1 "कुन तू ज़ानस कि पहाड़ां केरि परिझ़ां कैखन बच्‍चे ज़ैतिन?

या ज़ैखन हिरनी बच्‍चे देतिन, तैखन कुन तू तकतो रहतस?

2 कुन तू तैन केरे गर्भ ठहरनेरे महीने गेनि सकतस,

कुन तू तैन केरे बच्‍चे ज़ांनेरो वक्त ज़ानतस?

3 ज़ैखन तैना उन्ढे लिकतां अपने बच्‍चन ज़ैतिन,

तैना अपने तकलीफन करां छुट्टी गैतिन?

4 तैन केरे बच्‍चे निगर भोइतां जंगले मां बद्धतन;

तैना च़ले गातन ते फिरी वापस अपने अम्मन कां न एज्जन।

5 केनि जंगली गधो आज़ाद कियो?

केने तैसेरी रेस्सी खोल्‍ली?

6 तैसेरू घर मीं बगैर पैने मुल्खे जो,

ते तैसेरो ठिकानो लूनी ज़मीन ठहराई।

7 तै नगरेरे शोरी पुड़ हसते,

ते अपने मालिकेरी आवाज़ शुने भी न।

8 पहाड़न पुड़ ज़ैन किछ मैलते तैन तै खाते

तै सब किसमेरो नीलो घास तोपतो फिरते।

9 कुन जंगली दांत तेरी सेवा केरनेरे लेई खुश भोल्हो?

कुन तै तेरे गेवड़े मां राती रुकेलो?

10 कुन तू जंगली दांते हल्‍ली लेइतां सींथी मां च़लेइ सकतस?

कुन तै वैदन मां तीं पत्पती भोल्हो?

11 कुन तू तैसेरे बड़े ज़ोरेरे वजाई सेइं तैस पुड़ भरोसो केरेलो?

या ज़ैन मेहनतरू कम तेरू भोए, कुन तू तैस, तैस पुड़ छ़डेलो?

12 कुन तू तैस पुड़ भरोसो रखेलो, कि तै तेरू अन घरे आने,

ते तेरे खलाड़रू अन अकोट्ठू केरे?

13 फिरी शुतुर्मुर्गी अपने फंघन आनन्दे सेइं खिलारतीए,

पन कुन इना फंघां प्यारे बांदे केरतन?

14 किजोकि तै त अपने ठूल तल्‍ले देइतां शारतीए

ते धूड़रे गेर्मी सेइं तैन ज़ाऊ लगते;

15 ते इस गल्‍लरी परवाह न केरे, कि तैना पव्वन सेइं ढ्लेन्च़े गाले,

या कोई जंगली जानबर तैन्न ढ्लेन्च़ी छ़डेलो।

16 तै अपने बच्‍चन सेइं एरी सकती केरतीए कि ज़ेन्च़रे तैसेरे नईं;

अगर तैसेरे बच्‍चे मेरि भी गान फिरी भी तै तैस गल्‍लरी परवाह न केरे;

17 किजोकि परमेशरे तै बेअक्ल बनेवरीए,

ते तैस समझ़नेरी शक्ति नईं दित्तोरी।

18 ज़ैस मौके तै दौड़नेरे लेई अपना फंघां खिलारतीए,

तैखन घोड़े ते तैसेरे सुवार दूईयन किछ न समझ़े।

19 कुन तीं घोड़े तैसेरी ताकत दित्तोरीए?

कुन तीं तैसेरे मेट्टू पुड़ लम्मे बाल लेवरेन?

20 कुन तैस टिट्टां केरि ज़ेरि उछ़ड़नेरी शक्ति तू देतस?

तैसेरी खिनकनेरी आवाज़ डराने बाली भोतीए।

21 तै वैदी मां रौन्ने सेइं तल घड़ते ते अपने ताकती सेइं खुश रहते

तै हथियारे बाले मैन्हु केरो मुकाबलो केरनेरे लेई निस्सी गाते।

22 तै डरेरी गल्‍ली पुड़ हसते, ते घबराए न;

ते तलवारी करां पत्रोवं न हटे।

23 तरकश ते चमकतो सांग ते भालो

तैस पुड़ खड़खड़ाते।

24 तै सरक ते क्रोधेरे मारे ज़मीनी निगलते;

ज़ैखन नरशिंगेरी आवाज़ शुनोतीए तैखन तै रुके न।

25 ज़ैखन-ज़ैखन नरशिंगो बज़ाव गाते तैखन-तैखन तै खिनकते,

ते लड़ाई ते सेनापति केरि ललकार

ते जयजयकार दूरेरां शींघते।

26 कुन तेरे समझ़ाने सेइं बाज़ उडरते,

ते दक्षिणेरे पासे उडरने जो अपने फंघां खिलारते?

27 कुन उकाब तेरे हुक्मे सेइं उबरो च़ेढ़ी गाते,

ते उच्‍ची ठारन पुड़ अपनो आल्हो बनाते?

28 तै चट्टानी पुड़ रहते ते चट्टानरे च़ोटी

ते मज़बूत ठारी पुड़ रहते।

29 तै एपनी एछ़्छ़न सेइं दूर तगर लहते,

तैट्ठां तै अपने शिकारे तकते।

30 तैसेरे बच्‍चे भी खून पीतन;

ते ज़ैड़ी मारोरे लोक भोतन तैड़ी तै भी भोते।"