अय्यूब 6

अय्यूबेरो जुवाब

1 फिरी अय्यूबे जुवाब देइतां ज़ोवं,

2 "भलू भोथू कि मेरो दुख तुल्‍लो गाथो,

ते मेरी सारी मुसीबत ट्लेकड़ी मां रख्खी गाथी।

3 किजोकि तै समुन्दरेरी रेती करां भी भारी भोथी;

एल्हेरेलेइ मेरी गल्‍लां जल्द बैज़ी सेइं भोवरिन।

4 किजोकि सर्वशक्तिमान परमेशरेरे तीर मीं मां चुभी जेवरेन;

ते तैन केरू ज़ेहर मेरी आत्माई मांए;

परमेशरेरी डरानेबैली गल्‍लां मेरे खलाफ खेड़ि आन।

5 ज़ैखन जंगली गधे घास मैलते त तैखन कुन तै डांकते;

ते दांते घास मैलतां कुन होकरैड़ी देते।

6 कुन बेसुवादी चीज़ बगैर लूने खाइ गाचे?

ते कुन ठूले मां ज़ै छ़ितो कल्ह भोते तैस कोई सुवाद भोते?

7 ज़ैन चीज़न सेइं अवं हुरनु भी न सुखेइं;

तैन्ना भिट्टी चीज़ां मेरी खूराक भोइ गैतिन।

8 रोड़ू भोथू कि मीं मेरी मेर्ज़रू बर मैलेथू,

ते ज़ैस गल्‍लरी उमीद अवं केरताईं तै परमेशर मीं देथो!

9 कि परमेशर खुशी भोइतां मीं ढ्लेन्च़ी छ़डेथो,

ते हथ अग्रोवं केरतां मीं मैरी छ़डेथो!

10 तैए मेरे सुखेरी वजा; बल्के बड़े तकलीफी मां भी

अवं इस वजाई सेइं छालां मारेथो;

किजोकि मीं तैस पवित्र परमेशरेरे वचना केरो कधी भी इन्कार नईं कियोरो।

11 मीं मां त ज़ोरे कुने, कि अवं उमीद रेखी?

ते मेरो अन्त कुन भोल्हो, कि अवं सबर केरीं?

12 कुन मेरी मज़बूती घोड़ां केरि ज़ेरि आहे?

कुन मेरी जान पितलरीए?

13 कुन अवं लाचार नईं?

कि कम केरनेरी ताकत मीं करां दूर नईं भोवरीए?

14 ज़ै अपने पड़ोसी पुड़ दया न केरे,

तै सर्वशक्तिमान परमेशरेरो डर मन्नो छ़ेडी देते।

15 मेरे ढ्ला नालेरे ज़ेरे धोखेबाज़ भोइ जेवरेन,

बल्के तैन नालां केरे ज़ेरे आन ज़ैना शुक्‍की गातन।

16 ते तैना हिंवेरे वजाई सेइं काले भोइ गातन,*6:16 काले भोइ गातन तैना हिंवे सेइं ढेकोई गातन

ते तैन मां हिवं छ़पोरो रहते।

17 पन ज़ैखन गर्मी भोने लगतीए तैखन तैन केरू पानी छ़ेप्पी गाते,

ते ज़ैखन बड़ी धुप पेतीए तैखन

तैना एपनी ठारी पुड़ेरां गाईब भोइ गातन।

18 ते तैना घुमते-घुमते शुक्‍की गातन,

ते सुनसान ठैरी मां बेगतां खतम भोइ गातन।

19 तेमा नगरेरे बंजारे तकते राए ते शेबा नंव्वेरे ठारारे

लोक तैन केरि बत तकते राए।

20 तैना शरमिन्दा भोइ जे किजोकि तैनेईं भरोसो रखोरो थियो कि पानी मैल्हे;

ते तैड़ी पुज़तां तैन केरां तुत्तरां शुक्‍की जेआं।

21 तेन्च़रे हुनी तुस भी किछ न राए;

मेरी मुसीबत हेरतां तुस डेरि जे।

22 कुन मीं तुसन सेइं ज़ोवरू थियूं, ‘मीं किछ देथ?’

या ‘अपने धन-दौलती मरां मीं किछ देथ?’

23 या ‘मीं मेरे सताने बालन करां बच़ाथ?’

या ज़ुलम केरनेबालां केरे कब्ज़े करां छुटाथ?

24 मीं समझ़ाथ ते अवं च़ुप रेइलो,

ते मीं समझ़ाथ कि मीं कौस गल्‍ली मां गलती कियोरीए।

25 सच़्च़ेरी गल्‍लन मां केत्रो अस्सर भोते,

पन तुश्शी बेंसी सेइं कुन फैइदो भोते?

26 कुन तुस गल्‍लां ट्लानेरो खियाल केरतथ?

परेशान मैन्हेरी गल्‍लां त हवारी ज़ेरि भोइचन।

27 तुस अनाथन पुड़ चिट्ठी छ़डतथ,

ते अपने दोस्ते बेच़तां फैइदो उठातथ।

28 एल्हेरेलेइ हुनी महरबानी केरतां मेरे पासे ध्यान देथ;

सच़्च़े अवं तुश्शे सामने कधी भी झूठ न ज़ोइलो।

29 फिरी कोई अन्याय न भोइ सके; फिरी एस मुकदमे मां

मेरी धार्मिकता ज़ेरि थी तेरही राहेली, अवं सच़्च़े पुड़ आईं।

30 कुन मेरे गल्‍लन मां कोई बुराई आहे?

कुन अवं बुराई न पिशैनी सेकी?"