अय्यूबेरो जुवाब
1 तैखन अय्यूबे जुवाब देइतां ज़ोवं,
2 "ध्याने सेइं मेरी गल शुना;
ते तुश्शी शान्ति ईए भोए।
3 मेरी किछ त झ़ैल्लां, कि अवं भी गल्लां केरि;
ते ज़ैखन अवं एपनी गल्लां मुकेईं, त तैसेरां बाद मज़ाक बनानो।
4 कुन अवं कोन्ची मैन्हेरी फरियाद केरताईं?
फिरी अवं बे सबर किजो न भोईं?
5 मेरे पासे ध्यान दे ते हैरान भो,
ते अपनो हथ अपने ऐशी पुड़ रख।
6 ज़ैखन अवं अपने तकलीफन याद केरताईं तैखन अवं डेरि गाताईं,
ते मेरी जान थरकने लगतीए।
7 कुन वजा आहे कि दुष्ट लोक ज़ींते रहतन,
बल्के बुढे भी भोइ गातन, ते तैन केरि शक्ति21:7 शक्ति दौलत बद्धती गातीए?
8 तैन केरि औलाद तैन सेइं साथी,
ते तैन केरे बाल-बच्चे तैन केरि एछ़्छ़ी केरे सामने बनोरे रहतन।
9 तैन केरे घरे मां बगैर डरे सुख रहते,
ते परमेशरेरी सज़ाहरी सोटी तैन पुड़ न पे।
10 तैन केरो दांत गभिन केरते ते चुके न,
तैन केरि बेछ़ी बछ़ड़ां ज़ैतिन ते कधे केटोन न।
11 तैना अपने मट्ठन गबड़ां केरे ज़ेरे झुण्डां केरे झुण्डां बेइर गाने देतन,
ते तैन केरे बच्चे नच़तन।
12 तैना डफली ते सारंगी बज़ेइतां नच़तन,
ते बेइशोइअरे आवाज़ी सेइं खुश भोतन।
13 तैना अपने दिहाड़े सुखे सेइं गुज़ारतन,
ते एक्की सैइती मां पाताले मां ओस्सी गातन।
14 फिरी भी तैना परमेशरे सेइं ज़ोते थिये, ‘असन करां दूर भो!
तेरी बत्तां ज़ान्नेरी असन इच्छा नईं।
15 सर्वशक्तिमान परमेशर कौने, कि अस तैसेरी सेवा केरम?
ते अगर अस तैस कां बिनती भी केरम त असन कुन फैइदो भोल्हो?’
16 हेरा, तैन केरू सुख तैन केरे हथ्थे मां न राए,
दुष्ट लोकां केरो खियाल मीं करां दूर राए।
17 केत्रे बार एरू भोते कि दुष्टां केरो दीयो हिश्शी गाते,
या तैन पुड़ आफत एइतीए;
ते परमेशर सेरकोइतां तैन केरे हिस्से मां दुख देते,
18 तैना बाते सेइं उडरतां भूंसेरे,
ते ऐंधी सेइं उडारेरे भूंसेरे ज़ेरे भोतन।
19 पन तुस ज़ोतथ, ‘परमेशर तैसेरे पापेरी सज़ाह तैसेरे बच्चां केरे लेई रखते,’
तै तैसेरो बदलो तैस्से दे, ताके तैस पतो च़ले।
20 दुष्ट अपनो नाश अपने एछ़्छ़ेईं सेइं हेरे,
ते सर्वशक्तिमान परमेशरेरे सरकी मरां एप्पु पीए।
21 किजोकि ज़ैखन तैसेरे महीनां केरि गिनती पूरी भोइ,
त तैसेरे बादे तैसेरे घराने सेइं तैसेरू कुन कम रावं।
22 कुन परमेशरे कोई ज्ञान शिखालेलो?
तै त उच्चे पदे पुड़ रानेबालां केरो भी न्याय केरते।
23 कोई त अपने पूरी ताकती मां
बड़े चैन ते आरामे सेइं रहतो मेरि गाते।
24 तैसेरी जान दुद्धे सेइं
ते तैसेरी हेड्डी मासे सेइं भेरतां रैतिन।
25 ते कोई अपने आपे मां जलन रेखतां
सुख न मैल्हने सेइं मेरि गाते।
26 तैना दूईये अक्कां ज़ेरे मेरतां दब्बे गातन,
ते कीड़े तैन ढेक्की छ़डतन।
27 हेरा, अवं तुश्शे खियाल ज़ानताईं,
ते तुश्शी योजना भी, ज़ैना तुस मेरे बारे मां अन्याये सेइं केरतथ।
28 तुस त पुछ़तथ, ‘खास मैन्हेरू घर कोड़ि रावं?
दुष्टां केरे रानेरे तेम्बु कोड़ि राए?’
29 पन कुन तुसेईं सफर केरनेबाले लोकन कधी नईं पुछ़ोरू?
कुन तुस तैन केरे इस बारेरे सबूतन करां अनज़ान आथ,
30 कि आफतरे दिहाड़ेरे लेई बुरो मैन्हु सुरक्षित रख्खो गाते;
ते सरकरे दिहाड़ेरे लेई एरे लोक बच़ाए गातन?
31 तैसेरी चाल तैसेरे तुत्तरे पुड़ कौन ज़ोलो?
ते तैने ज़ैन कियोरूए, तैसेरो बदलो कौन देलो?
32 फिरी भी तै कब्री कां पुज़व गाते,
ते लोक तैस कब्रारी पहरदारी केरते रहतन।
33 वैदरी मित्ती तैस रोड़ी लगतीए;
ते सब लोक तैस पत्ती च़ले गातन,
ज़ेन्च़रे बड़े लोक तैस करां पेइले च़ले जेवरेन।
34 तुश्शे जुवाबन मां त झूठे मैलते,
एल्हेरेलेइ तुस किजो मीं बेफैइदी तसल्ली देतथ?"