1 "मीं एपनी एछ़्छ़न सेइं करार कियोरोए,

कि अवं कोन्ची कुइये बुरी नज़री सेइं न तकेलो।

2 किजोकि परमेशर सुर्गे मरां कौ ज़ेरो हिस्सो

ते सर्वशक्तिमान बां कौ ज़ेरि जाईदात बंटते?

3 कुन तै बुरे मैन्हु केरे लेई मुसीबत

ते अनर्थ कम केरनेबालेरे लेई नाश भोनेरी वजा नईं?

4 कुन तै मेरी बत्तां न हेरे

ते कुन तै मेरे कदम-कदम न गने?

5 अगर अवं बुरे बत्तां च़लताईं,

या धोखो केरनेरे लेई मेरे पव दौड़ोरे भोन;

6 (त अवं धर्मेरे ट्लकड़ी सेइं तुल्‍लो गेईं,

ताके परमेशर मेरी ईमानदारी ज़ाने)।

7 अगर मेरे कदम बत्ती करां टेपलोरे भोन,

ते मेरे मने मेरी एछ़्छ़ी केरि लाहोरी चाल च़लोरी भोए,

या मेरे हथ्थन मां किछ कलंक लगोरो भोए;

8 त अवं बीज़ बेईं, पन होरो तैसेरी फसल खाए;

बल्के मेरे उडारेरी फसल ढ्लूड़ी गाए।

9 अगर मेरो दिल कोन्ची कौन्शी पुड़ फिदा भोवरो भोए,

ते अवं अपने पड़ोसेरे दारे पुड़ मारनेरे लेई बिश्शोईं;

10 त मेरी कौन्श होरेरे लेई अन्न पिहे,

ते बखले मड़द तैस सेइं साथी झ़ुल्‍लन।

11 किजोकि तै त महापाप भोथो;

ते हाकिमन करां सज़ाह मैल्हनेरे काबल अधर्मेरू कम भोथू;

12 किजोकि तै एरी अग्गे ज़ै बैलतां भस्म केरतीए,

ते तै मेरी सारी फसली ज़ीलन समेत नाश केरतीए।

13 ज़ैखन मेरे नौकर ते नौकरैनां मीं सेइं झगड़ो कियो,

तैखन अगर मीं तैन केरू हक मारोरू भोए;

14 त ज़ैखन परमेशर खड़ो भोल्हो, तैखन अवं कुन केरेलो?

ते ज़ैखन तै एज्जेलो तैखन अवं कुन जुवाब देइलो?

15 कुन तैए परमेशर तैसेरो बनानेबालो नईं ज़ैनी अवं पेटे मां बनाव?

कुन एक्‍के इश्शी दूईयां केरि सूरत पेटे मां न थी रच़ोरीए?

16 अगर मीं कंगालां केरि इच्छा पूरी न कियोरी भोए,

या मेरे वजाई सेइं विधवारी एछ़्छ़ी कधी परेशान भोन भोवरी,

17 या अगर मीं अकैल्‍ले रोट्टी खेवरी भोए,

ते तैस मरां अनाथ बच्‍चेइं न खेइ बटोरी भोए,

18 (पन तै मेरे निकड़ारेरे देंते मीं सेइं साथी एन्च़रां पलो ज़ैस तरीके बाजी सेइं साथी,

ते अवं ज़र्मनेरो विधवा पालतो एवरोईं)

19 अगर मीं कोई बगैर लिगड़ेईं मरतो लाव,

या कोन्ची गरीबे ज़ैस कां छ़ुंहें जो किछ न थियूं,

20 ते तैस एपनी भैड्डां केरि उन्ना केरां लिगड़ां न दित्तोरां भोन,

ते तैने गर्म भोइतां मीं आशिर्वाद न दित्तोरो भोए;

21 या अगर मीं नगरेरे फाटके मां अपने मद्दतगार हेरतां

अनाथां केरे मारने जो अपनो हथ खड़ो कियोरो भोए,

22 त मेरी पाखड़ कंधे पुड़ेरां घिशके,

ते मेरी पाखड़री हड्डी ट्लुटी गाए।

23 किजोकि परमेशरेरे महिमारे वजाई सेइं अवं एरू न केरि सकतो थियो,

किजोकि तैसेरी तरफां मुसीबतरे वजाई सेइं अवं डेरतां थरकतो थियो।

24 अगर मीं सोन्नेरो भरोसो कियोरो भोथो,

या शुद्ध सोन्ने जो अपनो सहारो ज़ोवरू भोथू,

25 या अपने बड़े धन

या अपनि बड़ी कमैयरे वजाई सेइं घमण्ड कियोरू भोथू,

26 या दिहाड़ो चमकते

या चैंदनी बड़े शानी सेइं च़लते हेरतां

27 अवं मने-मने मां फिदा भोइ जेवरो भोथो,

ते मीं तैन केरि पूज़ा कियोरी भोए;

28 त इन भी हाकिमन करां सज़ाह मैल्हनेरे काबल अधर्मेरू कम भोथू;

किजोकि एरू केरतां मीं सुर्गेरे परमेशरेरो इन्कार कियोरो भोथो।

29 अगर अवं अपने बैरी केरे नाशे सेइं खुश भोथो,

या ज़ैखन तैस पुड़ मुसीबत पेई तैखन तैस पुड़ हस्सोरो भोथो;

30 पन मीं न त तैस लानत देते,

ते न तैसेरे मौतरी सज़ारी प्राथना केरतां अपने ऐशी सेइं पाप कियोरोए;

31 अगर मेरे डेरेरे रानेबालेईं इन न ज़ोवरू भोथू,

‘एरो कोई कोड़ि मैल्हेलो, ज़ै अय्यूबेरे घरेरी रोट्टी खेइतां रज़्ज़ोरो न भोए?’

32 (परदेशी सड़की मां रानू न थियो पेतू;

अवं मुसाफरेरे लेई अपनु दारे खुल्‍लू रखतो थियो)

33 अगर मीं आदमेरो ज़ेरो अपनो पाप छ़ेपतां

अपनो अधर्म ढकोरो भोए,

34 इस वजाई सेइं कि अवं बड़ी भीड़रे चोगलन करां डरतो थियो,

या खानदानां केरे घटिया किये गाने करां डेरि जेव,

इड़ी तगर कि अवं दारे करां बेइर न निस्सो

35 भलू भोथू कि मेरो कोई शुन्ने बाले भोथो!

सर्वशक्तिमान परमेशर हुन्ना मेरो न्याय केरे! हेरा, मेरी लिखत ईए आहे।

भलू भोथू कि ज़ै शिकायत नामो मेरे दोष लाने बाले लिखोरोए तै मीं कां भोथो!

36 पक्‍को अवं तैस अपने कंधे पुड़ खड़े केरतां फिराथो;

ते खूबसूरत साफो सेमझ़तां अपने दोग्गे पुड़ बेन्धतां राथो।

37 अवं तैस अपने कदमे-कदमेरो हिसाब देथो;

अवं तैसेरे नेड़े प्रधानेरो ज़ेरो निडर गाथो।

38 अगर मेरां ऊडारां मेरे खलाफ फरियाद केरतां भोन,

ते तैन केरि सींथां मिलतां लेरां देती भोन;

39 अगर मीं अपनि ज़मीनरी फसल मज़दूरी देने बगैर खाइ,

या तैसेरे मालिकेरो प्राण नेवरो भोए;

40 त गेहुं केरे बदले करेर,

ते जौआं केरे बदले कछ़ लग्गेलो"

अय्यूबेरी गल्‍लां मुक्‍की जेई।