1 अक्लां सत्ते खम्भे बनेइतां

अपनु घर बनेवरूए।

2 तैसां धांमरे लेई अपने जानबर केटतां, अपने दाछ़रे रस्से मां मसालो मिलेइतां

ते अपनि धाम तियार कियोरीए।

3 तैसां अपनि सेवा केरनेबैली धाम ज़ोनेरे लेई भेज़ोरिन;

ते तै नगरेरे सेब्भन करां उच्‍चे ठारन मरां हक देतीए,

4 "ज़ै कोई सादोए तै मुड़तां इड़ी एज्जे!"

ते ज़ै बेअक्ले, तैस सेइं तै ज़ोतीए,

5 "एज्जा, मेरी रोट्टी खाथ,

ते मसालो मिलावरे मेरे दाछ़रे रस्से पीया।

6 बेवकूफां केरू साथ शारा,

ते ज़ींते राथ, समझ़री बत्ती मां सिद्धे च़ला।"

7 ज़ै मज़ाक उड़ाने बाले शिक्षा देते, बेइज़्ज़त भोते,

ते ज़ै दुष्ट मैन्हु डांटते तैस कलंक लगते।

8 मज़ाक उड़ाने बाले न डांट, एरू न भोए कि तै तीं सेइं बैर रख्खे,

अक्लमन्दे डांट, तै त तीं सेइं प्यार रखेलो।

9 अक्लमन्दे शिक्षा दे, तै जादे अक्लमन्द भोल्हो;

धेर्मी खबरदार केर, तै अपनु ज्ञान बधालो।

10 यहोवारो डर मन्नो अक्लरी शुरुआते,

ते परमपवित्र परमेशर ज़ाननो ही समझ़े।

11 मेरे ज़िरिये त तेरी उमर बधेली,

ते तेरे ज़िन्दगरे साल जादे भोल्हे।

12 अगर तू अक्लमन्द आस, त अक्लरो फल तूए भोगेलो;

ते अगर तू मज़ाक बनाने बालोस, त सज़ाह सिर्फ तूए भोगेलो।

13 बेवकूफी बक-बक केरनेबाली कौन्शरी ज़ेरिए; तै त बेअक्ले,

ते किछ न ज़ाने।

14 तै अपने घरेरे दारे मां,

ते नगरेरे उच्‍ची ठारन मां अपने तखते पुड़ बिशोरी,

15 तै तैन लोकन ज़ैना अपने बत्तन पुड़ सिद्धे-सिद्धे च़लतन इन ज़ोइतां हक देतीए,

16 "ज़ै कोई सादोए, तै मुड़तां इड़ी एज्जे;"

ज़ै बेअक्ले, तैस सेइं तै ज़ोतीए,

17 "च़ोरी कियोरू पानी मिट्ठू भोते,

ते छ़पोरी रोट्टी रोड़ी लगतीए।"

18 ते तै न ज़ाने, कि तैड़ी मुवोरे पेवरेन,

ते तैस कौन्शरे मेहमान पातालेरे बुनीयें ठारन मां पुज़तन।