अय्यूब 8

बिल्ददेरी गल्‍लां

1 तैखन शूह नगरेरे बिल्ददे ज़ोवं,

2 "तू केइस तगर एरी-एरी गल्‍लां केरतो रालो?

कने तेरे ऐशेरी गल्‍लां केइस तगर तूफानेरी ज़ेरि भोल्ही?

3 कुन परमेशर अन्याय केरते?

या कुन सर्वशक्तिमान परमेशर धार्मिकताई उलटी केरते?

4 अगर तेरे बच्‍चेइं तैसेरे खलाफ पाप कियोरोए,

त तैनी तैन्न, तैन केरे पापेरो फल भुगतावरोए।

5 त फिरी भी अगर तू परमेशरे खूब रोड़ेच़ारे तोपतस

ते सर्वशक्तिमान परमेशरे कां छंदे केरतां बिनती केरतस,

6 ते अगर तू शुद्ध ते धर्मी भोथो,

त ज़रूर हुन्ना तै तेरी मद्दत केरेथो,

ते तेरी धार्मिकतारू घर फिरी ज़ेरू पेइलू थियूं तेरहु भोथू।

7 चाए तेरो हिस्सो पेइलो निकड़ो राहोरो भोए पन

आखरी मां तेरी बड़ी तरक्‍की भोथी।

8 पेत्रीं पीढ़रे लोकन त पुछ़,

ते ज़ैन किछ तैन केरे बुज़ुर्गेईं हेर-जाच कियोरीए तैस पुड़ ध्यान दे।

9 किजोकि असां त हीजेरे लोक अहम, ते किछ भी न ज़ानम;

ते इश्शे दिहाड़े इस ज़मीनी पुड़ छावरे ज़ेरे बीत्तन।

10 कुन तैना तीं सेइं शिक्षारी गल्‍लां न ज़ोले?

कुन तैना अपने मनेरी गल्‍लां न कढेले?

11 कुन कह बगैर च़िकरां उगी सकते?

ते कुन निरैठी बगैर पैने बेडोई सेकतिन?

12 चाए तै नीलो भोए, ते कट्टोरो भी न भोए,

फिरी भी तै ते हर किसमेरे घासे सेइं

पेइले शुक्‍की गाते।

13 ज़ैना लोक परमेशरे बिसरतन तैन केरि बत भी एरी भोतीए,

ते अधर्मी मैन्हेरी उमीद ट्लुटी गाचे।

14 तैसेरी उमीद ट्लुटी गाली;

ते ज़ेसेरो तै भरोसो केरते तै गरज़ारेरो ज़ेरो भोते।

15 चाए तै अपने घरे पुड़ टेक लाए पन तैन रेइ न सखेलू;

तै तैस मज़बूती सेइं ठेमतां रखेलो पन तैन कायम न रालू।

16 तै धुप मैलतां हरो भरो भोइ गाते,

ते तैसेरे डैलड़ी बागी मां च़ेवरे पासन खिलरतिन।

17 तैसेरां ज़ीलां घोड़ां केरे ढेरन सेइं पलैटोरां रातन,

ते तै घोड़ेरे ठारी हेरते।

18 पन ज़ैखन तै एपनी ठारी पुड़ेरां नाश कियो गाए,

तैखन तै ठार तैस एन ज़ोइतां मुकरी गाचे,

ते मीं तै कधी नईं लाहोरो।

19 हेर, तैसेरे आनन्दे सेइं भेरतां चाल ईए;

फिरी तैस्से मित्ती मां होरे पौदे लग्गेले।

20 हेर, परमेशर न कोन्ची भी ईमानदार मैन्हु कधे शारेलो,

ते न बुराई केरनेबालन सम्भालते।

21 तै तेरे ऐशी हासी सेइं,

ते तेरे ओठन जयजयकारे सेइं भरेलो।

22 तेरे दुश्मन शर्मिन्दगरां लिगड़ां लाले,

ते दुष्टी केरे डेरे कोन्च टिकी न बटेले।"