1 फिरी एलीहू इन ज़ोतो जेव;

2 "हे अक्लमन्द लोकव! मेरी गल्‍लां शुना,

हे ज्ञानी लोकव! मेरी गल्‍ली ध्याने सेइं शुना,

3 किजोकि ज़ेन्च़रे ज़िभी सेइं च़ख्खू गाते,

तेन्च़रे गल्‍लां कन्ने सेइं पेरखी गैतिन।

4 ज़ैन किछ ठीके, अस अपने लेई च़ुनम;

ज़ैन भलू आहे, अस एप्पु मांमेइं समझ़म।

5 किजोकि अय्यूबे ज़ोवरूए, ‘अवं बेकसूर आईं,

ते परमेशरे मीं सेइं अन्याय कियोरोए।

6 अगर अवं सच़्च़ैई पुड़ आईं, फिरी भी झूठो मन्नो गाताईं,

अवं बेकसूर आईं, पन मेरे ज़खमेरो आलाज़ नईं।’

7 अय्यूबेरो ज़ेरो कौन बहादरे,

ज़ै परमेशरेरी निन्दा एन्च़रे केरते ज़ेन्च़रे कोई पानी पीते,

8 ज़ै बुरे लोकां केरू साथ देते,

ते दुष्ट मैन्हन सेइं साथ रखते?

9 तैने त ज़ोवरूए, ‘मैन्हु इस सेइं किछ फैइदो नईं

कि तै आनन्दे सेइं परमेशरेरी संगती रख्खे।’

10 एल्हेरेलेइ हे समझ़दार मैन्हव! मेरी शुना,

इन भोइ न सके कि परमेशर बुरू कम केरे,

त कने सर्वशक्तिमान बुराई केरे।

11 तै मैन्हेरी केरनरो फल देते,

ते हर एक्‍की अपनि-अपनि चालरो फल देते।

12 इन सच़्च़े कि परमेशर बुराई न केरे

ते न सर्वशक्तिमान अन्याये केरे।

13 केनि ज़मीन तैसेरे हथ्थे मां दित्ती?

या केनि सारे दुनियारो इंतज़ाम कियो?

14 अगर तै मैन्हु करां अपनो मन दूर केरे

ते अपनि आत्मा ते शाह एप्पु मां अकोट्ठो केरे,

15 त सब मैन्हु साथी नाश भोइ गाले,

ते मैन्हु फिरी मित्ती मां मिली गालो।

16 एल्हेरेलेइ इस शुन्तां समझ़ा,

ते मेरी इन गल्‍लन पुड़ ध्यान केरा।

17 ज़ै न्यायेरो बैरी भोए, कुन तै हुकूमत केरे?

ज़ै पूरो परमेशर धर्मी आहे, कुन तू तैस बुरो ठहरालो?

18 तै राज़े सेइं ज़ोते, ‘तू नीच़ आस;’

ते प्रधान्न सेइं, ‘तुस दुष्ट आथ।’

19 परमेशर त हाकिमां केरि तरफदारी न केरे

ते अमीर ते गरीब दूईयन अपने बनेवरे बुझ़तां

तैन मां किछ फर्क न केरे।

20 अध्धी राती एक्‍की पले मां तैना मेरि गातन,

ते प्रजारे लोक हिलाए गातन ते तैना च़ले गातन।

ते ताकतबर लोक बगैर हथ लेइतां उठाए गातन।

21 किजोकि परमेशरेरी एछ़्छ़ी मैन्हेरे चाल च़लने पुड़ लगोरी रैतिन,

ते तै तैसेरी सारी चाली हेरतो रहते।

22 एरू आंधरू या बड़ू आंधरू कोन्ची नईं

ज़ैस मां बे हद ज़ुलम केरनेबाले छ़ेप्पी सकन।

23 किजोकि तैने मैन्हु किछ वक्तेरे लेई रखोरोए

ताके तै परमेशरेरे सामने आदालती मां गाए।

24 तै बड्डे-बड्डे ताकतबरन पुछ़ गन केरनेरे बगैर चूर-चूर केरते,

ते तैन केरे ठारी पुड़ होरन खड़ो केरते।

25 एल्हेरेलेइ कि तै तैन केरे कम्मन रोड़ेच़ारे ज़ानते,

तै तैन्न राती मां एरे उलटाते कि तैना चूर-चूर भोइ गातन।

26 तै तैन्न दुष्ट बुझ़तां सेभी केरे हेरते मारते,

27 किजोकि तैनेईं तैस पत्ती च़लनू शारू

ते तैसेरे कोन्ची बत्ती पुड़ ध्यान नईं दित्तोरू,

28 इड़ी तगर कि तैन केरे वजाई सेइं गरीबां केरि फरियाद तैस तगर पुज़्ज़ी

ते तैने गरीब लोकां केरि फरियाद शुनी।

29 ज़ैखन तै च़ुप रहते त तैस कौन दोषी बनेई सकते?

ते ज़ैखन तै तुत्तर फिराते, तैखन कौन तैसेरू दर्शन केरि सकते?

सारे लोकन सेइं ते अकैल्‍ले मैन्हु सेइं, दूईयन सेइं साथी तैसेरो अक्‍कां ज़ेरो सलूख आहे।

30 ताके अधर्मी राज़ केरतो न राए,

ते लोक फंदे मां फसाए न गान।

31 कुन कोन्चे कधी परमेशरे सेइं ज़ोवं,

‘मीं सज़ाह झ़ेल्‍ली, हुनी अवं एजने बाले वक्ते मां बुराई न केरेलो,

32 ज़ैन मीं लेइहोए न, तैन तू मीं शिखाल;

ते अगर मीं बुरू कम कियोरू भोए, त एजने बाले वक्ते मां तेरहु न केरेलो?’

33 कुन तैस तेरे मनेरे मुताबिक बदलो मैल्हे किजोकि तू तैस सेइं खुश नईं?

किजोकि तीं फैसलो केरनोए, न कि मीं;

इस वजाई सेइं ज़ैन किछ तीं समझ़ी मां एइते, तैन ज़ो।

34 सब ज्ञानी मैन्हु

बल्के ज़ेत्रे अक्लमन्द मेरी शुन्तन तैना मीं सेइं ज़ोले,

35 ‘अय्यूब ज्ञानेरी गल्‍लां न ज़ोए,

ते न तैसेरी गल्‍लां समझ़ी सेइं भोतिन’

36 भलू भोथू, कि अय्यूब आखरी तगर अज़मैइशी मां राथो,

किजोकि तैने बुरे लोकां केरे ज़ेरे जुवाब दित्तोरेन।

37 ते तै पापे साथी-साथी खलाफत भी बद्धाते;

ते इश्शे दरमियान च़ैड़ी बज़ाते,

ते परमेशरेरे खलाफ बेड़ि गल्‍लां बनाते।"