1 "मेरे प्राण ज़ींते राने करां थकोरेन;

अवं पूरे ऐज़ैदी सेइं शिकायत केरेलो;

ते अवं अपने मनेरे दुखेरे मारे गल्‍लां केरेलो।

2 अवं परमेशरे सेइं ज़ोइलो, मीं दोषी न ठहरा;

मीं सेइं ज़ो, कि तू कोस वजाई सेइं मीं सेइं मुकदमो लड़तस?

3 कुन तीं अंधेर केरनी,

ते दुष्टां केरि योजना कामयाब केरतां

अपने हथ्थां केरे बनेवरे निकम्मे ज़ान्ने रोड़े लगतन?

4 कुन तेरी एछ़्छ़ी जिसमे बालां केरि ज़ेरि आन?

ते कुन ज़ेन्च़रे मैन्हु तकते तेन्च़रे तू तकतस?

5 कुन तेरे दिहाड़े मैन्हु केरे दिहाड़ां केरे ज़ेरे थोड़े आन,

या तेरे साल मैन्हेरे वक्तां केरे ज़ेरे आन,

6 कि तू मेरो अधर्म तोपतस,

ते मेरो पाप तोपतां कढतस?

7 तीं त पतोए, कि अवं दुष्ट नईं,

ते तेरे हथ्थे मरां छुटानेबालो कोई नईं!

8 तीं अवं अपने हथ्थन सेइं ठीक रच़ोरोईं ते ज़ोड़तां बनेवरोइं;

फिरी भी तू मीं नाश केरि छ़डतस।

9 याद केर, कि तीं अवं सन्नोरे मित्तरो ज़ेरो बनेवरोइं,

कुन तू मीं फिरी मित्ती मां मिलालो?

10 कुन तीं अवं दुद्धेरो ज़ेरो उलटेइतां, ते

ज़म्मेरे दुद्धेरो ज़ेरो ज़मेइतां नईं बनेवरो?

11 फिरी तीं मीं पुड़ चमड़ी ते मास च़ाढ़ू

ते हेड्डी ते सीरां पलेटोइतां अवं बनाव।

12 तीं मीं ज़िन्दगी दित्ती, ते मीं पुड़ दया कियोरीए;

ते तेरी हिफाज़ती सेइं मेरे प्राणां केरि हिफाज़त भोवरीए।

13 फिर भी तीं एरी गल्‍लां अपने मने मां छ़ुपेई;

मीं त पतो लगो, कि तीं एरू ही केरनू थापेरू थियूं।

14 कि अगर अवं पाप केरि, त तू तैसेरो लेखो नेलो;

ते अधर्म केरने पुड़ मीं बेकसूर न ठहरालो।

15 अगर अवं बुराई केरि त मीं पुड़ अफ़सोस!

ते अगर अवं धर्मी बेनि फिर भी अवं क्रोड़ी खड़ी न केरेलो,

किजोकि अवं शरमी सेइं भेरतां आईं

ते अपने दुखे पुड़ ध्यान रखताईं।

16 ते चाहे क्रोड़ी खड़ी केरि फिरी भी तू शेरेरो ज़ेरो मेरो शिकार केरतस,

ते फिरी मेरे खलाफ चमत्कार केरतस।

17 तू मेरे सामने अपने नंव्वें-नंव्वें गवाह आनतस,

ते मीं पुड़ अपनि सरक बद्धातस;

ते मीं पुड़ ज़ेन्च़रे सेना चढ़ाई केरतीए।

18 तीं अवं गर्भे मरां किजो कढो? नईं त अवं तैड़ी प्राण देथो,

ते कोई मीं लेही भी न सकेथो।

19 मेरू भोनू न भोनू अक्‍कां ज़ेरू भोथू,

ते पेटे मरां कब्री कां पुज़व गाथो।

20 कुन मेरे ज़िन्दगरे दिहाड़े थोड़े नईं? मीं छ़ड,

ते मेरे पासेरां तुत्तर फिरा, कि मेरो मन थोड़ो च़ुप भोइ गाए।

21 एस करां पेइले कि अवं तैड़ी गेईं, ज़ैट्ठां फिरी वापस न एज्जेलो,

मतलब बड़े आंधरेरे मुल्खे मां, ते मौतरे छावी मां;

22 ते मौतरे आंधरेरे मुल्खे

ज़ैस मां सब किछ गड़बड़े;

ते ज़ैड़ी लौ भी एरी आहे ज़ेन्च़रे आंधरू।"