1 सुखे सेइं साथी शुकोरो टुक्ड़ो, तैस घरेरे बदले रोड़ू आहे,
ज़ैन मेलबलि जानबरन सेइं भरोरू भोए, पन तैस मां लड़ाई-झगड़ो भोते।
2 अक्ली सेइं च़लनेबालो नौकर अपने मालिकेरे तैस मट्ठे पुड़ ज़ै शरमरी वजा भोते अधिकार केरेलो,
ते तैस मट्ठेरे ढ्लां केरे दरमियान जेईदातरो हिस्सेदार भोल्हो।
3 ज़ेन्च़रे चैंदरे लेई कुठाली, ते सोन्नेरे लेई भट्ठी भोतीए,
तेन्च़रे यहोवा मना केरो परखने बालोए।
4 कुकर्मी बुरी गल्‍लां ध्यान देइतां शुनते,
ते झूठो मैन्हु दुष्टेरी गल्‍लां केरे पासे कन लाते।
5 ज़ै गरीबेरो मज़ाक उड़ाते, तै तैसेरे बनानेबाले परमेशरेरी निन्दा केरते;
ते ज़ै कोन्चेरी मुसीबती पुड़ हसते, तै बेकसूर न ठहरेलो।
6 बुढां केरि शोभा तैन केरे दिहोड़ां पोट्लड़न;
ते बाल-बच्‍चां केरि शोभा तैन केरे अम्मा-बाजीन।
7 बेवकूफेरे ज़बानरां रोड़ी गल न शोभे,
ते इस करां जादे प्रधानेरे ज़बानरां झूठी गल न शोभे।
8 रिश्पत देनेबालो मैन्हु रिश्पत मोह नेने बाली मणि समझ़ते;
एरहो मड़द ज़ेरहां फिरते, तेरहां तैसेरू कम कामयाब भोते।
9 ज़ै होरि केरे पापन ढकते, तै प्यारेरो तोपनेबालो ठहरते,
पन ज़ै गल्‍लरी गलबात बार-बार केरते, तै पक्‍के दोस्तन मां भी फूट छ़डते।
10 अक झ़िड़क समझ़ाने बालेरे मने मां ज़ेत्री लेग्गी गाचे,
एत्रू 100 बार मार खानू बेवकूफेरे मने मां न पे।
11 बुरो मैन्हु दंगेरी कोशिश केरते,
एल्हेरेलेइ तैस कां सखत दूत भेज़ो गालो।
12 ज़ैस इछ़नरे बच्‍चे थुसोड़ोरे भोन तैस सेइं मिलनू,
बेवकूफी मां डुब्बोरे बेवकूफे सेइं मिलने करां बड़ू रोड़ूए।
13 ज़ै कोई भलियाई केरनेरे बदले मां बुराई केरे,
तैसेरे घरे मरां बुराई दूर न भोल्ही।
14 लड़ैइअरी शुरुआत तालाबेरे सुराखेरी ज़ेरिए,
लड़ाई बधने करां पेइले तै शारनी ठीके।
15 ज़ै दोषी बेकसूर, ते ज़ै बेकसूरे दोषी ठहराते,
तैन दूईयने सेइं यहोवा नफरत केरते।
16 अक्ल घिन्नेरे लेई बेवकूफ अपने हथ्थे मां कीमत घिन्तां किजो आहे?
तै तैस शिखनू भी न चाए।
17 दोस्त हर वक्त प्यार रखते,
ते आफतरे दिहाड़े ढ्ला ढ्लाएरे कम्मे एइते।
18 बेअक्ल मैन्हु वाधे केरतां रुकावट पैदा केरते,
ते अपने पड़ोसेरे करज़ेरो ज़िमेवार भोते।
19 ज़ै लड़ाई-झगड़ो केरने सेइं प्यार केरते, तै पाप केरने सेइं भी प्यार केरते,
ते ज़ै अपने फाटके बड्डो केरते तै अपने नाशेरी कोशिश केरते।
20 ज़ै मनेरो टारोए, तैसेरू भलू न भोए,
ते उलट-फेरेरी गल्‍लां केरनेबालो मुसीबती मां पेते।
21 ज़ै बेवकूफे ज़र्म देते तै तैस सेइं दुखे हासिल केरते;
ते बेवकूफेरे बाजी आनन्द न भोए।
22 मनेरो आनन्द रोड़ी दूवाई आहे,
पन मनेरे ट्लुटने सेइं हेड्डी शुक्‍की गैतिन।
23 दुष्ट मैन्हु न्याय बिगाड़नेरे लेई,
अपने खीसे मरां रिश्पत कढते।
24 अक्ल समझ़ाने बालेरे सामने रहतीए,
पन बेवकूफेरी एछ़्छ़ी धेरतरे दूर-दूर मुल्खन मां लगोरी रैतिन।
25 बेवकूफ मट्ठे सेइं बाजी परेशान भोते,
ते तैसेरी अम्मा मातम भोते।
26 धर्मी मैन्हु पुड़ जुरमानो लानो,
ते प्रधान्न भलियाई केरनेरे वजाई सेइं मडने, दूईये कम्मां रोड़ां नईं।
27 ज़ै सुमैलतां ज़ोते, तै ज्ञानी ठहरते;
ते ज़ेसेरी आत्मा च़ुप रहतीए, तैए समझ़ी बालो मड़द ठहरते।
28 बेवकूफ भी ज़ैखन च़ुप रहते, तैखन अक्लमन्द गनो गाते;
ते ज़ै अपनु आशी बन्द रखते तै समझ़ी बालो गनो गाते।