1 "मैन्हु ज़ैस कौन्शां ज़र्म दित्तोरूए,

तैसेरे दिहाड़े थोड़े ते दुखे सेइं भेरतां आन। *

2 तै फूड़ोवेंरो ज़ेरो फुलते, फिरी ट्लोड़ो गाते;

तै छावरो ज़ेरो ढेली गाते, ते कोन्ची रुके न।

3 फिरी कुन तू एरे पुड़ नज़र केरतस?

कुन तू मीं एप्पु सेइं साथी आदालती मां नेतस?

4 अशुद्ध चीज़ी सेइं शुद्ध चीज़ी कौन केढी सकते?

कोई नईं।

5 मैन्हेरे ज़िन्दगरे दिहाड़े ठहरावरेन,

ते तैसेरे महीनां केरि गिनती तीं कां लिखोरीए,

ते तीं तैसेरेलेइ एरी हद बन्धोरीए ज़ैस तै पार न केरि सके,

6 इस वजाई सेइं तैस करां अपनु तुत्तर फेर, कि तै आराम केरे,

ज़ांतगर कि तै मज़दूरेरी ज़ेरि अपनि दिहाड़ी पूरी न केरे।

7 बुट्टेरे लेई त उमीद रहतीए,

कि चाहे तै कट्टो भी गाए, फिरी भी

उगेलो ते तैस सेइं अल्‍ले-अल्‍ले डाल निसते राले।

8 चाहे तैसेरू ज़ील ज़मीनी मां पुरानू भी भोइ गाए,

ते तैसेरू ढिक मित्ती मां शुक्‍की भी गाए,

9 फिरी भी थोड़ू ज़ेरू पानी मैलतां तैन उगेलु,

ते बुट्टेरे ज़ेरे तैस सेइं डाल निस्सेले।

10 पन मैन्हु मेरि गाते, ते खतम भोइ गाते;

ज़ैखन तैसेरे प्राण निसतन, तैखन तै कोड़ि रहते?

11 ज़ेन्च़रे तालाबेरू पानी घटते,

ते ज़ेन्च़रे दरियारू पानी शुकते-शुकते शुक्‍की गाते,

12 तेन्च़रे मैन्हु* लेटते ते फिरी न उठे;

ज़ांतगर अम्बर बनोरू रालू तैखन तगर तै न बींझ़ेलो,

ते न तैसेरी निड्ल खुलेली।

13 भलू भोथू कि तू मीं पाताले मां छ़ुपाथो,

ते ज़ांतगर तेरी सरक ठंडी न भोइ गाए तैखन तगर मीं छ़ुपेइतां रखेथो,

ते मेरे लेई वक्त ठहरेइतां फिरी मेरी खबर नेथो।

14 अगर मैन्हु मेरि गाए त कुन तै फिरी ज़ींतो भोल्हो?

ज़ांतगर मेरो छुटकारो न भोथो

तैखन तगर अवं अपनि मुश्किल सेवारे खतम भोनेरे सैरी दिहैड़ी उमीद रखेथो।

15 तू मींजो हक देथो, ते अवं जुवाब देथो;

तीं अपने हथ्थेरे बनेवरे* कम्मेरी खुवैइश भोतीए।"

16 पन हुनी तू मेरे कदम-कदम गनतस,

कुन तू मेरे पापेरी ताकी मां लग्गोरो न रास?

17 मेरे पाप छाप लेहितां बन्द कियोरे थेली मां आन,

ते तीं मेरो अधर्म सीतां रखोरोए।

18 "ते पक्‍कू आहे पहाड़ भी डुल्‍ली-डुल्‍ली नाश भोइ गाते,

ते चट्टान अपने ठारी करां दूर भोइ गाचे;

19 ते घोड़ पैनी सेइं घेसोई गातन,

ते ज़मीनरी धूड़ तैसेरे हड़ैई सेइं रुड़ी गाचे;

तेन्च़रे तू मैन्हेरी उमीद मिटातस।

20 तू हमेशा तैस पुड़ काबज़ भोतस, ते तै गातो रहते;

तू तैसेरू तुत्तर बिगैड़तां तैस कढतस।

21 तैसेरे मट्ठां केरि बडीयाई भोतीए, ते इसेरो तैस पतो न लग्गे;

ते तैन केरि घटी भोतीए, पन तै तैन केरो हाल न ज़ाने।

22 सिर्फ तैसेरी अपने जानी दुख भोते;

ते सिर्फ तैसेरे अपने प्राण अन्तरे अन्तर दुखी भोतन।"