1 तैखन अय्यूबेरे ट्लाईए दोस्तेईं एन हेरतां तैस जुवाब देनो छ़ेडी दित्तो कि अय्यूब अपने नज़री मां बेकसूरे। 2 ते बूजी बारकेलेरू मट्ठू एलीहू ज़ैन रामेरे खानदाने मरां थियूं, तैस बड़ी सरक आई। अय्यूबे पुड़ तैस एल्हेरेलेइ सरक आई, कि तैने परमेशर नईं, बल्के अपनो आप बेकसूर ठहराव। 3 फिरी अय्यूबेरे ट्लाईए दोस्तां केरे खलाफ भी तैस सरक इस वजाई सेइं आई, कि तैना अय्यूबे जुवाब न देइ बटे, फिरी भी तै दोषी ठहराव। 4 एलीहू अय्यूबे सेइं गल केरनेरे लेई एल्हेरेलेइ रुकोरो राव किजोकि तैना ट्लाईए तैस करां बड्डे थिये। 5 पन ज़ैखन एलीहूए हेरू कि इना ट्लाई ज़ने किछ जुवाब न देन, तैखन तैस बड़ी सरक आई। 6 तैखन बूजी बारकेलेरू मट्ठू एलीहू ज़ोने लगू,

"अवं त जुवान आईं, ते तुस बड़े बुढे आथ;

इस वजाई सेइं अवं रुकोरो राव, ते अपनि राई देने करां डरतो थियो।

7 अवं सोचतो थियो, ‘ज़ैना उमरी मां बड्डे आन सिर्फ तैना गल केरन,

ते ज़ैन केरि उमर बड़े साल आहे, सिर्फ तैना अक्लरी गल्‍लां शिखालन।’

8 पन मैन्हु मां आत्मा त आहे,

ते सर्वशक्तिमान परमेशर अपने दित्तोरे शाहे सेइं तैन्न समझ़नेरी शक्ति देते।

9 ज़ैना अक्लमन्द आन तैना बड्डे-बड्डे लोक नईं

ते न्याय समझ़ाने बाले सिर्फ बुढे न भोन।

10 एल्हेरेलेइ अवं ज़ोताईं, ‘मेरी भी शुना;

अवं भी अपनि राई देइलो।’

11 अवं त तुश्शी गल्‍लां शुन्नेरे लेई रुकोरो राव,

अवं तुश्शी दलील शुन्नेरे लेई रुकोरो राव;

हालांकि तुस ज़ोनेरे लेई शब्द तोपते राए।

12 अवं ध्याने सेइं तुश्शी गल्‍लां शुनतो राव।

पन कोन्चे अय्यूब गलत साबत न केरि बटो।

ते न तैसेरी गल्‍लां केरो जुवाब दित्तो।

13 तुस लोक न समझ़ा कि असन एरी अक्ल मैल्होरीए,

कि तैस गलत साबत मैन्हु नईं बल्के परमेशरे केरि सकते।

14 ज़ैना गल्‍लां तैने ज़ोई तैना मेरे खलाफ त न ज़ोई,

ते न अवं तुश्शी ज़ेरि गल्‍लन सेइं तैस जुवाब देइलो।

15 तैनेईं हिम्मत हारोरीए, ते फिरी किछ जुवाब न दित्तो;

तैन कां ज़ोने जो किछ नईं।

16 एल्हेरेलेइ कि तैना किछ न ज़ोन ते च़ुपच़ाप खड़े आन,

कुन इस वजाई सेइं अवं रुकोरो रेईं?

17 पन हुनी अवं भी किछ ज़ोइलो,

अवं भी अपनि राई देइलो।

18 किजोकि मेरे मने मां गल्‍लां भेरोरिन,

ते मेरी आत्मा मीं मजबूर केरने लगोरीए।

19 मेरो मन तैस दाछ़रे रसेरो ज़ेरोए, ज़ै खोल्‍लोरो न भोए;

तै नंव्वी मसकां केरो ज़ेरो फेटी गाने पुड़े।

20 अवं ज़ोइलो ताके तीं तसल्‍ली मैल्हे;

अवं आशी खोलतां जुवाब देइलो।

21 न अवं कोन्ची मैन्हेरे पासे भोइलो,

ते न अवं कोन्ची मैन्हु कां चापलूसी केरेलो।

22 किजोकि मीं त चापलूसी केरनी एज्जे न,

नईं त मेरो बनानेबालो परमेशर एक्‍की पले मां मीं सज़ाह देथो।"