1 "शुना, मीं इन सब किछ अपने एछ़्छ़न सेइं पेइलू लाहेरू थियूं,
ते अपने कन्नेईं सेइं शुनोरूए, ते समझ़ोरूए।
2 ज़ैन किछ तुस ज़ानतथ तैन अवं भी ज़ानताईं;
अवं तुसन लोकन करां किछ घट नईं।
3 अवं त सर्वशक्तिमान परमेशरे सेइं गल्लां केरेलो,
ते मेरी खुवैइश परमेशरे सेइं बेंस केरनेरी आहे।
4 पन तुस लोक झूठी गल्लां बनानेबाले भोए;
तुस सभेरे सब निकम्मे बेइद आथ।
5 रोड़ू भोथू, कि तुस बिलकुल च़ुप राथे,
ते इस सेइं तुस अक्लमन्द ठहरेथे।
6 मेरी दलील शुना,
ते मेरी बिनतरी गल्लन पुड़ कन लाथ।
7 कुन तुस परमेशरेरे लेई बुरी गल्लां ज़ोले,
ते तैसेरे हक्के मां धोखे सेइं ज़ोले?
8 कुन तुस तैसेरी तरफदारी केरेले?
ते परमेशरेरे लेई मुकदमो च़लाले।
9 कुन इन भलू भोल्हु, कि तै तुसन परखे?
कुन कोई मैन्हु धोखो दे,
तेन्च़रे तुस कुन तैस भी धोखो देले?
10 अगर तुस छ़ेपतां तरफदारी केरथ,
त तै पक्को तुसन डांटेलो।
11 कुन तुस तैसेरे महान भोने करां न डरेले?
कुन तैसेरो डर तुश्शे मने मां न बसेलो?
12 तुश्शे याद केरने काबल कहावतां मांज़नरी ज़ेरि आन;
तुश्शे क़िले मित्तरे ठहरतन।
13 च़ुप भोइ गाथ, कि अवं भी किछ ज़ोई सेखी;
फिरी मीं पुड़ ज़ेरि बीते त बीते।
14 अवं किजो अपनु मास अपने दंतन सेइं च़ैपी?
ते किजो अपने प्राण हथ्थन पुड़ रेखी?
15 तै मीं मारेलो, मीं किछ उमीद नईं;
फिरी भी अवं अपने चाल-चालनेरे पासे भोल्हो।
16 ते ईए मेरे बच़ावेरी वजा भोल्ही, कि
अधर्मी मैन्हु तैसेरे सामने न गेइ सके।
17 हे परमेशर, मन लेइतां मेरी गल शुना,
ते मेरी बिनती तुश्शे कन्ने मां पे।
18 हेरा, मीं अपने मुकदमेरी पूरी तियारी कियोरीए;
मीं पक्कू याकीने कि अवं बेकसूर ठहरेलो।
19 कौने ज़ै मीं सेइं मुकदमो लेड़ी सकेलो?
एरहो कोई मैल्हे, त अवं च़ुप भोइतां मेरि गालो।
20 हे परमेशर सिर्फ दूईये कम्मां मेरे लेई केर,
तैखन अवं तीं करां न छ़ुपेइलो:
21 अपनि झ़िड़क मीं करां दूर केर,
ते अपने डरे सेइं मीं न डरा।
22 तैखन तेरे कुजाने पुड़ अवं ज़ोइलो;
या अवं सवाल पुछ़ेलो, ते तू मीं जुवाब दे।
23 मीं मरां केत्रां बुरां कम्मां ते पाप भेवरेन?
मेरे जुर्म ते पाप मीं सेइं ज़ो।
24 तू कोस वजाई सेइं अपनु तुत्तर फेरतस,
ते मीं अपनो दुश्मन मनतस?
25 कुन तू उडरते पट्लोवे भी थरकालो?
ते शुकोरे डैलोवें पत्ती पेलो?
26 तीं मेरे लेई सखत दुखां केरो हुक्म दित्तोरोए,
ते मेरी जुवैनरे पापां केरि सज़ाह दित्तोरीए।
27 ते मेरे पव्वन बेड़ी लातस,
ते मेरो सारो चाल-चलन हेरतो रहतस;
ते मेरे पव्वां केरे च़ेवरे पासन हद बन्धतस।
28 ते अवं शेड़ोरी चीज़रो ज़ेरो आईं ज़ै नाश भोइ गातीए,
ते तैस लिगड़ेरो ज़ेरो आईं ज़ैन कीड़ेईं खेवरूए।"