अय्यूबेरी प्राथना
1 "मेरे प्राण निसने बालेन, मेरे ज़िन्दगरे दिहाड़े पूरे भेवरेन;
मेरे लेई कब्र तियारे।
2 इस मां कोई शक नईं ज़ैना मीं सेइं साथी आन तैना मज़ाक बनाने बालेन,
ते तैन केरो लड़ाई-झगड़ो मीं लगातार लेइहोते।
3 ज़मानत दे, अपने ते मेरे दरमियाने मां तूए ज़िमेवार भोस;
कौने ज़ै मेरे हथ्थे पुड़ हथ मारे?
4 तीं तैन केरो मन समझ़ने करां रोकतां रखोरोए,
इस वजाई सेइं तू तैन्न ज़ींतने न देलो।
5 ज़ै अपने दोस्तां केरि चोगली केरतां लुटते,
तैसेरे बच्चां केरि एछ़्छ़ी कैनी भोइ गैली।
6 तैने एरू कियूं कि सब लोक मेरी मसाल देतन;
ते लोक मेरे तुत्तरे पुड़ थुकतन।
7 दुखेरे मारे मेरी एछ़्छ़ी धुंधली भोइ जेवरिन,
ते मेरे सब अंग छावरे ज़ेरे भोइ जे।
8 एस हेरतां ईमानदार लोक हैरान भोतन,
ते ज़ैना बेकसूरन, तैना अधर्मी मैन्हेरे खलाफ भड़कतन।
9 फिरी भी धर्मी लोक अपनि बत ट्लेइतां रखेले,
ते शुद्ध कम केरनेबाले ताकती पुड़ ताकत हासिल केरेले।
10 तुस सभेरे सब मीं कां फिरी एजने त एज्जा,
पन मीं तुसन लोकन मां अक भी अक्लमन्द न मैल्हेलो।
11 मेरे दिहाड़े त बीती जे, ते मेरी योजना मिटी जेई,
ते ज़ैन मेरे मने मां थियूं, तैन नाश भोवरूए।
12 तैना राती जो दीस बनानी चातथ;
तैना ज़ोतन, आंधरेरे नेड़े लौए।
13 अगर मेरी उमीद ई भोए कि पाताल मेरू घर भोल्हु,
अगर मीं आंधरे मां अपनु बिछ़ान दित्तोरूए,
14 अगर मीं कब्री सेइं ज़ोवं, ‘तू मेरो बाजी आस,’
ते कीड़े सेइं, ‘तू मेरी अम्मा,’ ते ‘मेरी बेइन आस,’
15 त मेरी उमीद कोड़ि राई?
ते मेरी उमीद केसेरे हेरने मां एज्जेली?
16 तै त पाताले मां गाली,
ते तैस सेइं साथी मीं भी मित्ती मां आराम मैल्हेलो।"