1 फिरी अय्यूबे जुवाब दित्तो,

2 "अवं इन पक्‍कू ज़ानताईं, कि गल एरी आहे;

पन मैन्हु परमेशरेरे नज़री मां केन्च़रे सेइं धर्मी भोइ सकते?

3 अगर तै परमेशरे सेइं मुकदमो लड़नो भी चाए,

त फिरी भी मैन्हु हज़ार गल्‍लन मरां एक्‍केरो भी जुवाब न देइ बटेलो।

4 परमेशर अक्लमन्द ते बड़ो शेक्ति बालोए:

तैसेरे खलाफ जिद केरतां कौन कधी हावी भोवरोए।

5 तै पहाड़न भी हटाते,

ते तैन पतो भी न लग्गे, तै अपने क्रोधे मां तैन उलट-पलट केरते।

6 तै धेरती हिलेइतां तैसेरे ठारारां अलग केरते,

ते तैसेरे खम्भे थरकतन।

7 तैसेरे हुक्मे बगैर दिहाड़ो निस्से न;

तै तारन भी मोहर लेइतां बन्द केरते।

8 तै अम्बरे अकैल्‍लो फैलाते,

ते समुन्दरेरी छ़ेलहन पुड़ च़लते;

9 तै सप्तर्षि, मृगशिरा कचपचिया ते

दक्षिणेरे तारां केरो बनानेबालोए।

10 तै त एत्रां बड्डां-बड्डां कम्मां केरते, कि ज़ैन केरू बियान न केरोए,

ते एत्रे चमत्कार केरते, ज़ैन केरि गिनती न भोइ सके।

11 हेरा, तै मेरे सामने त च़लते,

पन मीं तै न लेइहोए;

ते मीं करां अग्रोवं च़लो गाते, पन मीं समझ़ न एज्जे।

12 हेरा, ज़ैखन तै थुसोड़ते, तैखन तैस कौन रोकेलो?

कौन तैस सेइं ज़ोई सकते, कि तू एन कुन केरतस?

13 परमेशर अपनि सरक ठंडी न केरे।

रहबेरे* मद्दतगारन तैसेरे पव्वन पुड़ झुकनू पेते।

14 फिरी अवं कुन आईं, ज़ै तैस जुवाब देईं,

ते गल्‍लां तोप्पी-तोप्पी तैस सेइं बेंस केरीं?

15 चाहे अवं बेकसूर भी भोथो त तैस जुवाब न देइ सेखी:

अवं सिर्फ अपने हाकिमेरे छंदे केरतां मिन्नत केरेथो।

16 चाहे मेरे फुकारने सेइं तै मीं जुवाब भी देथो,

फिरी भी अवं एस गल्‍ली पुड़ विश्वास न केरेथो कि तै मेरी गल शुनते।

17 तै आँधी च़लेइतां मीं ट्लोड़ी छ़डते,

ते बगैर वजा मेरे ज़खमे पुड़ ज़खम लाते।

18 तै मीं शाह भी न दे घिन्ने,

ते मीं ट्लिठारे सेइं भेरि देते।

19 अगर शेक्तरी चर्चा भोए, त हेरा, कि तै शक्तिमाने,

ते अगर न्यायेरी चर्चा भोए, त तै ज़ोलो मीं सेइं कौन मुकदमो लड़ेलो?

20 चाहे अवं बेकसूर कि न भोईं, पन तै मीं एपनी ज़बानी सेइं दोषी ठहरेलो;

सच़्च़ो भोने पुड़ तै मीं दोषी ठहरालो।

21 अवं सच़्च़ो त आईं, पन मीं अपनि परवाह नईं;

मीं अपने ज़िन्दगी सेइं नफरत भोतीए।

22 गल त अक्‍के आहे, इस सेइं अवं एन ज़ोताईं,

कि परमेशर सच़्च़े भी ते दुष्टी भी दूईने नाश केरते।

23 ज़ैखन लोक मुसीबती सेइं अचानक मरने लगतन,

तैखन तैना बेकसूर लोकन परखने पुड़ हासी बनातन।

24 मुल्ख दुष्ट लोकां केरे हथ्थे मां दित्तो जेवरोए,

परमेशर तैसेरे न्याय केरनेबालां केरि एछ़्छ़ी बंद केरि देते;

इसेरो केरनेबालो तैए नईं त कौने?

25 मेरे ज़िन्दगरे दिहाड़े दौड़ने बाले करां जादे लूशी च़ले गातन;

तैना नश्शे गातन, ते तैन दिहाड़न मां किछ भी रोड़ू न लेइहोए।

26 तैना लूशी सरकणडां केरि किश्तरे ज़ेरे च़ले गातन,

ते तैस उकाबेरे ज़ेरे आन ज़ै शिकारे पुड़ तेज़ी सेइं हमलो केरते।

27 अगर अवं ज़ोईं कि शोग केरनो बिसरी गालो,

ते उदासी छ़ेडतां अपनो मन खुश केरेलो,

28 तैखन अवं अपने सेभी दुखन करां डरताईं,

अवं त ज़ानताईं कि हे परमेशर तू मीं बेकसूर न ठहरालो।

29 अवं त दोषी ठहरेलो,

फिरी अवं बेकार मेहनत किजो केरीं।

30 चाहे अवं हिंवेरे पैनी सेइं निहान देईं,

ते अपने हथ रोड़ेच़ारे* साफ केरीं।

31 फिरी भी तू गत्ते मां शेरी देलो,

ते मेरां लिगड़ां भी मीं सेइं नफरत केरेलां।

32 किजोकि परमेशर मेरो ज़ेरो मैन्हु नईं कि अवं तैस सेइं बेंस केरि बेटि,

कि अस दूईये एक्‍की होरि सेइं मुकदमो लेड़ी सखम।

33 इश्शे दूईयां केरे मझ़ाटे कोई बिचवाई केरनेबालो नईं,

ज़ै असन दूईने पुड़ अपनो हथ रख्खे।

34 तै अपनो सोटो मीं पुड़ेरां दूर केरे

ते तैसेरी डराने बाली गल मीं न डराए।

35 तैखन अवं निडर भोइतां तैस सेइं किछ ज़ोई सकेलो,

किजोकि अवं एपनी नज़री मां एरहो नईं।"