1 फिरी यहोवा अय्यूबे जुवाब दित्तो:
2 "कुन ज़ै आलोचना केरते तै सर्वशक्तिमाने सेइं झगड़ो केरे?
ज़ै परमेशरे सेइं बेंस केरते तै इसेरो जुवाब दे।"
अय्यूब परमेशरे जुवाब देते
3 तैखन अय्यूबे यहोवा जुवाब दित्तो:
4 "हेर, अवं इस काबल नईं, अवं केन्च़रां तीं जुवाब देईं?
अवं अपनि अंगलोइ दंते हैठ दबताई।
5 एक्की बार त मीं ज़ोवं, पन होरू किछ न ज़ोइलो:
हाँ दूई बार भी मीं ज़ोवं, पन हुनी होरो अग्रोवं न बधेलो"
6 तैखन यहोवा अय्यूबे ऐंधी मरां ई जुवाब दित्तो:
7 "मड़देरी ज़ेरि अपनि कमरबन्ध40:7 कमरबन्ध तियार भो,
अवं तीं सेइं सवाल केरताईं, ते तू मीं जुवाब दे।
8 कुन तू मेरो न्याय भी बेकार ठहरालो?
कुन तू एप्पु बेकसूर ठहरानेरे इरादे सेइं मीं दोषी ठहरालो?
9 कुन तेरे पैखड़ी केरि ताकत परमेशरेरी ज़ेरिए?
कुन तू तैसेरी ज़ेरि आवाज़ी सेइं गेरज़ी सकतस?
10 हुन्ना अपने आपे महिमा ते प्रतापे सेइं सज़ा
ते इज़्ज़त ते महिमारां लिगड़ां ला।
11 अपने बड़े सरकरी हड़ैई सेइं रुड़ा
ते हर एक्की घमण्ड केरनेबाले हेर तैस घटिया साबत केर।
12 हर एक्की घमण्ड केरनेबाले हेरतां झुका,
ते दुष्ट लोक ज़ैड़ी खड़े भोन तैट्ठां बिछ़ोड़।
13 तैन्न एक्की साथी मित्ती मां मिला,
ते तैस छ़पोरी ठारी मां तैन केरू आशी बन्ध।
14 तैखन अवं भी तेरे बारे मां मन्नेलो,
कि सिर्फ तेरो देइनो हथ तीं बच़ेइ सकते।
15 तैस दरियारे घोड़े40:15 दरियारे घोड़े अक बड्डो जानबर ज़ै पैनेरे नेड़े रहते हेर, ज़ै मीं तीं साथी बनेवरोए,
तै दांतेरो ज़ेरो घास खाते।
16 हेर तैसेरी पिठी मां ताकते,
ते तैसेरे पेटेरे पट्टन मां तैसेरी ताकत रहतीए।
17 तै अपनु पौंछ़ड़ गैइड़ेरू ज़ेरू हिलाते;
तैसेरी ज़ंघां केरि सीरां एक्की होरि सेइं मिलोरिन।
18 तैसेरी हेड्डी ज़ेन्च़रे पितलरी नैलड़ी आन,
तैसेरी देल्लोड़ी ज़ेन्च़रे लोंहेरे बेंड़ेन।
19 तैन परमेशरेरू खास कम्मे;
ज़ै तैसेरो बनानेबालो भोए तैसेरे नेड़े तलवार नेइतां एज्जे!
20 ई गल पक्की आहे पहाड़न पुड़ तैस खाने जो मैलते,
ज़ैड़ी होरे सब जंगली जानबर दौड़तन खैडतन।
21 तै कमलेरे बूटन हैठ रेइतां निरैठी केरि आड़ी मां
ते च़िकरी पुड़ लेटते
22 कमलेरे बूटे तैस पुड़ छाव बनातन,
तै नालेरे बेंतेरे बुट्टन सेइं घिरोरो रहते।
23 चाहे दरियाए मां हड़ाई भी भोए फिरी भी तै न घबरालो,
चाहे यरदन भी बेद्धतां तैसेरे तुत्तरे तगर एज्जे पन तै निडर रालो।
24 ज़ैखन तै होशियार भोए तैखन कुन कोई तैस ट्लेइ सकेलो,
या तैसेरे नक्के मां फंदो लेई सकेलो?"