी सुवादे बाले खानेरी चीज़ां केरू लालच़ केरां;

7 किजोकि तै एरहो मैन्हु आहे,

ज़ै रोट्टरे कीमतरी गिनती केरते। तै तीं सेइं ज़ोने त ज़ोते, खा ते पी,

पन तैसेरो मन तीं सेइं लगोरो नईं।

8 ज़ै ड्लाछ़ोड़ो तीं खेवरो भोए, तै उतारनो पेलो,

ते तू अपनि मिट्ठी गल्‍लां केरो फल हारेलो।

9 बेवकूफेरे सामने नईं ज़ोनू,

नईं त तै तेरे अक्लरे वचन्न घटिया समझ़ेलो।

10 पुरैनी हद्दां नईं बधैनी,

ते न अनाथां केरे उडारन मां गानू;✝23:10 कह. 22:28.

11 किजोकि तैन केरो छुटानेबालो परमेशर सामर्थी आहे;

तैन केरो मुकदमो तीं साथी तैए लड़ेलो।

12 अपनो दिल शिक्षारे पासे,

ते अपने कन ज्ञानेरी गल्‍लां केरे पासे लानो।

13 मट्ठे झ़िड़क देनी नईं शारनी;

किजोकि अगर तू तैस सोटी सेइं बास, त तै न मरेलो।

14 तू तैस सोटी सेइं बैइतां तैसेरो प्राण पाताले करां बच़ालो।

15 हे मेरे मट्ठा, अगर तू अक्लमन्द भोस,

त मेरो मन खुश भोल्हो।

16 ते ज़ैखन तू सिद्धी गल्‍लां ज़ोस, तैखन मेरो मन खुश भोल्हो।

17 तू पैपी केरे बारे मां मने मां जलन न केरां,

सैरी दिहैड़ी यहोवारो डर मनतो रानो।

18 किजोकि आखरी मां तीं फल मैल्हेलो,

ते तेरी एजनेबाली ज़िन्दगी बड़ी रोड़ी भोल्ही।

19 हे मेरे मट्ठा, तू शुन्तां अक्लमन्द भो,

ते अपनो मन रोड़ी बत्ती मां सिद्धो च़ला।

20 दाछ़रो रस पीने बालन मां शामल न भोइयां,

न जादे मास खाने बालन सेइं साथ रेखां;

21 किजोकि पीने बालो ते पेटू कंगाल भोइ गाले,

ते तैन केरि सरक तैन्न खिन्थां लुवाली।

22 अपने ज़र्म देनेबाले बाजी केरि शुन्नी,

ते ज़ैखन तेरी अम्मा बुढी भोइ गाए, तैखन भी तैस घटिया न सेमझ़ां।

23 सच़्च़ाई घिन्नी, बेच़नी नईं;

ते अक्ल ते शिक्षा ते समझ़ भी घिन्न।

24 धर्मी मैन्हेरो बाजी बड़ो मघन भोते;

ते अक्लमन्दे ज़र्म देनेबालो तैसेरे वजाई सेइं खुश भोते।

25 तेरे वजाई सेइं तेरे अम्मा-बाजी खुश ते तेरी ज़र्म देनेबाली मघन भोए।

26 हे मेरे मट्ठा, अपनो मन मेरे पासे ला,

ते तेरी नज़र मेरे चाल च़लने पुड़ लगोरीए राए।

27 वेश्या डुग्घो खड्डो ठहरतीए;

ते बखली कौन्श तंग खूहेरी ज़ेरि भोतीए।

28 तै डैकू केरि ज़ेरि मारने लगतीए,

ते बड़े लोकन धोखेबाज़ बनातीए।

29 कौन ज़ोते, अफ़सोस? कौन ज़ोते, अफ़सोस, अफ़सोस? कौन लड़ाई-झगड़न मां फसते?

कौन बक-बक केरते? केसेरे वजाई सेइं ज़खम भोतन? केसेरी एछ़्छ़ी लाल भोइ गैतिन?

30 तैन केरि ज़ैना दाछ़रो रस च़िरे तगर पीतन,

ते ज़ैना मसालो मिलावरो दाछ़रो रस तोप्पने जो गातन।

31 ज़ैखन दाछ़रो रस लाल लेइहोते, ते कुटोरे मां तैसेरो रोड़ो रंग भोते,

ते ज़ैखन तै धारी सेइं उलटव गाते,

तैखन तै नईं हेरनो।

32 किजोकि आखरी मां तै सप्पेरे ज़ेरो डसते,

ते बड़े ज़ेहरीले सप्पेरो ज़ेरो कटते।

33 तू आजीब चीज़न लाएलो,

ते उलटी-सिद्धी गल्‍लां बकतो रालो।

34 ते तू समुन्दरेरे मझ़ाटे लेटने बाले

या मस्तूलेरे च़ोटी पुड़ झ़ुलने बालेरो ज़ेरो रालो।

35 तू ज़ोलो कि मीं मार त खाइ, पन दुखी न भोव;

अवं मड्डो त जेव, पन मीं किछ खबर न भोइ।

अवं होशी मां कैखन एज्जी? अवं त फिरी शराब तोप्पेलो।