1 ऊस नंव्वेरे मुल्खे मां अक मैन्हु रहतो थियो; ज़ेसेरू नवं अय्यूब थियूं। तै बेकसूर ते सच़्च़ो मैन्हु थियो ते परमेशरेरो डर मन्ने बालो कने बुरैई करां दूर रहतो थियो। 2 तैसेरां सत मट्ठां ते ट्लाई कुइयां थी। 3 तैस कां 7000 भैड्डां-छ़ेल्‍ली, ते 3000 ऊँटां, 500 जोड़ी दांत, ते 500 गधे थिये, ते बड़े नौकर-नौकरैनी थी; बल्के तैस कां एत्री जाईदात थी, कि तै यरदन दरियारे पूरबेरे मुल्खन मां सेभन करां जादे अमीर थियो। 4 तैसेरां मट्ठां बैरी-बैरी सेइं ठुवालेवरे दिहाड़न मां एक्‍की होरेरे घरे मां खाने पीनेरे लेई गातां थियां; ते एपनी ट्लाईए बेइन्न एप्पु सेइं साथी खाने पीनेरे लेई कुजातां थियां। 5 ते ज़ैखन-ज़ैखन धांमरे दिहाड़े पूरे भोते थिये, तैखन-तैखन अय्यूब तैन कुजेइतां तैन शुद्ध केरतो थियो, ते झ़ेझ़ां सुबेले उठतां तैन केरि गिनतरे मुताबिक होमबलि च़ाढ़तो थियो; किजोकि अय्यूब सोचतो थियो, कि "भोइ सकते मेरे बच्‍चेइं पाप केरतां परमेशर शारोरो भोए।" एन्च़रे सेइं अय्यूब हमेशा केरतो रहतो थियो।

6 एक्सां यहोवारे दूत तैसेरे सामने हाज़र भोए, ते तैन केरे दरमियान शैतान भी अव। 7 यहोवा, शैताने पुछ़ू, "तू कोट्ठां एवरोस?" शैताने, यहोवा जुवाब दित्तो, "धेरती पुड़ इरां-उरां हंठतो-फिरतो ते च़लतो-फिरतो एवरोईं।" 8 यहोवा, शैताने पुछ़ू, "कुन तीं मेरे दास अय्यूबे पुड़ ध्यान दित्तोरूए? किजोकि तैसेरो ज़ेरो बेकसूर ते सच़्च़ो ते मेरो डर मन्ने बालो ते बुरैई करां दूर रानेबालो मैन्हु होरो कोई नईं।" 9 शैताने यहोवा जुवाब दित्तो, "कुन अय्यूब परमेशरेरो डर बगैर कोन्ची फैइदे मन्ते? 10 कुन तीं तैसेरे, ते तैसेरे घरेरे, ते ज़ैन किछ तैसेरूए तैसेरे च़ेवरे पासन बाड़ नईं बंधोरो? तीं त तैसेरे कम्मन पुड़ बरकत दित्तोरीए, ते तैसेरी जाईदात सारे मुल्खे मां फैली जेवरीए। 11 पन हुनी तू अपने हथ्थे सेइं ज़ैन किछ तैसेरूए, तैन तैस करां थसोड़, तैखन तै तेरे तुत्तरे पुड़ तेरी निन्दा केरेलो।" 12 यहोवा, शैताने सेइं ज़ोवं, "शुन ज़ैन किछ तैस कांए, तैन सब तेरे हथ्थे मांए; सिर्फ तैसेरी जानी पुड़ हथ न लेइयां।" तैखन शैतान यहोवारे सामनेरां च़लो जेव।

13 एक्सां अय्यूबेरां मट्ठां कुइयां अपने बड्डे ढ्लाएरे घरे मां धाम खाने ते दाछ़रो रस पीने लगोरां थियां। 14 तैखन अक मैन्हु अय्यूबे कां दौड़तो एइतां ज़ोने लगो, "असेईं त दांत लेवरे थिये, ते गधे भी तैन कां च़रने लेगोरी थिये। 15 ते शेबा मुल्खेरे किछ लोकेईं एइतां हमलो केरतां तैना निये, ते तलवारी सेइं तेरे नौकर भी मारे; ते अव्वें अकैल्‍लो बेच़तां तीं खबर देने एवरोईं।" 16 तै मस्सा एन ज़ोई राहोरो थियो, त अक होरो नौकर एइतां ज़ोने लगो, "परमेशरेरी अग अम्बरेरां अई* ते सैरी भैड्डां-छ़ेल्‍ली ते नौकर भी फुकोई जे; ते अव्वें अकैल्‍लो बेच़तां तीं खबर देने एवरोईं।" 17 तै मस्सा एन ज़ोई राहोरो थियो, त अक होरो मैन्हु एइतां ज़ोने लगो, "कसदी लोकां केरे ट्लेइ जथेईं एइतां ऊँटन पुड़ हमलो केरतां तैना निये, ते तलवारी सेइं तेरे नौकर भी मारे; ते अव्वें अकैल्‍लो बेच़तां तीं खबर देने एवरोईं।" 18 तै भी मस्सा एन ज़ोई राहोरो थियो, त अक होरो नौकर एइतां ज़ोने लगो, "तेरां मट्ठां कुइयां अपने बड्डे ढ्लाएरे घरे धाम खाने ते दाछ़रो रस पीने लगोरां थियां। 19 कि जंगलेरे पासेरां बड़ो आँधी-तूफान ते बात च़लो, ते घरेरे च़ेवरे कून्न बज़्ज़ो, ते तैन घर तैन उन्ढू डुल्‍ली जेवं ते तैना सब मेरि जे; ते अव्वें अकैल्‍लो बेच़तां तीं खबर देने एवरोईं।"

20 तैखन अय्यूब खड़ो उठ्ठो, ते दुखेरे मारे अपना लिगड़ां छ़िन्दां, ते टिन्ड बनेइतां तुत्तरेरे भारे तल्‍ले मां झुकतां परमेशरेरी आराधना केरतां ज़ोने लगो, 21 "अवं एपनी अम्मरे पेटे मरां खाली हथ्थेइं एवरोईं, ते खाली हथ्थेइं च़लो गेइलो, यहोवा दित्तेरू थियूं, ते तैन्नी वापस भी नेवं; यहोवारू नवं धने।"

22 एन सेभी गल्‍लन मां भी अय्यूबे न त कोई पाप कियो, ते न परमेशरे पुड़ बेवकूफी सेइं कोई इलज़ाम लव।