1 "फिरी इस गल्‍ली पुड़ भी मेरो दिल थरकते,

ते अपने ठैरी करां उछ़ड़ते।

2 परमेशरेरे ज़ोनेरो शब्द त शुना,

ते तैस शब्दे ज़ै तैसेरे ऐशी मरां निसते शुना।

3 तै तैस सारे अम्बरे हैठ,

ते अपनि बिजली धेरतरे पासे तगर भेज़ते।

4 तैस पत्ती गुड़नेरी आवाज़ भोतीए;

तै अपने महिमारे शब्दे सेइं गरज़ते,

ते ज़ैखन तैसेरी आवाज़ शुनोतीए तैखन अम्बर लगातार झ़फते,

5 परमेशर अपने अद्भुत आवाज़ी सेइं गरज़ते,

ते बड्डां-बड्डां कम्मां केरते ज़ैन्न अस न समझ़म।

6 तै त हिंवे सेइं ज़ोते, धेरती पुड़ बख,

ते एन्च़रे सेइं झ़ेड़ी भी

ते बड़े भारी झ़ेड़ी भी एरहो हुक्म देते।

7 एन्च़रे केरतां तै मैन्हेरां सब कम्मां रोकते,

ज़ैस सेइं तैसेरे बनेवरे सब मैन्हु तैस पिशानन।

8 तैखन जंगली जानबर कुढन मांजो च़ले गातन,

ते अपनि-अपनि कुढन मां रहतन।

9 दक्षिण पासेरां तूफान

ते उत्तरेरे पासेरां ठंड एइतीए।

10 परमेशरेरे शाहेरी फुक्‍की सेइं हिवं पेते,

तैखन पानी डेंगी गाते।

11 फिरी तै निहारे पैनी सेइं भरते,

ते अपने बिजली सेइं भेरतां लौअरी बिदलार दूर तगर फैलाते।

12 तैना तैसेरी अक्लरी योजना करां इरां-उरां फिराए गातन,

एल्हेरेलेइ कि ज़ै हुक्म तै तैन्न दे,

तैस्से तैना बसावरी ज़मीनी पुड़ पूरो केरन।

13 चाहे सज़ाह देनेरे लेई, चाहे अपनि ज़मीनरी भलियाइरे लेई

या मैन्हन पुड़ दया केरनेरे लेई तै तैस भेज़े।

14 हे अय्यूब! इस पुड़ कन ला ते शुन; च़ुपच़ाप खड़ो रा,

ते परमेशरेरे चमत्कारन पुड़ ध्यान दे।

15 कुन तू ज़ानतस, कि परमेशर किजो अपने बिदलारी हुक्म देते,

ते अपने बिदलारारी बिजली चमकाते?

16 कुन तू बिदलार तुलनी,

या सारू ज़ान्ने बालेरे चमत्कारन ज़ानतस?

17 ज़ैखन धेरती पुड़ दक्षिणी हवारे वजाई सेइं खामोशी रहतीए

तैखन तेरां लिगड़ां गर्म भोइ गातन?

18 फिरी कुन तू तैस सेइं साथी अम्बरे खिलैरी सकतस,

ज़ैन ढालोरे शींशेरो ज़ेरो मज़बूते?

19 तू असन इन शिखाल कि तैस सेइं कुन ज़ोवरू लोड़े?

किजोकि अस आंधरेरे वजाई सेइं अपनि दलील रोड़ेच़ारे पेश न केरि सकम।

20 कुन तैस ज़ोवं गाए कि अवं ज़ोनू चाताईं?

कुन कोई अपनो सत्यानाश चाते?

21 हुन्ना त अम्बरे मरां दिहाड़ेरी बड़ी लौ न लेइहोए

ज़ैखन हवा च़ेलतां तैस शुद्ध केरतीए।

22 उत्तरेरे पासे सुनहरी लौ एइतीए

परमेशर अपने बड़े महिमा सेइं साथी लेइहोते।

23 सर्वशक्तिमान परमेशर ज़ै बड़ो सामर्थीए,

ते ज़ेसेरे भेद असन मैल्ही न सकन,

तै न्याय ते पूरे धार्मिकतारे अलावा ज़ुलम न केरि सके।

24 इस्से वजाई सेइं लोक तैसेरो डर मनतन,

ते ज़ैना अपनि नज़री मां अक्लमन्दन, तैन पुड़ परमेशर नज़र न केरे।"