1 तैखन तेमान नगरेरे रानेबाले एलीपजे ज़ोवं,

2 "कुन मैन्हु करां परमेशरे फैइदो पुज़्ज़ी सकते?

ज़ै अक्लमन्दे, तै अपने लेई फैइदामन्दे।

3 कुन तेरे धर्मी भोने सेइं सर्वशक्तिमाने सुख मैल्ही सकते?

तेरी चालरे सच़्च़ैई सेइं कुन तैस किछ फैइदो भोइ सकते?

4 कुन एल्हेरेलेइ कि तू तैसेरो डर मनतस,

त तै तीं हदायत केरते ते तीं आदालती मां आनते?

5 कुन तेरी बुराई बड़ी नईं?

तेरे पापां केरो कोई अन्त नईं।

6 तीं त अपनो ढ्ला बगैर वजां कैदी बनेवरोए,

ते नग्गेरां लिगड़ां खोलोरन।

7 थकोरे तीं पानी न पियावं,

ते ढ्लुखोरे रोट्टी देने करां इन्कार कियो।

8 ज़ै ताकतबर थियो तैस ज़मीन मैल्ही,

ते ज़ैस मड़देरी आदर भोवरी थी, तैए तैस मां बेस्सी जेव।

9 तीं विधवां खाली हथ्थेइं वापस भेज़ी।

ते अनाथां केरि पैखड़ी ट्लोड़ी छ़ेडी।

10 इस वजाई सेइं तेरे च़ेवरे पासे फंदे लगोरेन,

ते अचानक डरके मारे तू डरने लगोरोस।

11 कुन तू आंधरे न लास,

ते तै हड़ाई ज़ैस मां तू डुबने लगोरोस?

12 कुन परमेशर सुर्गेरे उच्‍ची ठारन मां नईं?

उच्‍चे करां उच्‍चे तारन हेर कि तैना केत्रे उच्‍चे आन।

13 फिरी तू ज़ोतस, ‘परमेशर कुन ज़ानते?

कुन तै बड़े आंधरेरे आड़ी मां भोइतां न्याय केरेलो?

14 काली बिदलारी करां तै एरहो छ़पोरो रहते कि तै किछ न हेरी सके,

तै त अम्बरेरे बह च़लते फिरते।’

15 कुन तू तैस पुराने बत्ती ट्लेइतां रालो,

ज़ैस पुड़ तैना ज़ुलम केरनेबाले च़लतन?

16 तैना अपने वक्ते करां पेइले सल्हे जे *

ते तैन केरे घरेरी बुनीयाद दरियाए रुड़ाई।

17 तैनेईं परमेशरे सेइं ज़ोवरू थियूं, ‘असन करां दूर भोइ गा;’

ते इन कि ‘सर्वशक्तिमान परमेशर इश्शू कुन केरि सकते?’

18 फिरी भी तैने तैन केरां घरां रोड़े-रोड़े चीज़न सेइं भरां

पन दुष्ट लोकां केरो खियाल मीं करां दूर राए।

19 धर्मी लोक हेरतां खुश भोतन;

ते बेकसूर लोक तैन केरि हासी बनातन, कि

20 ‘ज़ैना इश्शे खलाफ खड़े भेवरेन, इस मां कोई शक नईं तैना नाश भोए

ते तैन केरि बड़ी दौलत अग्गी मां भस्म भोइ जेई।’

21 परमेशरे सेइं मेल मिलाप केर तैखन तीं तसल्‍ली मैल्हेली;

ते इस सेइं तेरू भलू भोल्हु।

22 अवं बिनती केरताईं कि तैसेरे ऐशेरां शिक्षा शुन,

ते तैसेरे वचन अपने मने मां रख।

23 ते अगर हलीम भोइतां तू सर्वशक्तिमान परमेशरेरे पासे फिरतां नेड़े गास,

ते अपने तेम्बु मरां बुरू कम दूर केरस, त तू बहाल भोइ गालो।

24 तू अपनि कीमती चीज़न धूड़ी पुड़,

बल्के ओपीरेरू सोन्नू* भी नालां केरे घोड़न मां छ़ड,

25 तैखन सर्वशक्तिमान एप्पु तेरी कीमती चीज़

ते तेरे लेई चमकने बाली चाँदी भोल्हो।

26 तैखन सर्वशक्तिमान परमेशरे करां सुख मैल्हेलू,

ते परमेशरेरे पासे अपनु तुत्तर निडर भोइतां खड़ू केरि सकेलो।

27 ते तू तैस कां प्राथना केरेलो, ते तै तेरी शुनेलो;

ते तू एपनी मिन्नतां पूरी केरेलो।

28 ज़ै गल तू थापेलो तैस तू केरि सकेलो,

ते तेरे बत्तन पुड़ लौ राली।

29 मैन्हु ज़ैखन झ़ड़ते, त तू ज़ोतस कि तै खड़ो कियो;

किजोकि तै हलीम मैन्हु बच़ाते।

30 बल्के ज़ै बेकसूर न भोए तैस भी तै बच़ाते;

तेरे शुद्ध कम्मां केरे वजाई सेइं तू छुटाव गालो।"