1 तैखन अय्यूबे जुवाब दित्तो;

2 "इस मां कोई शक नईं मैन्हु त तुस्से आथ

ते ज़ैखन तुस मरेले तैखन अक्ल भी च़ली गाली।

3 पन तुश्शी ज़ेरि मीं मां भी समझ़े,

अवं तुसन लोकन करां किछ घट नईं

कौन एरहो आहे ज़ै एरी गल्‍लां न ज़ानतो भोए?

4 अक वक्त थियो अवं परमेशरे कां प्राथना केरतो थियो,

ते तै मेरी शुनतो थियो;

पन हुनी मेरे दोस्त मीं पुड़ हसतन;

ज़ै धर्मी ते सच़्च़ो मैन्हु आहे, तै हसनेरी वजा भोइ जेवरोए।

5 दुखी लोक त सुखी लोकां केरे समझ़ी मां घटिया समझ़े गातन;

ते ज़ैन केरे पव घिशकतन तैन केरि बेइज़्ज़ती ज़रूर भोतीए।

6 डैकू केरे डेरे सुख चैने सेइं रहतन,

ते ज़ैना परमेशरे सरकातन, तैना बड़े निडर रहतन;

मतलब तैन केरो ईश्वर तैन केरि मुठड़ी मां रहते;

7 जानबरन करां त पुछ़ ते तैना तीं शिखालेले;

ते अम्बरेरे च़ुड़ोलन करां, ते तैना तीं ज़ोलां।

8 धेरती पुड़ ध्यान दे, तैखन तैस करां तीं शिक्षा मैल्हेली;

ते समुन्दरेरी मेछ़ली भी तीं सेइं बियान केरेली।

9 कौन इन गल्‍लन न ज़ाने,

कि यहोवाए अपने हथ्थन सेइं ई दुनिया बनेवरीए?

10 तैसेरे हथ्थे मां हर एक्‍की ज़िन्दगरे प्राण, ते

हर एक्‍की जिसमे बाले मैन्हु केरि आत्मा भी रहतीए।

11 ज़ेन्च़रे ज़िभी सेइं रोट्टी च़खी गातीए,

कुन तेन्च़रे कन्ने सेइं गल्‍लां न पेरखी गान?

12 बुढन मां अक्ल मैलतीए,

ते उमर दराज़न मां समझ़ त भोतीए।

13 परमेशरे मां पूरी अक्ल ते महान शक्ति मैलतीए;

सलाह ते समझ़ तैस्से मां आन।

14 हेरा, ज़ैन परमेशर बिछ़ोड़े, तैन फिरी बनावं न गाए;

ज़ैस मैन्हु परमेशर बन्द केरे, तै फिरी आज़ाद न कियो गाए।

15 हेरा, ज़ैखन तै झ़ड़ी रोकतां रखते त सब किछ शुक्‍की गाते;

फिरी ज़ैखन तै पानी छ़डते तैखन हड़ाई एइती।

16 तैस मां शक्ति ते खरी अक्ल मैलतीए;

धोखो देनेबालो ते धोखो खाने बालो दूईये तैसेरे कैबू मां आन।

17 तै सलाह देनेबालन लुटतां गुलैमी मां नेते,

ते हाकिमन बेवकूफ बनाते।

18 तै राज़ां केरो अधिकार ट्लोड़ते;

ते तैन गुलाम बनातस।

19 तै याजकन लुटतां गुलैमी मां नेते

ते ताकतबरन उलटाते।

20 तै भरोसेरे काबल सलाहकार ज़ोनेरी शक्ति

ते बुज़ुर्गन करां ज़मीरेरी शक्ति दूर केरते।

21 तै राजकुमारन पुड़ बेइज़्ज़ती लदते,

ते ताकतबरां केरे हथ ढिल्‍ले केरते।

22 तै आंधरे मां भोने बैली गल्‍लां बैंदी केरते,

ते मौतरे छावी भी लौई मां आनते।

23 तै राष्ट्रन महान केरते, ते तैन्न नाश केरते;

तै तैन्न फैलाते, ते गुलैमी मां नेते।

24 तै दुनियारे प्रधानां केरि अक्ल उडारते,

ते तैन्न गैर आबाद ठारन मां टपलाते ज़ैड़ी बत नईं।

25 तैना लौअरे बगैर आंधरे मां तोपते फिरतन;

ते तै तैन्न एरहो बनाते कि तैना पीने बालेरे

ज़ेरे थरकते च़लतन।"