1 इसेरे अलावा एलीहूए इन भी ज़ोवं,

2 "कुन तू इस अपनु हक़ समझ़तस?

कुन तू दावो केरतस कि तेरी धार्मिकता परमेशरेरी धार्मिकता करां जादे आहे?

3 ज़ैन तू ज़ोतस, ‘मीं इस सेइं कुन फैइदो?

ते मीं पापी भोने मां ते न भोने मां कौ ज़ेरो जादे फर्क आहे?’

4 अवं तीं ते तेरे सैथन भी अकोट्ठो जुवाब देताईं।

5 अम्बरेरे पासे नज़र केरतां हेर;

ते बिदलारी हेर, ज़ै तीं करां उच्‍ची आहे।

6 अगर तीं पाप कियोरोए त परमेशरेरू कुन बिगड़तस?

अगर तेरे पाप बड़े बधन फिरी भी तू तैसेरू कुन केरि सकेलो?

7 अगर तू धर्मी आस त तैस कुन देतस;

या तैस तेरे हथ्थे सेइं कुन मैलते?

8 तेरे बुरैइयरो फल तेरे ज़ेरे मड़देरे लेई आहे,

ते तेरी धार्मिकतारो फल भी सिर्फ मैन्हेरे लेई आहे।

9 बड़ो ज़ुलम भोनेरे वजाई सेइं तैना चिन्डां मारतन;

ते ज़ोरे बालेरे लेई बड़े ज़ोरेरे वजाई सेइं तैना बिनती केरतन।

10 फिरी भी कोई इन न ज़ोए, ‘मेरो बनानेबालो परमेशर कोड़िए,

ज़ै राती भी गीत ज़ुवाते,

11 ते असन धेरतरे जानबरन करां जादे शिक्षा देते,

ते अम्बरेरे च़ुड़ोलन करां जादे अक्ल देते?’

12 तैना बिनती केरतन पन कोई जुवाब न दे,

इन बुरे लोकां केरे घमण्डेरी वजाई सेइं भोते।

13 ई पक्‍की गल्‍ले कि परमेशर बेकार गल्‍लां कधी न शुने,

ते सर्वशक्तिमान परमेशर तैन पुड़ ध्यान न दे।

14 त तू किजो ज़ोतस, कि तै मीं दर्शन न दे,

कि ई मुकदमो तैसेरे सामने आहे, ते तू तैस बलगने बिशोरोस?

15 पन हुन्ना त तैने सेरकोइतां सज़ाह नईं दित्तोरी,

ते तैने तुश्शे पापे पुड़ जादे ध्यान नईं दित्तोरू।

16 इस वजाई सेइं अय्यूब बेकार गल्‍लां केरनेरे लेई आशी खोलतां फुज़ूल गल्‍लां बनाते।"