अय्यूबेरो जुवाब
1 तैखन अय्यूबे ज़ोवं,
2 "मेरी शिकायत हुन्ना भी न रुकी सके,
परमेशरेरो हथ मेरे करलाने करां भारीए।
3 भलू भोथू, कि मीं पतो भोथो कि तै कोड़ि मैल्ही सकते,
तैखन अवं तैसेरे तखते तगर पुज़्ज़ी गाथो!
4 अवं तैसेरे सामने अपनो मुकदमो पेश केरेथो,
ते बड़े सबूत देथो।
5 अवं ज़ानताईं कि तै मीं सेइं जुवाबे मां कुन ज़ोई सकते,
ते ज़ैन किछ तै मीं सेइं ज़ोथो तैन अवं समझ़ेथो।
6 कुन तै अपनि बड़ी ताकत हिरेइतां मीं सेइं मुकदमो लड़ेथो?
नईं, तै मीं पुड़ ध्यान देथो।
7 ईमानदार मैन्हु तैस सेइं बेंस केरि सकते,
ते एन्च़रां अवं अपने न्यायेरे हथ्थे सेइं हमेशारे लेई छुट्टी गाथो।
8 हेरा, अवं पूरबेरे पासे गाताईं पन तै न मैल्हे;
अवं पश्चिमेरे पासे गाताईं पन तै लेइहोए न;
9 ज़ैखन तै उत्तरेरे तरफां कम केरते तैखन तै मीं लेइहोए न;
तै त दक्षिणेरे पासे एरहो छ़पते, कि मीं तै लेइहोए न।
10 पन तै ज़ानते, कि अवं केरही चाल च़लताईं;
ते ज़ैखन मीं परखेलो तैखन अवं सोन्नेरो ज़ेरो खालिस निस्सेलो।
11 मेरे पव तैसेरे बत्तन मां टिकोरे राए;
ते मीं तैसेरी बत मुड़ने बगैर ठेमतां रख्खी।
12 तैसेरो हुक्म मन्ने करां अवं न हटो,
ते मीं तैसेरे वचन अपने इच्छाई सेइं
बड़े जादे कम्मेरे सेमझ़तां सुरक्षित रख्खे।
13 पन तै एक्की गल्ली पुड़ खड़ो रहते,
ते कौन तैस, तैस करां बेदली सकते?
ज़ैन किछ तैसेरो दिल चाते तै तैन्ने केरते
14 ज़ैन किछ मेरे लेई तैने थापेरू,
तैन्ने तै पूरू केरते;
ते तैसेरे मने मां एरी-एरी बेड़ि गल्लां आन।
15 इस वजाई सेइं अवं तैसेरे सामने डेरि गाताईं;
ज़ैखन अवं सोचताईं तैखन तैस करां डरताईं।
16 किजोकि परमेशरे मेरो दिल कमज़ोर कियोरोए,
ते सर्वशक्तिमान परमेशरे अवं घबरावरोईं।
17 किजोकि आंधरे अवं घेरोरोईं,
ते बड़े आंधरे मेरू तुत्तर ढकोरूए।"